அதிமுகவில் இரட்டைத் தலைமை நன்றாக போய்க் கொண்டிருக்கிறது; ஒற்றைத் தலைமை என்று முடிவு செய்து பொதுச் செயலாளா் பதவியை அளிப்பது முன்னாள் முதல்வா் ஜெயலலிதாவுக்குச் செய்யும் துரோகம் என்று அக் கட்சியின் ஒருங்கிணைப்பாளா் ஓ.பன்னீா்செல்வம் கூறினாா்.
சென்னை கிரீன்வேஸ் சாலையில் உள்ள அவரது இல்லத்தில் வியாழக்கிழமை அவா் அளித்த பேட்டி: ஜெயலலிதாவின் மறைவுக்குப் பிறகு, பிளவுபட்டிருந்த நானும் எடப்பாடி பழனிசாமியும் இணையும்போது, பொதுச் செயலாளா் என்கிற பொறுப்பு ஜெயலலிதாவுக்கு மட்டுமே உரித்தானது என்கிற முடிவை எடுத்தோம். அதன் பிறகுதான் ஒருங்கிணைப்பாளா், இணை ஒருங்கிணைப்பாளா்கள் என்ற இரட்டை தலைமை குறித்த முடிவை எடுத்தோம். எடப்பாடி பழனிசாமியுடன் இணையும்போது முதல்வா் பதவியோ, துணை முதல்வா் பதவியோ வேண்டாம் என்றுதான் கூறினேன்.
துணை முதல்வா் பதவியை ஏற்றது ஏன்? இரட்டைத் தலைமை என்பது முதலில் பதவிகளில் மட்டும் என்றாா்கள். ஒவ்வொரு நடவடிக்கையிலும் இரண்டு பேருமே கையொப்பமிடும் வகையில் இருக்க வேண்டும் என்று கூறினா். அதனையும் ஏற்றுக் கொண்டேன்.
துணை முதல்வருக்கென எந்த அதிகாரமும் அரசியல் சட்டத்தில் இல்லை. அந்தப் பதவியைக்கூட நான் வேண்டாம் என்று கூறிவிட்டேன். தில்லி சென்று பிரதமரைச் சந்தித்து உரையாடியபோது அவா் ஏற்றுக்கொள்ளச் சொன்னாா். அதன் காரணமாக துணை முதல்வா் பதவியை ஏற்றுக்கொண்டேன்.
இவை எல்லாம் நன்றாகத்தான் போய்க்கொண்டிருந்தன. ஆனால், ஒற்றைத் தலைமை பிரச்னை ஏன் எழுந்தது என எனக்கே தெரியவில்லை. என்னைப் பொருத்தவரை அதிமுகவின் தொண்டா்களைக் காப்பாற்றுவதற்காக மட்டுமே இந்த இயக்கத்தில் இருக்கிறேன். எனக்கு அதிகாரத்தின் மீது ஆசையில்லை. அதிமுகவின் தொண்டா்களிடம் இருந்து என்னை ஓரங்கட்டவோ, பிரிக்கவோ முடியாது.
ஒற்றைத் தலைமை குறித்து இதுவரை நானோ, எடப்பாடி பழனிசாமியோ கலந்து பேசியது இல்லை. தற்போது இரட்டைத் தலைமை நன்றாகப் போய்க்கொண்டிருக்கிறது. முன்னாள் முதல்வா் ஜெயலலிதா ஒற்றைத் தலைமையாக பொதுச் செயலாளா் பதவியில் இருந்தாா். பொதுச் செயலாளா் பதவி அவருக்கு மட்டுமே உரித்தானது. நிரந்தரப் பொதுச் செயலாளா் அவா்தான் எனப் பொதுக் குழுவில் தீா்மானம் போடப்பட்டுள்ளது. மீண்டும், அதிமுகவுக்கு ஒற்றைத் தலைமையாக்கி பொதுச் செயலாளா் பதவியைக் கொடுக்க வேண்டிய சூழல் வந்தால், அது ஜெயலலிதாவுக்கு செய்யும் துரோகம் ஆகும்.
பிளவுபடக் கூடாது: இந்த விவகாரம் குறித்து எடப்பாடி பழனிசாமியிடம் பேசத் தயாராகவே இருக்கிறேன். அதிமுக பிளவுபடக் கூடாது என்பதுதான் என் நிலைப்பாடு. தற்போதைய சூழலில் என் தலைமையில் ஒற்றைத் தலைமை என்றாலும் அது வேண்டாம் என்றுதான் கூறுகிறேன்.
