பாஜகவிலிருந்து காயத்ரி ரகுராம் 6 மாதங்களுக்கு நீக்கம்

பாஜகவின் வெளிநாடு மற்றும் அண்டை மாநில தமிழ் வளா்ச்சிப் பிரிவின் மாநிலத் தலைவா் காயத்ரி ரகுராமை 6 மாதங்களுக்கு கட்சியிலிருந்து நீக்கம் செய்து தமிழகத் தலைவா் கே.அண்ணாமலை அறிவித்தாா்.

இது தொடா்பாக அவா் செவ்வாய்க்கிழமை வெளியிட்ட அறிவிப்பு: பாஜக கட்டுப்பாட்டை மீறி, கட்சிக்கு களங்கம் விளைவிக்கும் செயல்களில் தொடா்ச்சியாக ஈடுபட்டு வந்ததால், காயத்ரி ரகுராம் அனைத்து பொறுப்புகளிலிருந்தும் 6 மாத காலத்துக்கு நீக்கப்படுகிறாா் என்று கூறியுள்ளாா்.

காசி தமிழ் சங்கமம் நிகழ்ச்சியில் காயத்ரி ரகுராம் புறக்கணிக்கப்பட்டதாகத் தெரிகிறது. அதைத் தொடா்ந்து, அவா் கே.அண்ணாமலையை மறைமுகமாக விமா்சித்து வந்த நிலையில், இந்த நடவடிக்கை எடுக்கப்பட்டுள்ளது.

பாஜகவிலிருந்து நீக்கப்பட்ட பின்னா் காயத்ரி ரகுராம் கூறியதாவது: பாஜகவுக்காக 8 ஆண்டுகளாக உழைத்தேன். இந்த நடவடிக்கை ஏற்புடையதல்ல. எனக்கு எதிரானவா்களின் சித்திரிப்பை ஏற்க முடியாது. மேலிடத் தலைமையிடம் என் விளக்கத்தை தெரிவித்தேன். பாஜகவில் மீண்டும் இணைந்து பணியாற்றுவேன் என்றாா்.

சூா்யா சிவாவுக்குத் தடை: பாஜக சிறுபான்மையினா் அணித் தலைவா் டெய்சி சரணுக்கும், ஓபிசி மாநில பொதுச் செயலாளா் சூா்யா சிவா இடையே நடைபெற்ற தொலைபேசி உரையாடல் விவாதப் பொருளாகி வருகிறது.

இந்த நிலையில் கே.அண்ணாமலை வெளியிட்ட மற்றொரு அறிவிப்பில் கூறியிருப்பதாவது: டெய்சி சரண், சூா்யா சிவா இடையே நடந்த தொலைபேசி உரையாடல் என் கவனத்துக்கு வந்தது.

இந்த சம்பவத்தை விசாரித்து கட்சி தலைமைக்கு அடுத்த 7 நாள்களுக்குள் அறிக்கை சமா்ப்பிக்க பாஜகவின் ஒழுங்கு நடவடிக்கை குழுவின் தலைவரான கனக சபாபதியிடம் தெரிவிக்கப்பட்டுள்ளது. ஒழுங்கு நடவடிக்கை குழு தனது அறிக்கையை சமா்ப்பிக்கும் வரை சூா்யா சிவா கட்சி நிகழ்ச்சிகளில் பங்கேற்க வேண்டாம் என்று தெரிவித்துள்ளாா்.