பெண்களுக்கு எதிரான குற்றங்களைக் கையாள்வதில் கூடுதல் பொறுப்புணா்வுடன் செயல்பட வேண்டும் என தமிழக காவல் துறைக்கு குடியரசு துணைத் தலைவா் எம்.வெங்கையா நாயுடு அறிவுரை வழங்கினாா்.
தமிழக காவல் துறைக்கு இந்திய குடியரசுத் தலைவரின் கொடி வழங்கும் விழா சென்னை எழும்பூரில் ஞாயிற்றுக்கிழமை நடைபெற்றது. தமிழக காவல் துறை தலைமை இயக்குநா் சி.சைலேந்திரபாபு தலைமை வகித்தாா். முதல்வா் மு.க.ஸ்டாலின் முன்னிலை வகித்தாா்.
சிறப்பு விருந்தினராகப் பங்கேற்ற குடியரசு துணைத் தலைவா் எம்.வெங்கையா நாயுடு, இந்திய குடியரசுத் தலைவரின் கொடி, சின்னத்தை முதல்வா் மு.க.ஸ்டாலினிடம் வழங்கினாா். அவற்றை மு.க.ஸ்டாலின் பெற்று, டிஜிபி சைலேந்திரபாபுவிடம் வழங்கினாா்.
மேலும், விழாவின் சிறப்பைப் போற்றும் வகையில் சிறப்பு அஞ்சல் உறையையும் வெங்கையா நாயுடு வெளியிட்டாா்.
தமிழக காவல் துறைக்கு அங்கீகாரம்: விழாவில் வெங்கையா நாயுடு பேசியதாவது: தமிழக காவல் துறை வரலாற்றில், இந்த நாள் மிகுந்த சிறப்புக்குரியதாகும். தமிழக காவல் துறையின் பாராட்டத்தக்க பணி மற்றும் பல்வேறு சாதனைகளை அங்கீகரிக்கும் விதமாக இந்த விருது வழங்கப்பட்டுள்ளது. தமிழக காவல் துறையில் பணியாற்றும் அனைவரது அா்ப்பணிப்பு, தொழில் வல்லமை, தன்னலமற்ற சேவை, தியாகத்துக்கு கிடைத்த மிகப் பெரிய அங்கீகாரம்.
1859-ஆம் ஆண்டு மெட்ராஸ் காவல் துறை என்ற பெயரில் தொடங்கப்பட்ட காலத்திலிருந்தே, நாட்டில் உள்ள மிகச் சிறந்த காவல் படைகளில் ஒன்றாக தமிழக காவல் துறை திகழ்கிறது. நெருக்கடியான காலகட்டங்களில்கூட சாதாரண, ஒடுக்கப்பட்ட, சமுதாயத்தின் நலிந்த பிரிவினருக்கு பாதுகாப்பு வழங்க பாடுபட்டு வருவதுடன், மாநிலத்தில் சமூக நல்லிணக்கத்தை சிறப்பாக பேணவும், பொது அமைதியைப் பராமரிக்கவும் உதவுகிறது.
கூடுதல் பொறுப்புணா்வு: நாட்டிலேயே, அதிக அளவிலான மகளிா் காவல் நிலையங்களையும், அதிக பெண் காவலா்களையும் கொண்ட இரண்டாவது மாநிலமாகவும் தமிழகம் இருப்பது மகிழ்ச்சிக்குரியது. நாட்டில், பெண் கமாண்டோ படைப் பிரிவை அமைத்த முதல் மாநிலம் என்ற சிறப்பையும் தமிழகம் பெற்றுள்ளது. பாலின சமத்துவம் மற்றும் பெண்கள் அனைவருக்கும் சம உரிமை வழங்குவது என்ற நமது இலக்கை நோக்கிய பயணத்தின் இந்தச் சாதனைகள் பாராட்டத்தக்கவை.
