Enable Javscript for better performance
உள்ளாட்சி தனி அதிகாரிகளின் பதவிக் காலம் நீட்டிப்புஉள்பட 15 மசோதாக்கள் நிறைவேற்றம்- Dinamani

சுடச்சுட

    

    உள்ளாட்சி தனி அதிகாரிகளின் பதவிக் காலம் நீட்டிப்பு உள்பட 15 மசோதாக்கள் நிறைவேற்றம்

    By DIN  |   Published on : 10th January 2020 04:52 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    jan

    நகா்ப்புற உள்ளாட்சி அமைப்புகளை நிா்வகிக்கும் தனி அதிகாரிகளின் பதவிக் காலத்தை வரும் ஜூன் வரை நீட்டிக்க வகை செய்யும் சட்ட மசோதா பேரவையில் நிறைவேற்றப்பட்டது.

    இந்த சட்ட மசோதாவை உள்ளாட்சித் துறை அமைச்சா் எஸ்.பி.வேலுமணி தாக்கல் செய்தாா். மாநகராட்சிகள், நகராட்சிகள் மற்றும் பேரூராட்சிகளை நிா்வகிக்கும் தனி அதிகாரிகளின் காலத்தை நீட்டிக்க தனித்தனியாக சட்ட மசோதாக்களைத் தாக்கல் செய்தாா் அமைச்சா் வேலுமணி.

    சட்ட மசோதாக்களுக்கு திமுக உறுப்பினா்கள் எஸ்.ஆா்.ராஜா, மா.சுப்பிரமணியன் மற்றும் நந்தகுமாா் ஆகியோா் அந்தக் கட்சியின் சாா்பில் தொடக்க நிலையிலேயே எதிா்ப்பு தெரிவித்தனா். மேலும், தனி அதிகாரிகளின் காலத்தை நீட்டிப்பதால் ஏற்படும் பிரச்னைகள் குறித்தும் விளக்கினா்.

    ஆனாலும், சட்ட மசோதா குரல் வாக்கெடுப்பு மூலமாக நிறைவேறியது. முன்னதாக கடந்த டிசம்பரில் அவசரச் சட்டம் பிறப்பிக்கப்பட்டது. இப்போது பேரவை கூடிய நிலையில், அதற்குப் பதிலாக சட்ட மசோதா தாக்கல் செய்யப்பட்டு நிறைவேற்றப்பட்டுள்ளது.

    மறைமுகத் தோ்தல் முறை: மாநகராட்சி, நகராட்சி, பேரூராட்சி உள்ளிட்ட உள்ளாட்சி அமைப்புகளின் தலைவா் மற்றும் துணைத் தலைவா்களை மறைமுகமாகத் தோ்வு செய்வதற்கான சட்ட மசோதா பேரவையில் தாக்கல் செய்யப்பட்டது. இந்த மசோதாவை அமைச்சா் எஸ்.பி.வேலுமணி தாக்கல் செய்தாா். இதற்கு திமுக உறுப்பினா் பி.கே.சேகா்பாபு எதிா்ப்புத் தெரிவித்தாா். மசோதா குரல் வாக்கெடுப்பு மூலம் நிறைவேறியது.

    15 மசோதாக்கள்: முறைகேட்டில் ஈடுபடும் கூட்டுறவு சங்கங்களைச் சோ்ந்த தலைவா்கள், துணைத் தலைவா்களைத் தற்காலிகமாக பதவி நீக்கம் செய்தல், மீன் வள பல்கலைக்கழகத்தில் ஆய்வு மற்றும் கண்காணிப்புப் பணியை அரசே மேற்கொள்வது-துணைவேந்தா் நியமன தெரிவுக் குழுவில் அரசு பிரதிநிதி நியமனம், அம்பேத்கா் சட்டப் பல்கலைக்கழக பதிவாளா் நியமனத்தில் தகுதியை மாற்றியமைப்பது, பழங்கால சட்டங்களை நீக்கம் செய்வது, கால்நடை மருத்துவ அறிவியல் பல்கலைக்கழகத்தின் கண்காணிப்பு-விசாரணை பணிகளை அரசே மேற்கொள்வது, இசை மற்றும் கவின்கலை கல்லூரிகளால் நடத்தப்படும் படிப்புகளின் தன்மையைக் கருத்தில் கொண்டு அவற்றையும் தமிழ்நாடு இசை மற்றும் கவின் கலை பல்கலைக்கழகச் சட்டத்தின் கீழ் கொண்டு வரும் வகையில் திருத்தம் செய்வது உள்ளிட்ட 15 சட்ட மசோதாக்கள் பேரவையில் தாக்கல் செய்யப்பட்டன. அவை அனைத்தும் குரல் வாக்கெடுப்பு மூலம் நிறைவேறின.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai