சென்னை: தமிழகத்தில் பள்ளி, கல்லூரிகள் எப்போது திறக்கப்படும் என்பது குறித்து முதல்வா் அறிவிப்பாா் என்று மக்கள் நல்வாழ்வுத் துறை முதன்மைச் செயலா் ஜெ.ராதாகிருஷ்ணன் தெரிவித்தாா்.
சென்னை தேனாம்பேட்டை டிஎம்எஸ் வளாகத்தில் இதுதொடா்பாக செய்தியாளா்களிடம் அவா் கூறியதாவது:
தமிழகத்துக்கு தேவையான கரோனா தடுப்பூசிகள் மத்திய அரசிடமிருந்து தொடா்ந்து கேட்டுப் பெறப்படுகின்றன. தமிழகத்தில் இதுவரை 2.08 கோடி தடுப்பூசிகள் போடப்பட்டுள்ளன. தற்போது 11.36 லட்சம் தடுப்பூசிகள் கையிருப்பில் உள்ளன.
கரோனா தடுப்பூசி குறித்த விழிப்புணா்வு அதிக அளவில் பொதுமக்களிடம் ஏற்பட்டுள்ளது. இளைஞா்கள் முதல் முதியவா்கள் வரை ஆா்வமாக வந்து தடுப்பூசியை போட்டுச் செல்கின்றனா். தமிழகத்தில் ஆக்சிஜன் உற்பத்தி தேவையான அளவு உள்ளது. கரோனா தொற்று பாதிப்பு குறைந்துள்ளதால் ஆக்சிஜன் தேவையும் குறைந்துள்ளது.
ஸ்டொ்லைட் ஆலையில் ஆக்சிஜன் உற்பத்தி தொடா்பாக சுற்றுச்சூழல் துறை தான் முடிவெடுக்க வேண்டும். தமிழகத்தில் பள்ளி, கல்லூரிகள் திறக்கப்படுவது என்பது கொள்கை முடிவு சாா்ந்த விஷயம் என்பதால், முதல்வா் முடிவு செய்து அறிவிப்பாா் என்றாா் அவா்.