மருத்துவப் படிப்புகள்: ஓபிசி-க்கு 27% இடஒதுக்கீடு சரிதான்: சென்னை உயர்நீதிமன்றம்

மருத்துவப் படிப்புகளில் அகில இந்திய ஒதுக்கீட்டு இடங்களில் இதர பிற்படுத்தப்பட்ட வகுப்பினருக்கு 27 சதவீத இடஒதுக்கீடு சரிதான் என சென்னை உயர்நீதிமன்றம் தெரிவித்துள்ளது. 
மருத்துவப் படிப்புகள்: ஓபிசி-க்கு 27% இடஒதுக்கீடு சரிதான்: சென்னை உயர்நீதிமன்றம்
Published on
Updated on
2 min read

சென்னை: மருத்துவப் படிப்புகளில் அகில இந்திய ஒதுக்கீட்டு இடங்களில் இதர பிற்படுத்தப்பட்ட வகுப்பினருக்கு 27 சதவீத இடஒதுக்கீடு சரிதான் என சென்னை உயர்நீதிமன்றம் தெரிவித்துள்ளது.

இந்த ஒதுக்கீட்டில் நீதிமன்ற அவமதிப்பு ஏதும் இல்லை என தமிழக அரசு, திமுக உள்ளிட்ட கட்சிகள் தொடர்ந்த வழக்கில் உயர்நீதிமன்றம் புதன்கிழமை (ஆக.25) தெரிவித்தது.

வழக்கு என்ன?: மருத்துவ இளநிலை மற்றும் முதுநிலை படிப்புகளில் அகில இந்திய ஒதுக்கீட்டு இடங்களுக்கு, மாநில அரசுகள் இடங்கள் வழங்குகின்றன. அவ்வாறு வழங்கப்படும்  இடங்களில் இதர பிற்படுத்தப்பட்ட பிரிவு மாணவர்களுக்கு  தமிழகத்தில் வழங்கப்படும் 50 சதவீத இடங்களை வழங்க வேண்டும் என்று சென்னை உயர்நீதிமன்றத்தில் திமுக, அதிமுக,  பாமக, மதிமுக, திராவிடர் கழகம், மார்க்சிஸ்ட், இந்திய கம்யூனிஸ்ட், நாம் தமிழர் கட்சி ஆகிய கட்சிகள் வழக்குத்  தொடர்ந்தன. இதே கோரிக்கையுடன் தமிழக அரசும் வழக்கு தொடர்ந்தது. 

புதுச்சேரி மாநிலத்தில் 34 சதவீத இட ஒதுக்கீடு வழங்க வேண்டும் என்று அம்மாநில அரசு உள்பட 13 பேர்  தனித்தனியாக வழக்கு தொடர்ந்தனர்.  

மத்திய அரசு அமல்படுத்தவில்லை: இந்த வழக்குகளை விசாரித்த அப்போதைய தலைமை நீதிபதி ஏ.பி.சாஹி, நீதிபதி செந்தில்குமார் ராமமூர்த்தி, இட ஒதுக்கீடு வழங்குவது தொடர்பாக குழு அமைத்து முடிவு எடுக்குமாறு மத்திய அரசுக்கு உத்தரவிட்டனர். இதன்படி அமைக்கப்பட்ட குழு, 69 சதவீத இடஒதுக்கீட்டு முறையை பின்பற்ற மத்திய அரசுக்கு அறிக்கை கொடுத்தது. ஆனால், உச்சநீதிமன்றத்தில்  நிலுவையில் உள்ள வழக்குகளை காரணம் காட்டி, இந்த குழுவின் பரிந்துரையை மத்திய அரசு அமல்படுத்தவில்லை.

அவமதிப்பு வழக்கு:  இதையடுத்து சென்னை உயர்நீதிமன்றத்தில் திமுக தரப்பில் நீதிமன்ற அவமதிப்பு வழக்குத் தொடரப்பட்டது. இந்த வழக்கை தலைமை நீதிபதி சஞ்சீவ் பானர்ஜி, நீதிபதி பி.டி.ஆதிகேசவலு ஆகியோர் விசாரித்தனர்.

