தில்லியில் இருந்து சென்னை வந்தடைந்த ராஜதானி அதிவிரைவு ரயிலில் பயணித்த 545 பேரை தனிமைப்படுத்தி, மருத்துவ சோதனைக்கு உட்படுத்தப்படவுள்ளனா். இதற்காக, சிறப்புப் பேருந்துகள் மூலமாக, ஹோட்டல்கள், முகாம்களுக்கு அழைத்து செல்லப்பட்டனா்.
தில்லியில் இருந்து திங்கள்கிழமை மாலை புறப்பட்ட ராஜதானி விரைவு ரயில் சென்னை சென்ட்ரல் ரயில்நிலையத்தை செவ்வாய்க்கிழமை இரவு 9 மணிக்கு வந்தடைந்தது. அதில் இறங்கி வந்த 545 பேரை ரயில்வே போலீஸாா், ஆா்.பி.எஃப் போலீஸாா் மற்றும் மாவட்ட நிா்வாக அதிகாரிகள், ஊழியா்கள் ஆகியோா் அடங்கிய குழுவினா் அழைத்து சென்று அவா்களின் விவரங்களை சரிபாா்த்தனா். தொடா்ந்து, அவா்களை தங்க வைத்து பரிசோதனை செய்வதற்காக ஹோட்டல்களுக்கும், முகாம்களுக்கும் அழைத்து சென்றனா்.
இலவச தங்கும் விடுதியை கோரி 495 போ் பதிவு செய்திருந்தனா். இவா்கள் தனியாா் கல்லூரிக்கு அழைத்து செல்லப்பட்டனா். தங்கும் விடுதிக்காக பணம் செலுத்தி 50 போ் பதிவு செய்திருந்தனா். இவா்கள் எழும்பூா், கீழ்ப்பாக்கத்தில் உள்ள நட்சத்திர ஹோட்டல்களுக்கு அனுப்பி வைக்கப்பட்டனா். இவா்களுக்கு புதன்கிழமை காலை பிசிஆா் (கரோனா) பரிசோதனை மேற்கொள்ளப்படவுள்ளது. முடிவுகள் வெளியாகும் வரை அங்கு தங்கியிருக்க வேண்டும். அதன்பிறகு, கரோனா நோய்த்தொற்று உறுதி செய்யப்பட்டவா்கள் மருத்துவமனைக்கும், நோய்த்தொற்று இல்லாதவா்கள் வீட்டுக்கும் அனுப்பி வைக்கப்படுவாா்கள். வீட்டுக்கு செல்லும் நபா்கள் தங்களை 14 நாள்களுக்கு தனிமைப்படுத்திக் கொள்ள அறிவுறுத்தப்பட்டுள்ளது.
பிகாருக்கு சிறப்பு ரயில்: இதற்கிடையில், வெளிமாநில தொழிலாளா்களுக்காக, சென்னை சென்ட்ரலில் இருந்து பிகாா் மாநிலம் தா்பங்காவுக்கு ஒரு சிறப்பு ரயில் செவ்வாய்க்கிழமை மாலை 6 மணிக்கு இயக்கப்பட்டது. இந்த ரயிலில் 1,620 தொழிலாளா்கள் ஏற்றி, அனுப்பி வைக்கப்பட்டனா்.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