மக்கள்தொகையில் சமபாதி அளவுக்கு பெண்கள் உள்ளபோதிலும், பல்வேறு துறைகளிலும் அவா்களுக்கு சம வாய்ப்பு வழங்குவதில் நாம் இன்னும் பெருமளவு பணியாற்ற வேண்டியுள்ளது. பெண்களுக்கு உகந்த சூழல், பாதுகாப்பை உருவாக்குவது, அவா்களது வளா்ச்சி மற்றும் அவா்களது முழுத் திறனை அடைய உதவும். எனவே, பெண்களுக்கு எதிரான குற்றங்களைக் கையாள்வதில், கூடுதல் பொறுப்புணா்வுடன் பணியாற்றுமாறு காவல் துறையினரை வலியுறுத்துகிறேன்.
காவல் துறை பங்களிப்பு: இணைய குற்றச் சம்பவங்களின் எண்ணிக்கை வெகுவாக அதிகரித்து வருவதும், ஆன்லைன் மோசடி, எல்லை தாண்டிய குற்றங்கள் போன்ற தற்கால குற்றங்கள் அதிகரித்து வருவதும் கவலையளிக்கிறது. இதுபோன்ற, 21-ஆம் நூற்றாண்டின் குற்றங்களை திறம்பட்ட முறையில், விரைவாக எதிா்கொள்ள நமது காவல் படைகள் தேவையான பயிற்சிகளையும், உரிய வசதிகளையும் பெற்றிருப்பது அவசியமாகிறது.
நமது கலாசார பாரம்பரியமிக்க, நாகரிக நற்பண்புகளைப் பாதுகாக்கத் தேவையான அனைத்து முயற்சிகளையும் மேற்கொள்ள வேண்டும். முன்னோா்கள் காலத்திலிருந்தே, கலாசார செழுமை, வளத்தை தமிழகம் பெருமிதத்துடன் போற்றி வரும் நிலையில், எதிா்காலத் தலைமுறையினருக்காக நாம் அதைப் பாதுகாக்க வேண்டும்.
காவல் துறையினரின் மன அழுத்தத்தைப் போக்கவும், மதுப் பழக்கம் மற்றும் தற்கொலைகளைத் தடுக்கவும், காவலா் நலத் திட்டங்களைத் தொடங்கியிருக்கும் நாட்டின் ஒரே மாநிலமாக தமிழகம் திகழ்கிறது. இந்தியாவின் மிகவும் வளமான மற்றும் தொழில்மயமான மாநிலங்களில் ஒன்றாகவும் தமிழகம் உள்ளது.
வேகமாக மாறிவரும் சமூக-பொருளாதார சூழலில், காவல் துறையினரின் பணி முக்கியத்துவம் வாய்ந்ததாகும். மாநிலத்தின் பொருளாதார வளா்ச்சிக்கு பின்னணியாக உள்ள காரணங்களில், பொது அமைதி மற்றும் சமூக நல்லிணக்கத்தைப் பராமரிப்பதில் மாநில காவல் துறையின் பங்களிப்பும் மிக முக்கியமானதாகும். புதிய முதலீடுகளை ஈா்க்கவும், மாநிலத்தின் வளா்ச்சி, மேம்பாட்டுக்கும் பொது அமைதியைப் பராமரிப்பது அவசியம். மாநிலம் முழுவதும் அமைதியை நிலைநாட்டி, பொருளாதார வளா்ச்சி மற்றும் வளமைக்கு உகந்த சூழலை உருவாக்கி வருவதற்காக, தமிழக காவல் துறையில் பணியாற்றும் அனைவருக்கும் வாழ்த்துகள்-பாராட்டுகள் என்றாா் அவா்.
பெட்டிச் செய்தி....
தமிழக மக்களின் அன்பு...
தமிழக மக்கள் தன் மீது அளவுகடந்த அன்பு வைத்திருப்பதாக குடியரசு துணைத் தலைவா் வெங்கையா நாயுடு கூறினாா்.
நிகழ்ச்சியில் பேசிய அவா், இந்தியாவின் குடியரசு துணைத் தலைவா் என்ற முறையில் சென்னைக்கு நான் வருவது இதுவே கடைசிப் பயணம். இருப்பினும், தமிழக மக்களின் அளவு கடந்த அன்பும், உபசரிப்பும் என்னை இங்கு அழைத்துக்கொண்டே இருக்கும் என்று நெகிழ்ச்சியுடன் குறிப்பிட்டாா்.