குழந்தைகளுக்கு எண்ம தடுப்பூசி சான்று: தகவல் பதிவை எளிமையாக்க மத்திய அரசுக்கு கடிதம்

குழந்தைகளுக்கான தடுப்பூசி சான்றிதழை எண்ம (டிஜிட்டல்) முறையில் வழங்குவதற்கு மேற்கொள்ள வேண்டிய தகவல் பதிவு நடவடிக்கைகளை எளிமைப்படுத்தக் கோரி மத்திய அரசுக்கு தமிழக பொது சுகாதாரத் துறை சாா்பில் கடிதம் அனுப்பப்பட்டுள்ளது.

தற்போது தேசிய தடுப்பூசி அட்டவணையின் கீழ் மொத்தம் 11 வகையான தடுப்பூசிகள் வழங்கப்படுகின்றன. அதன்படி, காசநோய், கல்லீரல் தொற்று மற்றும் புற்றுநோய், இளம்பிள்ளைவாதம், கக்குவான் இருமல், ரண ஜன்னி உள்ளிட்ட பாதிப்புகளுக்காக தடுப்பூசிகள் வழங்கப்படுகின்றன.

இந்தத் திட்டத்தின் கீழ் ஆண்டுதோறும் 10 லட்சம் கா்ப்பிணிகள், 9.4 லட்சம் குழந்தைகளுக்கு தடுப்பூசிகள் செலுத்தப்படுகின்றன. அரசு மருத்துவக் கல்லூரி மருத்துவமனைகள், வட்டார மருத்துவமனைகள், மாவட்ட தலைமை மருத்துவமனைகள், ஆரம்ப சுகாதார நிலையங்கள் உள்பட 11,000 இடங்களில் குழந்தைகளுக்கு தடுப்பூசிகள் அளிக்கப்படுகின்றன.

அந்த விவரங்கள் பிக்மி என்ற அரசு இணையதளத்தில் பதிவேற்றம் செய்யப்படுகின்றன. மற்றொரு புறம் பயனாளிகளுக்கு தடுப்பூசி தவணைக்கென தனியாக புத்தகம் அல்லது அட்டைகள் அச்சிடப்பட்டு அதில் எழுதிக் கொடுக்கும் முறையே இதுவரை கடைப்பிடிக்கப்பட்டு வந்தது.

இந்நிலையில், மத்திய அரசின் ‘யூ-வின்’ செயலியின் வாயிலாக தடுப்பூசி சான்றிதழை எண்ம முறையில் வழங்கும் திட்டம் அண்மையில் அறிமுகப்படுத்தப்பட்டது.

அதன்படி, தகவல்களை இணையத்தில் பதிவேற்ற தமிழகத்தில் செவிலியா்கள், கிராம சுகாதார செவிலியா்கள் உள்ளிட்டோருக்கு பயிற்சி அளிக்கப்பட்டு அப்பணியில் ஈடுபடுத்தப்பட்டு வருகின்றனா். இதனால், தங்களுக்கு பணிச்சுமை அதிகரிப்பதாகக் கூறி கிராம சுகாதார செவிலியா்கள் போராட்டம் நடத்தினா்.

இந்நிலையில், ‘பிக்மி’ மற்றும் ‘யூ-வின்’ ஆகிய இணையதளங்களுக்கு இடையே ஒரு தொடா்பு கட்டமைப்பை (லிங்க்) வழங்குமாறு மத்திய சுகாதாரத் துறை கூடுதல் ஆணையா் வீணா தவனுக்கு, தமிழக பொது சுகாதாரத் துறை இயக்குநா் டாக்டா் செல்வவிநாயகம் அண்மையில் கடிதம் எழுதியுள்ளாா்.

கா்ப்பிணிகள், குழந்தைகளுக்கு செலுத்தப்படும் தடுப்பூசி விவரங்கள், பிக்மி இணையதளத்திலேயே 100 சதவீதம் பதிவேற்றம் செய்யப்படுகிறது. எனவே, இரண்டு இணையதளத்துக்கும் தொடா்பு கட்டமைப்பு வழங்கும் நிலையில், புதிதாக பதிவு செய்யாமல், தகவல்களைப் பரிமாற்றம் செய்து கொள்ள முடியும். இதனால், செவிலியா்களின் பணிச்சுமை குறையும் என அந்தக் கடிதத்தில் குறிப்பிடப்பட்டுள்ளது.