விபத்து இழப்பீடு வழங்காததால் இரு அரசுப் பேருந்துகள் ஜப்தி

விழுப்புரம் மாவட்டம், ஒலக்கூா் அருகே விபத்தில் காயமடைந்தவா்களுக்கு உரிய இழப்பீடு வழங்காததால், நீதிமன்ற உத்தரவுப்படி இரு அரசுப் பேருந்துகள் செவ்வாய்க்கிழமை ஜப்தி செய்யப்பட்டன.

பெரியதச்சூரைச் சோ்ந்த துரைக்கண்ணு மனைவி கஜவல்லி (58). இவா், தனது சகோதரா் சிவக்குமாரின் மகள் காயத்ரியை (7) பள்ளி விடுமுறைக்காக 23-4-2008 அன்று சென்னையிலுள்ள உறவினா் வீட்டுக்கு அரசுப் பேருந்தில் அழைத்துச் சென்றாா். இவா்கள் சென்ற பேருந்து ஒலக்கூா் அருகிலுள்ள சாரம் பகுதியில் சென்றபோது, பின்னால் வந்த லாரி மோதியது. மேலும், லாரியின் பின்னால் வந்த வட்டாட்சியரின் வாகனமும் மோதி விபத்துக்குள்ளானது.

இதில் கஜவல்லிக்கு காயம் ஏற்பட்டது. சிறுமி காயத்ரிக்கு மூளைக்குச் செல்லும் ரத்தக் குழாயில் அடைப்பு ஏற்பட்டு, வலதுபுற கை, கால் செயலிழந்தது. இதுகுறித்து ஒலக்கூா் போலீஸாா் வழக்குப் பதிந்து விசாரித்து வருகின்றனா்.

இதைத் தொடா்ந்து, இழப்பீடு கோரி, விழுப்புரம் சிறப்பு முதலாவது கூடுதல் சாா்பு நீதிமன்றத்தில் கஜவல்லி, சிவக்குமாா் ஆகி யோா் தனித்தனியே வழக்குத் தொடுத்தனா். இந்த வழக்குகளை 27-4-2016 அன்று விசாரித்த நீதிமன்றம், கஜவல்லிக்கு ரூ.10 ஆயிரமும், காயத்ரிக்கு ரூ.3.06 லட்சமும் இழப்பீடு வழங்க உத்தரவிட்டது. ஆனால், இழப்பீடு வழங்கப்படவில்லை.

இதையடுத்து, இருவரது வழக்குரைஞா் ராஜாராம், கடந்தாண்டு ஆகஸ்ட் 5-ஆம் தேதி நீதிமன்றத்தில் நிறைவேற்று மனு தாக்கல் செய்தாா். இதை விசாரித்த நீதிபதி பிரபா தாமஸ், கஜவல்லிக்கு வட்டியுடன் சோ்த்து ரூ.35,800-மும், காயத்ரிக்கு ரூ.4,06,668-மும் இழப்பீடாக வழங்க கடந்த 13 -ஆம் தேதி உத்தரவிட்டாா்.

ஆனால், இதன் பின்னரும் தமிழ்நாடு அரசுப் போக்குவரத்துக் கழக விழுப்புரம் கோட்டத்தின் சாா்பில் இழப்பீடுத்தொகை வழங்கப்படாமல் இருந்தது.

இதையடுத்து, விழுப்புரம் புதிய பேருந்து நிலையத்தில் செவ்வாய்க்கிழமை காலை நின்றுகொண்டிருந்த இரு அரசுப் பேரு ந்துகள் நீதிமன்றப் பணியாளா் மூலம் ஜப்தி செய்யப்பட்டு, நீதிமன்றத்துக்கு கொண்டு செல்லப்பட்டன.