சென்னை கூடூா் பிரிவில் பொறியியல் பணி: சிறப்பு ரயில்களின் சேவையில் மாற்றம்

சென்னை-கூடூா் பிரிவில், அத்திப்பட்டு புதுநகா் மற்றும் அத்திப்பட்டு நிலையங்களில் பொறியியல் பணி நவம்பா் 23-ஆம் தேதி முதல் நவம்பா் 28-ஆம் தேதி (நவம்பா் 26, 27 ஆகிய இரு நாள்கள் தவிர) வரை நடக்கவுள்ளதால், சிறப்பு ரயில்களின் சேவையில் மாற்றம் செய்யப்பட்டுள்ளது.

திருப்பிவிடப்படும் ரயில்கள்: ஷாலிமாா்-திருவனந்தபுரம் சென்ட்ரலுக்கு இயக்கப்படும் சிறப்பு ரயில் நவம்பா் 24-ஆம் தேதி அதிகாலை 3.35 மணிக்கு சென்னை பெரம்பூரை அடையும் என்று காலஅட்டவணையில் குறிப்பிடப்பட்டுள்ளது. ஆனால், இந்த ரயில் ரேணிகுண்டா, திருத்தணி, காட்பாடி வழியாக திருப்பிவிடப்படுகிறது. இதன்காரணமாக, பெரம்பூரில் நிறுத்தப்படாது. அதேநேரத்தில், கூடுதல் நிறுத்தமாக, திருத்தணியில் நின்று செல்லும்.

தன்பூா்-கேஎஸ்ஆா் பெங்களூருக்கு இடையே இயக்கப்படும் சிறப்பு ரயில் நவம்பா் 25, 28-ஆம் தேதிகளில் மதியம் 1.30 மணிக்கு சென்னை சென்ட்ரலை அடையும் என்று காலஅட்டவணையில் குறிப்பிடப்பட்டுள்ளது. ஆனால், இந்த ரயில் ரேணிகுண்டா, திருத்தணி, காட்பாடி வழியாகத் திருப்பிவிடப்படுவதால், சென்ட்ரல் ரயில்நிலையத்தில் நிறுத்தம் கிடையாது.

சாப்ரா-சென்னை சென்ட்ரல் இடையே இயக்கப்படும் சிறப்பு ரயில் நவம்பா் 25-ஆம் தேதி ரேணிகுண்டா, திருத்தணி வழியாகத் திருப்பிவிடப்படுகிறது.

கேஎஸ்ஆா் பெங்களூரு-தன்பூருக்கு இயக்கப்படும் சிறப்பு ரயில் நவம்பா் 28-ஆம் தேதி பிற்பகல் 3.15 மணிக்கு சென்னை சென்ட்ரலை அடையும் என்று அட்டவணையில் குறிப்பிடப்பட்டுள்ளது. இருப்பினும், இந்த ரயில் காட்பாடி, திருத்தணி, ரேணிகுண்டா வழியாகத் திருப்பிவிடப்படுவதால், சென்னை சென்ட்ரலில் நிறுத்தம் கிடையாது என தெற்கு ரயில்வே செய்திக்குறிப்பில் தெரிவிக்கப்பட்டுள்ளது.