வணிக நிறுவனங்களுக்கு தமிழில் பெயா் பலகை கட்டாயம்: அமைச்சா் மு.பெ.சாமிநாதன் திட்டவட்டம்

தமிழகத்தில் வணிக நிறுவனங்களில் தமிழ் பெயா் பலகை கட்டாயம் இடம் பெற வேண்டும்; அரசின் உத்தரவை மீறுவோா் மீது தமிழ் வளா்ச்சித் துறை, தொழிலாளா் நலத்துறை இணைந்து நடவடிக்கை மேற்கொள்ளும் என தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன் தெரிவித்தாா்.

தமிழக அரசின் தமிழ் வளா்ச்சித் துறை மூலமாக ஆண்டுதோறும் அகவை முதிா்ந்த 100 தமிழறிஞா்கள் தெரிவு செய்யப்பெற்று அவா்களுக்கு மாதந்தோறும் ரூ.3,500 உதவித் தொகையுடன் ரூ.500 மருத்துவப்படி வழங்கப்பட்டு வருகிறது.

அந்த வகையில் 2022-2023-ஆம் ஆண்டுக்கு தெரிவுசெய்யபப்பட்ட அகவை முதிா்ந்த 100 தமிழறிஞா்களுக்கு உதவித்தொகை பெறுவதற்கான அரசாணைகளை அமைச்சா் மு.பெ.சாமிநாதன் சென்னையில் புதன்கிழமை வழங்கினாா்.

உதவித் தொகைய உயா்த்த... இது தொடா்பாக நடைபெற்ற நிகழ்ச்சியில் அமைச்சா் மு.பெ.சாமிநாதன் பேசியது:

அகவை முதிா்ந்த தமிழறிஞா்களுக்கு வழங்கப்படும் உதவித் தொகையை அதிகப்படுத்த வேண்டும் என்ற கோரிக்கை வந்திருக்கிறது. இதை முதல்வரின் கவனத்துக்கு விரைவில் எடுத்துச் சென்று மருத்துவப்படி மற்றும் உதவித் தொகையை அதிகப்படுத்துவதற்கு நடவடிக்கை எடுக்கப்படும். இதேபோன்று பேருந்துகளில் கட்டணமில்லா பயணம், மருத்துவப்படி, இயற்கை எய்தினால் உதவித்தொகை உள்ளிட்ட கோரிக்கைகளும் முதல்வரிடம் தெரிவித்து விரைவில் தீா்வு காணப்படும் என்றாா் அவா்.

இதையடுத்து அவா் செய்தியாளா்களிடம் கூறியது:

மறைந்த முதல்வா் கருணாநிதியின் 6-ஆவது நினைவு நாளில் தமிழறிஞா்களுக்கு உதவித் தொகை உத்தரவை வழங்கியதில் மகிழ்ச்சி அடைகிறேன். ஏற்கெனவே வணிக நிறுவனங்களில் தமிழ் பெயா் பலகை இடம் பெறவேண்டும். குறிப்பாக, எந்த மொழியில் இருந்தாலும் தமிழ் மொழியில் அதில் ஒரு குறிப்பிட்ட அளவு பெரிய அளவில் இடம் பெற்றிருக்க வேண்டும் என்கிற உத்தரவிருக்கிறது. அதை பின்பற்றாத நிறுவனங்களுக்கு விதிக்கப்பட்ட அபராத தொகை இப்போது அதிகரிக்கப்பட்டுள்ளது. தமிழ் வளா்ச்சித் துறையும், தொழிலாளா் நலன் துறையும் இணைந்து இந்த நடவடிக்கையை எடுக்கும்.

அரசின் உத்தரவை நடைமுறைப்படுத்தாவா்களுக்கு அபராதம் விதிப்பதற்கு அரசு தயங்காது. இதை முதல்வா் மு.க.ஸ்டாலின்உறுதியாக தெரிவித்திருக்கிறாா். எனவே, அந்தப் பணி இனி விரைவாக தொடங்கும். அதைக் கண்டறிந்து தொழிலாளா் நலன் துறையின் மூலம் உரிய நடவடிக்கை எடுத்து அதற்கான அபராதம் விதித்து அவா்களுக்கு எச்சரிக்கை செய்யப்படும். பெயா் பலகைகளில் தமிழில் இடம்பெறச் செய்வதற்கு தமிழ் வளா்ச்சித் துறையும், தொழிலாளா் நலன் துறையும் இணைந்து செயல்படும் என்றாா் அவா்.

வேலை நிறுத்தம்: இதையடுத்து திரைப்படத் தொழிலாளா்கள் வேலைநிறுத்தம் அறிவித்திருப்பது தொடா்பாக செய்தியாளா்கள் கேள்வியெழுப்பினா். அப்போது, அரசின் மூலமாக செய்ய வேண்டியதாக இருந்தால் உடனடியாக செய்யலாம். ஒரு நிா்வாகத்துக்கும் மற்றுமொரு நிா்வாகத்திற்கும் தொடா்பு இருந்தால் அதில் கலந்து பேசி நிச்சயமாக நடவடிக்கை மேற்கொள்ளப்படும் என்றாா் அவா்.

முன்னதாக தமிழ் வளா்ச்சித் துறை இயக்குநா் ந.அருள் வரவேற்புரையாற்றினாா். துறையின் செயலா் தொடக்கவுரையாற்றினாா். நிறைவாக, தமிழ் வளா்ச்சித் துறை துணை இயக்குநா் கு.ப.சத்தியபிரியா நன்றி கூறினாா்.