தமிழகத்திலும் ஆட்சி அமைப்போம்: கே.அண்ணாமலை

சென்னை: நான்கு மாநிலங்களில் வெற்றியடைந்து ஆட்சியைப் பிடித்ததுபோல தமிழகத்திலும் ஆட்சியை ப் பிடிப்போம் என்று பாஜக மாநிலத் தலைவா் கே.அண்ணாமலை கூறினாா்.

உத்தர பிரதேசம், உத்தரகண்ட், கோவா, மணிப்பூா் மாநிலங்களின் பேரவை பொதுத் தோ்தலில் பாஜக வெற்றிபெற்று ஆட்சியமைக்க உள்ளது. தோ்தல் வெற்றியை தமிழக பாஜக தலைவா் கே.அண்ணாமலை தியாகராய நகரில் உள்ள கட்சி அலுவலகமான கமலாலயத்தில் நிா்வாகிகளுக்கு இனிப்புகள் வழங்கி வியாழக்கிழமை கொண்டாடினாா்.

பின்னா் செய்தியாளா்களிடம் அவா் கூறியது:

பாஜகவுக்கு மாற்று சக்தி எதுவும் இல்லை என்பது மீண்டும் ஐந்து மாநிலத் தோ்தலின் மூலம் தெரிய வந்துள்ளது. பிரதமா் மோடியுடன்தான் பயணிப்போம் என்று ஒருமித்த குரலில் மக்கள் தமது கருத்தைத் தெரிவித்துள்ளனா்.

33 ஆண்டுகளுக்குப் பிறகு உத்தர பிரதேசத்தில் ஆளும் கட்சியே மீண்டும் ஆட்சிக்கு வந்து வரலாறு படைத்துள்ளது. கரோனாவைக் கட்டுப்படுத்த பிரதமா் மோடி எடுத்த நடவடிக்கைகளுக்கு இந்த வெற்றி பரிசாக அமைந்துள்ளது.

உத்தரகண்ட் மாநிலத்தில் ஆட்சி அமைக்கப் போவதுபோல காங்கிரஸாா் கொண்டாடி வந்தனா். ஆனால் மக்கள் தீா்ப்பு பாஜகவுக்கு ஆதரவாகவே வந்துள்ளது.

மணிப்பூரில் 2012-இல் பாஜகவுக்கு எந்த இடமும் கிடைக்கவில்லை. 2017-இல் 21 இடங்களைப் பிடித்தோம். தற்போது தனிப் பெரும்பான்மையுடன் அந்த மாநிலத்தில் ஆட்சி அமைக்க உள்ளோம்.

மணிப்பூா் மாநிலத்தைப் பொருத்தவரை 52 சதவீதம் சிறுபான்மை சமூகத்தினா் ஆவா். அங்கு பாஜக ஆட்சி வந்துள்ளது என்றால் அது சரித்திர சாதனை. கோவாவிலும் கிறிஸ்தவா்களும், முஸ்லிம்களும் பாஜகவுக்கு ஆதரவளித்துள்ளனா். இது தமிழகத்திலும் நிகழும் என்பதில் எந்த வொரு மாற்றுக் கருத்தும் கிடையாது. அது 2024- ஆண்டிலா அல்லது 2026-ஆண்டிலா என்பது தெரியாது. ஏனெனில் தோ்தல் ஆணையம் ஒரே நாடு ஒரே தோ்தலுக்கு தயாராக இருப்பதாகக் கூறியுள்ளது. தமிழக பாஜகவும் தோ்தலுக்குத் தயாராக இருக்கிறது என்றாா்.