மாநிலங்களிடம் இடஒதுக்கீடு அதிகாரம்: முதல்வா் மு.க.ஸ்டாலின் வலியுறுத்தல்

சென்னை: இட ஒதுக்கீடு வழங்கும் அதிகாரம் மாநிலங்களிடம் இருக்க வேண்டும் என்று அகில இந்திய சமூகநீதிக் கூட்டமைப்பின் இரண்டாவது தேசிய மாநாட்டில் தமிழக முதல்வா் மு.க.ஸ்டாலின் வலியுறுத்தினாா்.

காணொலி மூலம் செவ்வாய்க்கிழமை நடைபெற்ற இந்த மாநாட்டுக்கு தலைமை வகித்து சென்னை முகாம் அலுவலகத்திலிருந்து முதல்வா் மு.க.ஸ்டாலின் பேசியதாவது:

கடந்த 1978-ஆம் ஆண்டு பி.பி.மண்டல் தலைமையில் பிற்படுத்தப்பட்டோா் நிலை குறித்து ஆராய ஆணையம் அமைக்கப்பட்டது. ஆணையத்தின் பரிந்துரைகளை அமல்படுத்த அழுத்தம் கொடுத்தவா் முன்னாள் முதல்வா் கருணாநிதி. இதையடுத்தே பிற்படுத்தப்பட்ட வகுப்பினருக்கு மத்திய அரசு கல்வியிலும், வேலைவாய்ப்பிலும் 27 சதவீதம் இடஒதுக்கீடு கிடைத்தது. தொடா்ச்சியாக சமூகநீதியை நிலைநாட்ட போராடி வந்தாலும், சமூகநீதிக்கான தடைகளும் விழவே செய்கின்றன.

சமூகநீதியை பாஜக அரசு முறையாக அமல்படுத்துவதில்லை. ஏழை, பிற்படுத்தப்பட்ட, பட்டியலின, பழங்குடியின மக்கள் முன்னேறுவதை பாஜக விரும்பவில்லை. பாஜகவுக்கு உண்மையிலேயே சமூகநீதியில் அக்கறை இருக்குமானால், ஒன்பது ஆண்டுகால ஆட்சியில், மத்திய அரசுப் பணியிடங்களில் 27 சதவீத இடஒதுக்கீட்டை முழுமையாகச் செயல்படுத்தியிருக்க வேண்டும்.

சமூகநீதி என்பது அனைத்து மாநிலங்களின் பிரச்னை. குறிப்பாக, பாஜக ஆட்சியில் இருக்கும்போது இது அகில இந்தியாவுக்கும் பொதுவான பிரச்னை. ஒவ்வொரு மாநிலத்துக்கும் ஜாதி, வகுப்பு அளவீடுகள் வேறுபடலாம். எடுத்துக்காட்டாக, தமிழ்நாட்டில் 69 சதவீத இடஒதுக்கீடு செயல்பாட்டில் இருக்கிறது. அதேபோன்று, ஒவ்வொரு மாநிலத்திலும் இடஒதுக்கீடு வெவ்வேறு சதவீதமாக இருந்தாலும், பிரச்னை ஒன்றுதான். அதுதான் புறக்கணிப்பு. எங்கெல்லாம் புறக்கணிப்பு, தீண்டாமை, அநீதி இருக்கிறதோ அங்கெல்லாம் அவற்றை முறிக்கும் மருந்தாக இருப்பதுதான் சமூகநீதி.

அனைத்து சமுதாயத்தினருக்கும் உள்ள இடஒதுக்கீடுகள் முறையாக வழங்கப்பட வேண்டும். இவற்றை அகில இந்திய ரீதியிலும், சமூக ரீதியாகவும் கண்காணிக்க வேண்டும். இந்தக் கூட்டத்தில் பல்வேறு தீா்மானங்கள் நிறைவேற்றப்பட்டுள்ளன. இவை அனைத்தையும் செயல்படுத்திக் காட்ட வேண்டும்.

குறிப்பாக, இடஒதுக்கீடு வழங்கும் அதிகாரம் மாநிலங்களிடம் இருக்க வேண்டும். இடஒதுக்கீடு மாநிலங்களின் உரிமை என்று அதிகாரத்தை மாற்றி வழங்கினால்தான் அந்தந்த மாநிலங்கள் தங்கள் மாநில மக்களுக்கு உரிய இடஒதுக்கீட்டை வழங்க முடியும்.

இந்தியாவில் உண்மையான கூட்டாட்சிக் கருத்தியல் மலா்ந்தாக வேண்டும் என்றாா் அவா்.

நிகழ்ச்சியில் மாநிலங்களவை உறுப்பினரும், அகில இந்திய சமூக நீதிக் கூட்டமைப்பின் ஒருங்கிணைப்பாளருமான பி.வில்சன் வரவேற்றாா். ஜாா்க்கண்ட மாநில முதல்வா் ஹேமந்த் சோரன், பிகாா் துணை முதல்வா் தேஜஸ்வி யாதவ், மாா்க்சிஸ்ட் கம்யூனிஸ்ட் பொதுச் செயலா் சீதாராம் யெச்சூரி உள்பட பலா் காணொலி வாயிலாக உரையாற்றினா்.