கல்வித் தொலைக் காட்சியில் ‘எண்ணும் எழுத்தும்’ வகுப்பு: ஜூன் 27 முதல் காணலாம்

‘எண்ணும் எழுத்தும்’ திட்ட மாதிரி வகுப்புகள் கல்வி தொலைக்காட்சியில் ஜூன் 27-ஆம் தேதி முதல் ஒளிபரப்பப்படும் என்று பள்ளிக்கல்வித்துறை அறிவித்துள்ளது.

இது குறித்து பள்ளிக்கல்வித் துறையின்கீழ் இயங்கும் மாநில கல்வியியல் ஆராய்ச்சி மற்றும் பயிற்சி நிறுவனம் (எஸ்சிஇஆா்டி) சாா்பில், மாவட்ட முதன்மைக் கல்வி அதிகாரிகளுக்கு அனுப்பப்பட்டுள்ள சுற்றறிக்கை: தமிழகத்தில் 2025-ஆம் ஆண்டுக்குள் 8 வயதுக்குட்பட்ட பள்ளி மாணவா்கள் அடிப்படை கணிதத் திறனுடன் பிழையின்றி எழுதுவதை, படிப்பதை உறுதி செய்ய ‘எண்ணும், எழுத்தும்’ திட்டம் அமல்படுத்தப்பட்டுள்ளது.

இதற்கான வழிகாட்டு நெறிமுறைகள் தற்போது வழங்கப்படுகின்றன. அதன்படி, எண்ணும் எழுத்தும் திட்ட மாதிரி வகுப்புகள் ஜூன் 27-ஆம் தேதி முதல் கல்வித் தொலைக்காட்சியில் வாரந்தோறும் திங்கள், புதன், வெள்ளிக்கிழமைகளில் இரவு 8.30 மணிக்கு ஒளிபரப்பு செய்யப்படும். மேலும், வழிகாட்டுதல்களை பின்பற்றி ‘எண்ணும் எழுத்தும்’ திட்டம் முறையாக செயல்படுத்தப்படுவதை மாவட்ட முதன்மைக்கல்வி அதிகாரிகள் உறுதிசெய்ய வேண்டும் என அதில் கூறப்பட்டுள்ளது.