கோவை தொகுதி தோ்தல் முடிவை வெளியிட தடை கோரி வழக்கு

கோவை மக்களவைத் தொகுதியில் பெயா் நீக்கம் செய்யப்பட்ட வாக்காளா்களை மீண்டும் பட்டியலில் இணைத்து வாக்களிக்க அனுமதிக்க வேண்டும்; அதுவரை தோ்தல் முடிவை வெளியிட தடை விதிக்க வேண்டும் எனக் கோரி சென்னை உயா்நீதிமன்றத்தில் வழக்கு தொடரப்பட்டுள்ளது.

கோவை மாவட்டம் நஞ்சுண்டாபுரத்தைச் சோ்ந்தவா் சுதந்திர கண்ணன். ஆஸ்திரேலியாவில் மருத்துவராக பணிபுரியும் இவா், மக்களவைத் தோ்தலில் வாக்களிப்பதற்காக கோவை வந்தாா். வாக்குச் சாவடிக்கு சென்றபோது அவரது பெயா் வாக்காளா் பட்டியலில் இல்லை என தெரியவந்தது. இதையடுத்து வாக்களிக்க முடியாமல் ஏமாற்றத்துடன் திரும்பிச் சென்றாா் சுதந்திர கண்ணன். இவ்வாறு கோவை தொகுதியில் ஒரு லட்சத்துக்கும் மேற்பட்டவா்களின் பெயா்கள் வாக்காளா் பட்டியலிலிருந்து நீக்கப்பட்டுள்ளதாக பாஜக உள்ளிட்ட பல்வேறு கட்சியினா் குற்றச்சாட்டுகளை முன்வைத்துள்ளனா்.

தனக்கு வாக்குரிமை மறுக்கப்பட்டது குறித்து சுதந்திர கண்ணன் சென்னை உயா்நீதிமன்றத்தில் வழக்கு தொடா்ந்துள்ளாா். அதில், ‘வாக்காளா் பட்டியலில் எனது பெயரும், எனது மனைவி பெயரும் நீக்கப்பட்டிருப்பது தெரியவந்தது. 2019 மக்களவைத் தோ்தலிலும், 2021 சட்டப்பேரவைத் தோ்தலிலும் நாங்கள் வாக்களித்த நிலையில், இந்த முறை எங்கள் பெயா்கள் நீக்கப்பட்டுள்ளன. ஆனால், அதே முகவரியில் வசிக்கும் எங்களது மகள் பெயா் பட்டியலில் உள்ளது. இதுபோன்று எங்கள் பகுதியைச் சோ்ந்த ஆயிரக்கணக்கான வாக்காளா்களின் பெயா்கள் நீக்கப்பட்டுள்ளன.

இது தொடா்பாக தோ்தல் ஆணையத்துக்கு கடந்த 15-ஆம் தேதி மின்னஞ்சல் மூலம் புகாா் அளித்தேன். அதன் மீது நடவடிக்கையும் எடுக்கப்படவில்லை. அதனால் பட்டியலில் இருந்து நீக்கப்பட்ட வாக்களா்களை மீண்டும் பட்டியலில் சோ்த்து, வாக்களிக்க அனுமதிக்க வேண்டும். அதுவரை கோவை தொகுதி தோ்தல் முடிவுகளை வெளியிட தடை விதிக்க வேண்டும்’ என அதில் தெரிவித்துள்ளாா். இந்த வழக்கு தலைமை நீதிபதி அமா்வில் விரைவில் விசாரணைக்கு வரும் என எதிா்பாா்க்கப்படுகிறது.