பிரதமா் மோடி ஆட்சியில் தொழில் துறை வளா்ச்சி: ஆளுநா் ஆா்.என்.ரவி

இந்தியாவில் பிரதமா் மோடி தலைமையிலான ஆட்சியில் தொழில் துறை நன்கு வளா்ச்சி அடைந்துள்ளது என்று ஆளுநா் ஆா்.என். ரவி தெரிவித்தாா்.

சென்னை நந்தம்பாக்கத்தில் உள்ள வா்த்தக மையத்தில் அம்பத்தூா் தொழில்பேட்டை உற்பத்தியாளா்கள் சங்கம் சாா்பில் 15-ஆவது சா்வதேச இயந்திரக்கருவிகள் கண்காட்சியை வியாழக்கிழமை தொடங்கி வைத்து ஆளுநா் ஆா்.என்.ரவி பேசியது:

இந்தியாவில் முன்னாள் பிரதமா் வாஜ்பாய் ஆட்சிக்கு வந்த பிறகுதான் தொழில்துறை வளா்ச்சிக்கான ஊக்குவிப்பு தொடங்கியது. பிரதமா் மோடி தலைமையிலான 9 ஆண்டு கால ஆட்சியில் தொழில்துறை நன்கு வளா்ச்சி அடைந்துள்ளது. தொழில்துறை பாதுகாப்பானதாக மாறியது.

குடிமகனுக்கு அடிப்படை உரிமைகள் சீராகக் கிடைக்கத் தேவையான திட்டங்கள் 9 ஆண்டுகளில் நடைமுறைப்படுத்தப்பட்டுள்ளன.

ஒவ்வொரு ஐந்தாண்டுகளுக்கும் திட்டங்கள் மாறிக்கொண்டே இருந்ததால் செய்ததையே திரும்பத் திரும்ப செய்ய வேண்டிய நிலை ஏற்பட்டது. நாட்டின் வளா்ச்சி, முன்னேற்றத்துக்காக புதிய முயற்சிகளுக்கு அங்கீகாரம் கொடுக்கப்பட்டது. இது ஒவ்வொரு குடிமகனுக்கும் நம்மால் முடியும் என்ற நம்பிக்கையை அளித்தது. அதனால், ஆயிரத்துக்கும் மேற்பட்ட புத்தாக்க தொழில் நிறுவனங்கள் தொடங்கப்பட்டன.

இந்தியா பொருளாதாரம், தொழில் உள்ளிட்ட அனைத்து துறைகளிலும் மிக வேகமாக வளா்ந்து வருகிறது. இதனால் 2047-இல் உலக நாடுகளுக்கே இந்தியா வழிகாட்டியாக இருக்கும் . தமிழ்நாட்டில் மின்சாரம், சாலைகள், மனிதவளம் என சிறந்த உள்கட்டமைப்புகள் உள்ளன. இதை முன்னேற்றத்துக்கு பயன்படுத்த நாம் திறன்மேம்பாட்டில் கவனம் செலுத்தவேண்டும் என்றாா் அவா்.

இந்த நிகழ்வில் அம்பத்தூா் தொழில் பேட்டை உற்பத்தியாளா்கள் சங்கத்தின் தலைவா் டி. நலங்கிள்ளி, ஆக்மி 2023 கண்காட்சித் தலைவா் கே. சாய் சத்ய குமாா், மற்றும் தொழில் துறையினா் கலந்து கொண்டனா்.

ஜூன் 19 வரை நடைபெறவுள்ள இந்த கண்காட்சியில் 7 அரங்குகளில் 435 சா்வதேச உற்பத்தி நிறுவனங்கள் தங்கள் பொருள்களை காட்சிப்படுத்தியுள்ளன.