அப்போது திமுக தரப்பில் மூத்த வழக்குரைஞர் பி.வில்சன் ஆஜராகி, "இதர பிற்படுத்தப்பட்ட பிரிவினருக்கு 27 சதவீத இடஒதுக்கீட்டை மத்திய அரசு வழங்கியுள்ளது. இந்த இட ஒதுக்கீடு மத்திய அரசின் கல்வி நிறுவனங்களுக்கு மட்டுமே பொருந்தும். தமிழகத்தில் உள்ள மருத்துவக் கல்லூரிகளில் 69 சதவீத இடஒதுக்கீட்டின் அடிப்படையில் இதர பிற்படுத்தப்பட்ட வகுப்பினருக்கு 50 சதவீத இடஒதுக்கீடு வழங்க வேண்டும். நீண்ட சட்டப் போராட்டங்களுக்கு பின் கிடைத்த இடஒதுக்கீட்டை மத்திய அரசு பறிக்கக்கூடாது' என்று வாதிட்டார்.

மத்திய அரசு வழக்குரைஞர் வாதம்:  மத்திய அரசு தரப்பில் கூடுதல் சொலிசிட்டர் ஜெனரல் நட்ராஜ் ஆஜராகி, "சென்னை உயர்நீதிமன்றம் பிறப்பித்த உத்தரவின் அடிப்படையில் குழு அமைக்கப்பட்டு, அந்த பரிந்துரை ஏற்கப்பட்டு மருத்துவப் படிப்புகளில் அகில இந்திய ஒதுக்கீட்டுக்கான இடங்களில் இதர பிற்படுத்தப்பட்ட வகுப்பினருக்கு 27 சதவீத இட ஒதுக்கீட்டை மத்திய அரசு வழங்கியுள்ளது. இதனால், நீதிமன்ற அவமதிப்பு ஏதுமில்லை. அகில இந்திய ஒதுக்கீட்டு இடங்களில், பொருளாதார ரீதியில் பின்தங்கிய முன்னேறிய  வகுப்பினருக்கு 10 சதவீத  இடஒதுக்கீடு வழங்குவது தொடர்பாக அரசியல் சட்டத்தில் திருத்தம் கொண்டு வரப்பட்டுள்ளது. இதனால் இதர பிற்படுத்தப்பட்ட வகுப்பினருக்கு எந்த பாதிப்பும் இல்லை' என்று வாதிட்டார்.
இதற்கு கடும்  எதிர்ப்பு தெரிவித்த  மூத்த வழக்குரைஞர் பி.வில்சன், "மாநிலங்களுக்கு ஒப்படைக்கும் இடங்களில் பொருளாதாரத்தில் பின்தங்கிய முன்னேறிய வகுப்பினர்களுக்கு 10 சதவீதம் வழங்கக் கூடாது. அவ்வாறு வழங்கினால், அது சட்டவிரோதமாகும்' என்று வாதிட்டார்.

இரு தரப்பு வாதங்களையும் கேட்டறிந்த நீதிபதிகள் பிறப்பித்த உத்தரவு: அகில இந்திய ஒதுக்கீட்டு இடங்களுக்கு நாடு முழுவதும் ஒரே மாதிரியாக இடஒதுக்கீடு வழங்கப்பட வேண்டும். ஒவ்வொரு மாநிலத்துக்கும் ஒவ்வொரு மாதிரியாக இடஒதுக்கீட்டைப் பின்பற்ற முடியாது.

எனவே, மருத்துவப் படிப்புகளில் அகில இந்திய ஒதுக்கீட்டு இடங்களில் இதர பிற்படுத்தப்பட்ட வகுப்பினருக்கு 27 சதவீத இடஒதுக்கீடு என்பது அனுமதிக்கத்தக்கது. 

10  சதவீத இட ஒதுக்கீட்டை...: அதே வேளையில், பொருளாதார ரீதியில் பின்தங்கிய முன்னேறிய வகுப்பினருக்கான 10 சதவீத இடஒதுக்கீடு என்பது, மொத்த இடஒதுக்கீட்டு அளவான 50 சதவீதத்துக்கும் அதிகமாக உள்ளதால், உச்சநீதிமன்ற ஒப்புதல் இல்லாமல் அந்த இடஒதுக்கீட்டை பின்பற்ற முடியாது.

தினமணி செய்திமடலைப் பெற... Newsletter

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads

உடனுக்குடன் செய்திகளை அறிய தினமணி App பதிவிறக்கம் செய்யவும்.

Related Stories

No stories found.
X
Dinamani
www.dinamani.com