சிங்கப்பூா் பயணத்தை முடித்துக்கொண்டு, முதல்வா் மு.க.ஸ்டாலின் வியாழக்கிழமை இரவு ஜப்பான் சென்றாா். அங்குள்ள கான்சாய் விமான நிலையத்துக்குச் சென்ற அவரை, ஜப்பான் நாட்டுக்கான இந்திய தூதா் நிகிலேஷ் கிரி மலா்க்கொத்து கொடுத்து வரவேற்றாா்.
வெள்ளி, சனி (மே 26, 27) ஆகிய இரு நாள்கள் ஜப்பான் நாட்டின் பயணம் மேற்கொள்ளவுள்ளாா். அப்போது, ஒசாகா நகரில் நடைபெறும் முதலீட்டாளா்கள் மாநாட்டில் அவா் பங்கேற்கவுள்ளாா். இந்த நகரில் தமிழா்கள் அதிகம் வசிப்பது குறிப்பிடத்தக்கது. மேலும், ஜப்பான் நாட்டின் பல்வேறு முன்னணி நிறுவனங்களின் தலைமைச் செயல் அலுவலா்களையும் முதல்வா் சந்திக்கவுள்ளாா்.
ஜப்பானில் அதிகம்: இந்தியாவில் 725-க்கும் மேற்பட்ட ஜப்பான் நிறுவனங்கள் தங்களது தொழிற்சாலைகளை அமைத்துள்ளன. அவற்றில், நிசான், தோஷிபா, மிட்சுபிஷி, ஹிட்டாச்சி உள்ளிட்ட 240-க்கும் மேற்பட்ட நிறுவனங்கள் தமிழகத்தில் தொழிற்சாலைகளை ஏற்படுத்தியுள்ளன. இத்துடன், சென்னை மெட்ரோ ரயில், கூட்டுக்குடிநீா்த் திட்டங்கள் என ஜப்பான் பன்னாட்டு கூட்டுறவு வங்கி சாா்பில் நிதியுதவிகளும் அளிக்கப்பட்டு வருகின்றன.
முதல்வரின் ஜப்பான் பயணத்தால் தமிழகத்தில் இருக்கக்கூடிய தொழிற்சாலைகள் விரிவாக்கம் செய்ய பேச்சுவாா்த்தைகள் நடத்தப்படுவதுடன், புதிய தொழிற்சாலைகளும் வருவதற்கு வாய்ப்பு இருப்பதாக தொழில் துறையினா் நம்பிக்கை தெரிவித்தனா்.
சிங்கப்பூா் பயணம் நிறைவு: கடந்த 23-ஆம் தேதி சென்னையில் இருந்து சிங்கப்பூருக்குச் சென்றாா் முதல்வா் மு.க.ஸ்டாலின். அங்கு பல்வேறு தொழில் நிறுவனங்களைச் சோ்ந்த அதிகாரிகளைச் சந்தித்துப் பேசினாா். இதைத் தொடா்ந்து, தனது சிங்கப்பூா் பயணத்தை முடித்துக்கொண்டு வியாழக்கிழமை நண்பகலில் ஜப்பான் நாட்டுக்குப் புறப்பட்டுச் சென்றாா்.