இனி வரும் தேர்வுகள் தமிழில் நடத்தப்படும்: டிஎன்பிஎஸ்சி தலைவர் கா. பாலச்சந்திரன்

இனி வரக்கூடிய காலங்களில் தமிழில் தேர்வு நடத்தப்படும் என்றார் தமிழ்நாடு அரசுப் பணியாளர் தேர்வாணையத் தலைவர் கா. பாலச்சந்திரன்.
ஒருங்கிணைந்த புள்ளியியல் சார்நிலைப் பணியிடங்களுக்கான தேர்வை, மாநிலத்தின் 9 மாவட்டங்களில் அமைக்கப்பட்டிருந்த 79 மையங்களில் தமிழ்நாடு அரசுப் பணியாளர் தேர்வாணையம் செவ்வாய்க்கிழமை நடத்தியது.
தஞ்சாவூர் மகர்நோன்புசாவடியிலுள்ள தனியார் பள்ளியில் நடைபெற்ற இத்தேர்வைப் பார்வையிட்ட ஆணையத் தலைவர் கா. பாலச்சந்திரன், பின்னர் செய்தியாளர்களிடம் தெரிவித்தது:
இனி வரக்கூடிய காலங்களில் டிஎன்பிஎஸ்சி தேர்வுகள் தமிழில் நடத்தப்படும். தற்போது நடைபெறும் தேர்வு தொடர்பான அறிவிப்பு வெளியிட்டபோது, தமிழக அரசின் அறிவிப்பு வெளியாகாததால் வழக்கம்போல நடைபெறுகிறது.
அடுத்த மாதம் நடைபெறவுள்ள தேர்வில் இரு விதமான பணிகள் இருக்கும். குரூப் 4 தேர்வில் கொள் குறி வகை (அப்ஜக்டிவ் டைப்) வினாத்தாள் தமிழில் இருக்கும். மற்ற குரூப் 1, 2, 2ஏ ஆகிய தேர்வுகளில் விரிந்துரைக்கும் வகையிலான (டெஸ்கிரிப்டிவ்) வினாத்தாள் இருக்கும். இதில், தமிழில் கேட்கப்படும் கேள்விகளுக்கு 40-க்கும் அதிகமான மதிப்பெண்களை எடுத்தால் மட்டுமே, மற்ற கேள்விகளுக்கான பதில்கள் திருத்தப்படும்.
குரூப்-4 தேர்விலும் 40-க்கும் அதிகமான மதிப்பெண்களைப் பெற்றால்தான், தொடர்ந்து அவர்கள் எழுதிய அனைத்து விடைகளும் மதிப்பீடு செய்யப்படும். தமிழில் தேர்வர்கள் பெற்ற மதிப்பெண்களைத் தகுதி மதிப்பெண்களாக மட்டுமல்லாமல், எவ்வளவு மதிப்பெண்கள் பெறுகிறார்களோ அதையும் சேர்த்துக் கொள்ளும் வாய்ப்பைத் தேர்வாணையம் செய்கிறது.