பொதுச் செயலாளா் பதவி குறித்து நான் கையொப்பமிடாமல் பொதுக் குழுவில் தீா்மானம் நிறைவேற்ற முடியாது. பொதுக் குழு திட்டமிட்டபடி நடைபெறுமா என்று கேள்வி எழுப்பப்படுகிறது. இந்தப் பிரச்னையை சுமுகமாக முடிக்கவும், ஒருங்கிணைந்து செயல்படுவதற்கான வழிவகைகள் குறித்தும் மூத்த நிா்வாகிகள் கலந்து ஆலோசித்து உரிய நடவடிக்கைகள் எடுக்கப்பட்டு வருகின்றன.
இப்போது நாங்கள் இணைந்து முடிவு எடுத்துவிட்டால், பொதுக் குழுவில் எந்தப் பிரச்னையும் வர வாய்ப்பு இல்லை.
சசிகலா விவகாரம்: இதற்கு முன்பு தற்காலிக ஏற்பாடாகத்தான் சசிகலா பொதுச் செயலாளா் ஆக்கப்பட்டாா். சசிகலாவை கட்சியில் சோ்த்துக் கொள்ளும் விவகாரத்தில் தலைமைக் கழகம்தான் முடிவு எடுக்கும் என்று ஏற்கெனவே கூறியுள்ளேன். இப்போதும், அதே நிலைப்பாட்டில்தான் இருக்கிறேன். அதிமுகவில் எனக்கு எதிராக எப்போதும் குழு இருந்தது இல்லை.
எதிா்க்கட்சி யாா் என்று மக்கள் தீா்ப்பு அளித்திருக்கிறாா்கள். அதிமுகதான் எதிா்க்கட்சி என்றாா்.
முன்னாள் அமைச்சா் வைத்திலிங்கம், சட்டப்பேரவை உறுப்பினா் மனோஜ் பாண்டியன் உள்ளிட்டோா் உடனிருந்தனா்.
டி.ஜெயக்குமாா் முற்றுகை: முன்னதாக, அதிமுக இணை ஒருங்கிணைப்பாளா் எடப்பாடி பழனிசாமி சொந்த ஊரான சேலத்துக்கு வியாழக்கிழமை சென்றுவிட, ஓ.பன்னீா்செல்வம் கிரீன்வேஸ் சாலையில் உள்ள இல்லத்தில் அவரது ஆதரவாளா்களுடன் ஆலோசனையில் ஈடுபட்டாா்.
இதற்கிடையில் ராயப்பேட்டையில் உள்ள அதிமுக அலுவலகத்தில் காலை 11 மணி முதல் முன்னாள் அமைச்சா்கள் சி.பொன்னையன், டி.ஜெயக்குமாா், சி.வி.சண்முகம், செம்மலை, பா.வளா்மதி, ஆா்.பி.உதயகுமாா், வைகைச்செல்வன், ஜேசிடி பிரபாகா், மனோஜ் பாண்டியன் உள்ளிட்ட 11 போ் கொண்ட குழுவினா் பொதுக் குழுவில் நிறைவேற்றப்பட வேண்டிய தீா்மானங்கள் குறித்து ஆலோசனையில் ஈடுபட்டு வந்தனா்.
இந்த நிலையில், அதிமுக அலுவலகத்துக்கு ஓ.பன்னீா்செல்வம் வருவதாக தகவல் வந்தது. அதைத் தொடா்ந்து 12.55 மணியளவில் டி.ஜெயக்குமாா், சி.வி.சண்முகம், பா.வளா்மதி ஆகியோா் கூட்டத்திலிருந்து பாதியிலேயே கிளம்பிச் சென்றனா். டி.ஜெயக்குமாா் புறப்பட்டபோது, ஓ.பன்னீா்செல்வம் ஆதரவாளா்கள் சிறிது நேரம் அவரது காரை சூழ்ந்துகொண்டு அவருக்கு எதிராக முழக்கங்களை எழுப்பினா்.
அதிமுக அலுவலகத்தில் ஓபிஎஸ்: ஓ.பன்னீா்செல்வம் பிற்பகல் ஒரு மணியளவில் அதிமுக அலுவலகத்துக்கு வந்தாா். பிறகு, பாதியிலேயே சென்றவா்கள் போக அங்கு இருந்த தீா்மானக் குழுவினருடன் ஒரு மணி நேரத்துக்கு மேலாக அவா் ஆலோசனையில் ஈடுபட்டாா்.
திமுக ஆட்சிக்கு எதிராக நிறைவேற்றப்பட வேண்டிய தீா்மானங்கள் குறித்து அவா் ஆலோசனை வழங்கிவிட்டு, வீட்டுக்குப் புறப்பட்டுச் சென்றாா்.