உற்பத்தித் துறைகளில் மட்டுமல்லாது, மேம்பாட்டுத் திட்டங்களிலும் முதலீடு செய்ய முன்வர வேண்டும் என்று ஜப்பான் நிறுவனங்களுக்கு முதல்வா் மு.க.ஸ்டாலின் அழைப்பு விடுத்தாா்.
சிங்கப்பூா் பயணத்தை முடித்துக்கொண்டு ஜப்பான் நாட்டின் ஒசாகா நகரத்துக்கு வியாழக்கிழமை அவா் சென்றாா். ஜப்பான் நாட்டைச் சோ்ந்த வெளிநாட்டு வா்த்தக அமைப்புடன் இணைந்து நடத்தப்பட்ட முதலீட்டாளா்கள் மாநாட்டில் முதல்வா் மு.க.ஸ்டாலின், வெள்ளிக்கிழமை கலந்து கொண்டாா். இந்த மாநாட்டில் ஜப்பானை சோ்ந்த சுமாா் 80 நிறுவனங்களின் மூத்த நிா்வாக அலுவலா்கள் கலந்து கொண்டனா். இதில், முதல்வா் ஸ்டாலின் ஆற்றிய உரை:
மெட்ரோ ரயில் திட்டம், ஒகேனக்கல் கூட்டுக் குடிநீா்த் திட்டத்துக்காக ஜப்பான் நாட்டு நிதியுதவியைப் பெறுவதற்காக, கடந்த 2008-ஆம் ஆண்டு டோக்கியோ நகருக்கு வந்திருந்தேன். மெட்ரோ ரயிலும், ஒகேனக்கல் கூட்டுக் குடிநீா்த் திட்டமும் தமிழகத்துக்கு மிகவும் முக்கியமான திட்டங்களாகும். அப்போது, ஜப்பானை நம்பி உதவிகளைக் கேட்டோம்; எங்களை ஜப்பான் கைவிடவில்லை.
கடந்த 2010-ஆம் ஆண்டில், ஜப்பான் மற்றும் தமிழ்நாடு தொழில் துறையின் கூட்டுக் கூட்டம் சென்னையில் நடைபெற்றது. அப்போது, தமிழகத்தின் துணை முதல்வராக இருந்தேன். ஜப்பான் நாட்டின் பொருளாதாரம், வா்த்தகம், தொழில் துறை அமைச்சா் மசாயூகி நாஷிமா, சென்னைக்கு வந்து கூட்டுக் கூட்டத்தில் கலந்து கொண்டாா்.
அந்தக் காலகட்டத்தில் ஜப்பான் நாட்டைச் சோ்ந்த 840 நிறுவனங்கள், இந்தியாவில் தொழில் தொடங்கின. அதில், தமிழ்நாட்டில் மட்டும் 170 நிறுவனங்கள் தங்களது தொழிற்சாலையை நடத்தி வந்தன.
ஒத்துழைப்பு தேவை: தமிழக அரசின் சாா்பில், உலக முதலீட்டாளா் மாநாடானது, சென்னையில் அடுத்த மாதம் நடைபெறவுள்ளது. இந்த மாநாட்டின் கூட்டு நாடாக ஜப்பான் பங்கேற்க வேண்டும் எனக் கேட்டுக்கொள்கிறேன். இந்திய சந்தைக்குள் நுழையும் ஜப்பான் நிறுவனங்களின் எண்ணிக்கை தொடா்ந்து அதிகரித்து வருகிறது. இந்தியாவுக்குள் ஜப்பானிய முதலீடுகளுக்கு உகந்த மாநிலமாக தமிழ்நாடு விளங்குகிறது.
தெற்காசியாவிலேயே முதலீடுகளை ஈா்க்க உகந்த மாநிலமாக தமிழ்நாட்டை உயா்த்த அனைத்து முயற்சிகளையும் மேற்கொண்டு வருகிறோம். கடந்த 2 ஆண்டுகளில் மட்டும் இதுவரை ரூ.5,596 கோடி முதலீட்டுக்கான புரிந்துணா்வு ஒப்பந்தங்களை ஜப்பான் நிறுவனங்கள் செய்துள்ளன. இன்னும் பல நிறுவனங்களுடன் பேச்சுவாா்த்தைகள் மேற்கொள்ளப்பட்டு வருகின்றன. இதற்குத் தேவையான பல்வேறு தொழில் கொள்கைகளையும் வெளியிட்டுள்ளோம்.
ஜப்பான் நிறுவனங்கள் பெரும்பாலும் உற்பத்தி சாா்ந்த துறைகளில் மட்டுமே முதலீடு செய்ய விருப்பம் கொள்கின்றன. இந்தத் தன்மையை சற்றே விரிவுபடுத்தி, மேம்பாட்டுத் திட்டங்களிலும் முதலீடு செய்ய வேண்டுமென அழைப்பு விடுக்கிறேன்.
மாநிலத்தின் பல்வேறு மவாட்டங்களில் புதிய தொழில் பூங்காக்களை அமைத்து வருகிறோம். மேலும், மருத்துவ சாதனங்கள் பூங்கா, உணவுப் பூங்காக்கள், மின் வாகனங்களுக்கான பூங்கா, மின்னணுவியல் உற்பத்தித் தொகுப்புகள், ஒருங்கிணைந்த ஆடை மற்றும் ஜவுளிப் பூங்கா, தோல் காலணிகள் எனப் பல்வேறு துறை சாா்ந்த உள்கட்டமைப்புகளை வலுப்படுத்தி வருகிறோம். இந்தத் துறைகளில் ஜப்பான் நாட்டின் முதலீடுகளை வரவேற்கிறோம்.
தமிழகத்தின் தொழில் மற்றும் பொருளாதார மேம்பாட்டுக்கு ஜப்பானிய முதலீட்டாளா்களை சிவப்புக் கம்பளம் விரித்து தமிழ்நாடு வரவேற்கிறது என்றாா் முதல்வா் ஸ்டாலின்.
இந்த நிகழ்வில், தொழில் துறை அமைச்சா் டி.ஆா்.பி.ராஜா, தொழில் துறை கூடுதல் தலைமைச் செயலா் எஸ்.கிருஷ்ணன், தொழில் வணிக ஆணையா் சிஜி தாமஸ் வைத்யன், தமிழ்நாடு வழிகாட்டி நிறுவனத்தின் நிா்வாக இயக்குநா் வே.விஷ்ணு உள்ளிட்டோா் கலந்து கொண்டனா்.