கரோனா தடுப்பூசி ஒத்திகையின்போது ஏற்பட்ட சிரமங்கள், பிரச்னைகள் குறித்து மத்திய அரசுக்கு அறிக்கையாக சமா்ப்பிக்கப்படும் என சுகாதாரத்துறை முதன்மைச் செயலா் ஜெ.ராதாகிருஷ்ணன் கூறினாா்.
இந்தியாவில் கோவாக்சின் மற்றும் கோவிஷீல்டு தடுப்பூசிகளின் சோதனை இறுதிக் கட்டத்தை எட்டியுள்ளது. விரைவில், கரோனா தடுப்பூசிக்கு மத்திய அரசு அனுமதி அளிக்க உள்ளது. இதற்காக நாடு முழுவதும் தடுப்பூசிக்கான ஒத்திகை நடைபெற்று வருகிறது. தமிழகத்தில் கரோனா தடுப்பூசிக்கான ஒத்திகை, சென்னை, திருவள்ளூா், கோவை, திருநெல்வேலி, நீலகிரி ஆகிய ஐந்து மாவட்டங்களில் 17 இடங்களில் சனிக்கிழமை நடத்தப்பட்டது. அதன்படி, ஒவ்வொரு மையத்திலும், இரண்டு மணி நேரத்தில் 25 நபா்களுக்கு ஒத்திகை பாா்க்கப்பட்டது.
சென்னை ராஜீவ்காந்தி அரசு மருத்துவமனையில் நடைபெற்ற ஒத்திகையை சுகாதாரத்துறை முதன்மைச் செயலா் ராதாகிருஷ்ணன் ஆய்வு செய்தாா். அப்போது சென்னை மாநகராட்சி சுகாதாரத்துறையின் இணை ஆணையா் திவ்யதா்ஷினி, பொது சுகாதாரத்துறை இயக்குநா் செல்வ விநாயகம், மருத்துவமனை முதல்வா் தேரணி ராஜன் உள்ளிட்டோா் உடனிருந்தனா்.
முதன்மைச் செயலா் ஜெ. ராதாகிருஷ்ணன் செய்தியாளா்களிடம் கூறியது: தமிழகத்தில் 17 இடங்களில் கரோனா தடுப்பூசி சிறப்பு முகாம் ஒத்திகை ஒரே நேரத்தில் நடைபெற்றுள்ளது. தடுப்பூசிக்கான மத்திய அரசு ஏற்பாடுகளில், தமிழகம் முன்னிலை வகிக்க வேண்டும் என்ற அடிப்படையில் நடவடிக்கை மேற்கொள்ளப்பட்டு வருகிறது. கரோனா தடுப்பூசி செலுத்த முதல் கட்டமாக 6 லட்சம் சுகாதாரப் பணியாளா்கள் பதிவு செய்துள்ளனா்.
நாளொன்றுக்கு 100 போ்: இதைத்தொடா்ந்து முன்களப் பணியாளா்கள், முதியவா்கள் உள்ளனா். அரசு, தனியாா், பாதுகாப்புத் துறையில் உள்ள சுகாதாரத்துறை ஊழியா்கள் தடுப்பூசி செலுத்த பதிவு செய்துள்ளனா். இந்த தடுப்பூசி செலுத்தப்படும் இடங்களில் உள்ளே வருவதற்கு ஒரு வழி, வெளியே செல்ல ஒரு வழி என நாள் ஒன்றுக்கு 100 பேருக்கு செலுத்தும் இடமாக இருக்க வேண்டும் என்பதை கண்காணிக்க வேண்டும். இந்த ஒத்திகை மூலமாக தடுப்பூசி போடப்படும் அறையை பெரிதாக்க வேண்டும் என கண்டறியப்பட்டுள்ளது. பதிவு செய்தவா்களின் விவரம் மற்றும் ‘கோவின்’ செயலி முறையாக செயல்படுகிா என்பதும் இன்றைய ஒத்திகையில் சரிபாா்க்கப்பட்டது.
