தமிழக அரசு
தொழிலாளா்கள் 12 மணி நேரம் வேலை செய்ய வகை செய்யும் தொழிற்சாலைகள் சட்டத் திருத்தத்துக்கு கடும் எதிா்ப்பு எழுந்துள்ள நிலையில், தொழிற்சங்கங்களுடன் தமிழக அரசின் சாா்பில் அமைச்சா்கள் திங்கள்கிழமை (ஏப். 24) பேச்சுவாா்த்தை நடத்த உள்ளனா்.
தமிழக சட்டப்பேரவையில் ஏப்ரல் 21-இல் தொழிற்சாலைகள் சட்டத் திருத்த மசோதாவை தொழிலாளா் நலத் துறை அமைச்சா் சி.வி.கணேசன் கொண்டு வந்தாா். இந்த மசோதா குரல் வாக்கெடுப்பு மூலம் நிறைவேற்றப்பட்டது.
ஆனால், இந்த சட்டத் திருத்த மசோதா தொழிலாளா்களின் உரிமைகளைப் பறிப்பதாகவும், 8 மணி நேர வேலை என்பதை 12 மணி நேரம் என மாற்றுவதாகவும் கூறி காங்கிரஸ், மாா்க்சிஸ்ட், இந்திய கம்யூனிஸ்ட், பாமக, பாஜக, மதிமுக, விடுதலைச் சிறுத்தைகள், தமிழக வாழ்வுரிமைக் கட்சி உள்ளிட்ட கட்சிகள் கடும் எதிா்ப்பு தெரிவித்தன. முன்னாள் முதல்வா் ஓ.பன்னீா்செல்வமும் எதிா்ப்பு தெரிவித்தாா்.
எனினும், ‘இந்தியாவுக்கு வெளிநாட்டு நிறுவனங்கள் அதிகளவில் முதலீடு செய்ய வருகின்றன. அவா்கள் வேலை நேரத்தில் ஒரு நெகிழ்வுத் தன்மையை எதிா்பாா்க்கின்றனா். அதற்காகத்தான் சட்டத் திருத்தம் செய்யப்படுகிறது. தொழிலாளா்கள் விரும்பாதபட்சத்தில், 12 மணி நேரம் வேலை என்பதை தொழிற்சாலைகள் அமல்படுத்த முடியாது. அது தொடா்பாக அரசின் கவனத்துக்குக் கொண்டுவந்து, அரசு ஒப்புதல் அளித்தால் மட்டுமே செயல்படுத்த முடியும். அதனால், தொழிலாளா்களுக்கு எந்தவித பாதிப்பும் வராது’ என்று தொழிலாளா் நலத் துறை அமைச்சா் சி.வி.கணேசன், தொழில் துறை அமைச்சா் தங்கம் தென்னரசு ஆகியோா் விளக்கம் அளித்தனா்.
அந்த விளக்கத்தை எந்தக் கட்சியும் ஏற்கவில்லை. மாா்க்சிஸ்ட், இந்திய கம்யூனிஸ்ட், விடுதலைச் சிறுத்தைகள் ஆகிய மூன்று கட்சிகளைச் சோ்ந்த உறுப்பினா்களும் வெளிநடப்பு செய்தனா். பல்வேறு தொழிற்சங்கத்தினரும் தமிழகம் முழுவதும் தொடா்ந்து போராட்டங்களில் ஈடுபட்டு வருகின்றனா்.
பேச்சுவாா்த்தை: இந்நிலையில், தொழிற்சங்கத்தினருடன் தமிழக அரசு பேச்சுவாா்த்தை நடத்த முன்வந்துள்ளது.
இது தொடா்பாக தமிழக அரசு சாா்பில் சனிக்கிழமை வெளியிட்ட செய்திக்குறிப்பு: தமிழக சட்டப்பேரவையில் ஏப்ரல் 21-இல், 2023-ஆம் ஆண்டு தொழிற்சாலைகள் (தமிழ்நாடு திருத்த) சட்ட மசோதா தாக்கல் செய்யப்பட்டது.
இந்த சட்ட மசோதாவினுடைய முக்கிய அம்சங்கள் குறித்தும், மத்திய அரசின் தொழிலாளா் நலச் சட்டத்திலிருந்து தற்போது தமிழக அரசு முன்மொழிந்திருக்கும் இந்தச் சட்டம் எவ்வாறு வேறுபட்டுள்ளது என்பதை விளக்கிக் கூறி, இந்தத் திருத்தத்தால் தமிழகத்துக்கு கூடுதலாக வரக்கூடிய முதலீடுகள் மற்றும் பெருகும் வேலைவாய்ப்புகள் குறித்தும் சட்டப்பேரவையில் தொழிலாளா் நலன் மற்றும் திறன் மேம்பாட்டுத் துறை அமைச்சரும், தொழில் துறை அமைச்சரும் விரிவாக விளக்கம் அளித்தனா்.
எனினும், இந்த மசோதா குறித்து தொழிலாளா் சங்கங்கள் சில கருத்துகளைத் தெரிவித்து வருவதால், திங்கள்கிழமை (ஏப். 24) பிற்பகல் 3 மணிக்கு தலைமைச் செயலகத்தில் பொதுப் பணித் துறை அமைச்சா், குறு, சிறு மற்றும் நடுத்தர தொழில்கள் துறை அமைச்சா், தொழிலாளா் நலன் மற்றும் திறன் மேம்பாட்டுத் துறை அமைச்சா், தலைமைச் செயலா், தொழிலாளா் நலன் மற்றும் திறன் மேம்பாட்டுத் துறை கூடுதல் தலைமைச் செயலா், தொழிலாளா் நலத் துறை ஆணையா் ஆகியோா் முன்னிலையில் தமிழகத்தில் உள்ள முக்கிய தொழிற்சங்கங்களுடன் ஆலோசனைக் கூட்டம் நடத்தப்பட உள்ளது என்று அதில் கூறப்பட்டுள்ளது.
