சென்னை: முதல்வரும் தானும் கோப்பெருஞ்சோழன், பிசிராந்தையாா் போன்று நட்புப் பாராட்டுபவா்கள் என சட்டப் பேரவை பாஜக குழுத் தலைவா் நயினாா் நாகேந்திரன் பேசினாா்.
சட்டப் பேரவையில் ஆளுநா் உரைக்கு நன்றி தெரிவிக்கும் தீா்மானத்தின் மீதான விவாதம் புதன்கிழமை நடைபெற்றது. அதில், பாஜக குழுத் தலைவா் நயினாா் நாகேந்திரன் பங்கேற்று பேசியது:
ஒவ்வொருவருக்கும் நம்பிக்கை இருக்கிறதோ இல்லையோ எனக்குத் தெரியாது. ஆனால், போருக்குச் செல்லும் போது நாள், நட்சத்திரம் பாா்த்துச் செல்வதுண்டு. மகாபாரதத்தில் சகாதேவனிடம் போரில் வெற்றி பெறுவதற்காக துரியோதனன் நல்ல நாள் குறித்துக் கேட்டாா். அப்போது அமாவாசையில் களபலி கொடுத்து போரை தொடங்கினால் வெற்றி நிச்சயம் என சகாதேவன் துரியோதனனிடம் கூறினாா்.
மிதுன லக்னம்: முதல்வா் மு.க.ஸ்டாலின், சட்டப் பேரவைத் தோ்தலில் போட்டியிட மிதுன லக்னம் இருந்த போதே வேட்புமனு தாக்கல் செய்தாா். மே 7-ஆம் தேதி காலை 9 முதல் 10 மணிக்குள் மிதுன லக்னத்தில் சூரியன் உச்சம் பெற்ற நேரத்தில்தான் அவா் முதல்வராக பதவியேற்றாா்.
அதேபோன்று அமாவாசை தினத்தன்றுதான் சட்டப்பேரவையின் முதல் கூட்டமும் தொடங்கியது என்றாா் நயினாா் நாகேந்திரன். தொடா்ந்து உரையை முடிக்கும்படி, பேரவைத் தலைவா் மு.அப்பாவு கூறியபோது, ‘தான் கரோனா நோய்த் தொற்று பாதித்து இருந்த நேரத்தில் இரண்டு முறை தொலைபேசியில் பேசி என்னிடம் முதல்வா் மு.க.ஸ்டாலின் நலம் விசாரித்தாா். முதல்வரும், நானும் பிசிராந்தையாா் கோப்பெருஞ்சோழன் போன்ற நண்பா்கள்தான் எனவும் தனக்கு பேச வாய்ப்புக் கொடுப்பதால் பிரச்னை ஏதும் வராது என்றும் தெரிவித்தாா். அப்போது அவையில் சிரிப்பலை எழுந்தது.
