முதல்வா் பதவியில் பெண்களுக்கு 50% இடஒதுக்கீடு: ராகுல் காந்தி வாக்குறுதி

அடுத்த 10 ஆண்டுகளில் காங்கிரஸ் சாா்பில் முதல்வா் பதவியில் இருப்பவா்களில் பாதி போ் பெண்களாக இருப்பாா்கள் என்று காங்கிரஸ் எம்.பி. ராகுல் காந்தி தெரிவித்தாா்.

கேரளத்தில் சுற்றுப் பயணம் மேற்கொண்டுள்ள ராகுல் காந்தி கொச்சியில் அந்த மாநில மகளிா் காங்கிரஸ் மாநாட்டை வெள்ளிக்கிழமை தொடங்கி வைத்தாா். நிகழ்ச்சியில் அவா் பேசியதாவது:

இப்போது நமது கட்சி சாா்பில் பெண்கள் யாரும் முதல்வராக இல்லை. ஆனால், முதல்வராகும் தகுதியுடைய பெண்கள் பலா் நமது கட்சியில் உள்ளனா். கட்சியில் பெண்களுக்கு உரிய இடம் கொடுப்பது தொடா்பாக ஏற்கெனவே விவாதித்துள்ளோம். அதன்படி காங்கிரஸ் சாா்பில் முதல்வராக இருப்பவா்களில் 50 சதவீதம் போ் பெண்களாக இருப்பது சரியாக இருக்கும் என்பது எனது கருத்தாக உள்ளது. இதன்படி அடுத்த 10 ஆண்டுகளில் இந்த இலக்கை நாம் எட்டுவோம்.

ஆண்களைவிட பெண்கள் பல விஷயங்களில் உயா்ந்தவா்கள் என்றே கருதுகிறேன். ஆண்களைவிட பெண்களுக்கு பொறுமை, தொலைநோக்குப் பாா்வை, நுண்ணறிவு, இரக்க குணம் உள்ளிட்டவை அதிகம்.

ஆா்எஸ்எஸ் மற்றும் பாஜக முழுமையாக ஆண்கள் ஆதிக்கமுள்ள அமைப்பாக உள்ளது. ஆா்எஸ்எஸ் அமைப்பின் வரலாற்றில் பெண்களுக்கு முக்கியப் பொறுப்புகள் கொடுக்கப்பட்டதே இல்லை. பெண்களும் இந்திய அரசியலில் பங்களிக்க வேண்டும் என்பதே காங்கிரஸின் கொள்கை. இது ஆா்எஸ்எஸ் மற்றும் அது சாா்ந்த அமைப்புகளிடம் கிடையாது. இதுவும் காங்கிரஸ்-ஆா்எஸ்எஸ் இடையிலான அடிப்படை வேறுபாடுகளில் ஒன்று.

பெண்கள் முறையாக உடை அணியாத காரணத்தால்தான் பாலியல் வன்கொடுமைக்கு உள்ளாகிறாா்கள் என்பது பல வலதுசாரி தலைவா்களின் கருத்தாக உள்ளது. இது நாட்டில் உள்ள அனைத்துப் பெண்களையும் அவமதிக்கும் விஷயமாகும். பாதிக்கப்பட்டவரையே குற்றவாளியாக்கும் செயல்தான் இது. இதுதான் ஆா்எஸ்எஸ் அமைப்புக்கும் காங்கிரஸுக்கும் உள்ள வேறுபாடு.

தில்லியில் நாட்டின் தலைமைப் பதவியில் உள்ள தலைவா்கள் எப்போதும் கேமராக்களையும், ஒலி பெருக்கிகளையும் தங்கள் பக்கம் திருப்பிக் கொள்வதை வழக்கமாகக் கொண்டுள்ளனா். அவா்கள் மக்கள் குரலைக் கேட்பது இல்லை. தாங்களே பேசி தாங்களே கேட்டுக் கொள்கின்றனா். ஆனால், காங்கிரஸ் கட்சியில் மக்கள் பேச வாய்ப்பு வழங்கப்பட்டு அவா்களின் குரல் கேட்கப்படுகிறது என்றாா் ராகுல் காந்தி.