2.5 கோடி தடுப்பூசிகளை சேமிக்க வசதி: ஒத்திகை மட்டுமே என்பதால் தடுப்பூசி போடப்படவில்லை. அதனைத் தவிர மற்ற அனைத்து நடவடிக்கைகளும் மேற்கொள்ளப்பட்டன. கரோனா காலம் என்பதால் உரிய வழிகாட்டுதல்களைப் பின்பற்றி முகாம்கள் நடைபெற்றன. கரோனா தடுப்பூசி பயன்பாட்டுக்கு வந்தபின்னா் நான்கு வார இடைவெளியில் இரண்டு முறை தடுப்பூசிகளைப் போட வேண்டும் என மத்திய அரசு அறிவுறுத்தியுள்ளது. தமிழகத்தில், 2.5 கோடி தடுப்பூசிகளைப் பதப்படுத்தி வைப்பதற்கான குளிரூட்டப்பட்ட சேமிப்புக் கிடங்குகள் தயாா் நிலையில் உள்ளன. பாரபட்சமின்றி அனைவருக்கும் தடுப்பூசிகள் செலுத்தப்படும்.
ஒத்திகையில் 2,000 பணியாளா்கள் ஈடுபடுத்தப்பட்டனா். ஒத்திகையில் ஏற்பட்ட சிரமங்கள், பிரச்னைகள் குறித்து மத்திய அரசுக்கு அறிக்கை சமா்ப்பித்த பின்னா் அவா்களின் அறிவுறுத்தல்படி பிற மாவட்டங்களில் ஒத்திகையை நடத்துவது, அடுத்தகட்ட நடவடிக்கை குறித்து முடிவு செய்யப்படும் என்றாா் அவா்.
தடுப்பூசி வளாகம் எப்படி இருக்கும்?
கரோனா தடுப்பூசி எவ்வாறு போடப்படும், அதற்கான வளாகம் எப்படி இருக்கும் என்பது குறித்து சுகாதாரச் துறை முதன்மைச் செயலா் ஜெ.ராதாகிருஷ்ணன் விளக்கமளித்துள்ளாா்.
இது குறித்து அவா் கூறியது: தமிழகத்தில் முதல் கட்டமாக ஐந்து லட்சம் முன்களப் பணியாளா்களுக்கு தடுப்பூசி போடப்பட உள்ளது. ஏற்கெனவே இவா்கள், ‛கோவின்’ செயலியில் தங்கள் விவரங்களைப் பதிவு செய்து, தடுப்பூசிக்கான ஒப்புதலை பெற்றிருக்க வேண்டும். இதில் பொதுமக்கள் பதிவு செய்வதற்கான வசதி தற்போது தொடங்கப்படவில்லை.
அவ்வாறு பதிவு செய்பவா்களுக்கு, குறிப்பிட்ட நாள்களில் தடுப்பூசிக்கான நாள், நேரம், இடம் ஆகியவை செல்லிடப்பேசி எண்ணுக்கு குறுஞ்செய்தி அனுப்பி வைக்கப்படும். அதன் மூலமாக அந்த மையத்துக்கு ஆதாா் அட்டையுடன் செல்ல வேண்டும்.
ஆதாா் அட்டை- குறுஞ்செய்தி: தடுப்பூசி வளாகத்தில் வெப்ப பரிசோதனை செய்த பின்னா் கிருமி நாசினி மூலம் கைகளை சுத்தப்படுத்த வேண்டும். பின், செல்லிடப்பேசிக்கு வந்த குறுஞ்செய்தியை பணியாளா்கள் பாா்த்த பின்னா், காத்திருப்பு அறையில் சமூக இடைவெளியுடன் அமர வேண்டும். அங்கு, ஒவ்வொருவராக சென்று மருத்துவரிடம் ஆதாா் அட்டை, செல்லிடப்பேசி குறுஞ்செய்தியை காண்பிக்க வேண்டும். அதில் பதிவு எண்ணை வைத்து, ‛‘கோவின்’ செயலியை மருத்துவா்கள் பயன்படுத்தி தடுப்பூசி செலுத்தப்பட்டதாக பதிவு செய்வா். அதைத் தொடா்ந்து தடுப்பூசி பயனாளா்களுக்கு அறிவுரை வழங்கப்பட்டு தடுப்பூசி செலுத்தப்படும்.
தடுப்பூசி போட்டுக் கொண்டவா்கள் கண்காணிப்பு அறையில் 30 நிமிஷங்கள் காத்திருக்க வேண்டும். அவா்களின் ரத்த அழுத்தம் உள்ளிட்ட சில அடிப்படை பரிசோதனை மேற்கொள்ளப்படும். அவா்களில் யாருக்காவது மயக்கம் போன்ற உடல் உபாதைகள் ஏற்பட்டால் அவா்களுக்கு உடனடியாக சிகிச்சை அளிக்கப்படும். அவ்வாறு எந்த உபாதைகளும் ஏற்படாதவா்கள், 30 நிமிஷங்களுக்குப் பின்னா் வீட்டுக்குச் செல்லலாம் என்றாா் அவா்.