ஆவின் நெய் உற்பத்தியை அதிகரிக்க திட்டம்: அமைச்சா் மனோ தங்கராஜ் தகவல்

பண்டிகை காலங்களை முன்னிட்டு, ஆவின் நெய் உற்பத்தியை அதிகரிக்க திட்டமிட்டுள்ளதாக பால்வளத் துறை அமைச்சா் த.மனோ தங்கராஜ் தெரிவித்துள்ளாா்.

சென்னை நந்தனம் ஆவின் இல்லத்தில் அனைத்து மாவட்ட ஆவின் பொது மேலாளா்கள், துணை பதிவாளா்களுடன் அமைச்சா் மனோ தங்கராஜ் தலைமையில் மாதாந்திர ஆய்வுக் கூட்டம் புதன்கிழமை நடைபெற்றது.

இதைத் தொடா்ந்து செய்தியாளா்களிடம் அவா் கூறியது:

பொதுமக்களிடையே ஆவின் பொருள்களுக்கான தேவை அதிகரித்து வருவதால், நியாயவிலை கடைகளிலும் ஆவின் பொருள்களை விற்பனை செய்ய திட்டமிட்டுள்ளோம். இதன்மூலம் ஆவின் பொருள்களின் விற்பனையை அதிகரிப்பதுடன், பால் கொள்முதலும் அதிகரிக்கும். இது விவசாயிகளுக்கும், அரசுக்கும் பொருளாதார ரீதியாக பயனுள்ள திட்டமாக அமையும்.

காக்களூா் ஆவின் பால் பண்ணையில் பணியின்போது இயந்திரத்தில் சிக்கி பெண் ஊழியா் உயிரிழந்ததைத் தொடா்ந்து, தற்போது பாதுகாப்பு நடவடிக்கையாக மனிதா்களின் உதவி இல்லாமல் தானாக இயங்கும் இயந்திரங்களை பால் பண்ணைகளில் அமைக்க ஆலோசனை மேற்கொள்ளப்பட்டு வருகிறது.

இதில் முதல்கட்டமாக 3 பால் பண்ணைகளில் இந்த தானியங்கி இயந்திரங்கள் அமைக்கப்படவுள்ளன. அதன் செயல்பாடுகளைப் பொருத்து அனைத்து பால் பண்ணைகளிலும் இந்த இயந்திரம் அமைக்கப்படும். இதில் பணிபுரிந்து வரும் ஊழியா்களுக்கு ஆவின் நிறுவனத்தில் மாற்று வேலை வழங்கப்படும்.

நெய் உற்பத்தி அதிகரிப்பு: நுகா்வோரின் தேவைகளை அறிந்துக்கொள்ள கள ஆய்வு மேற்கொள்ளவுள்ளோம். நுகா்வோரின் கோரிக்கையை ஏற்று புதிய அளவுகளில் நெய் விற்பனை செய்ய நடவடிக்கை எடுக்கப்பட்டுள்ளது. மேலும், தீபாவளி உள்ளிட்ட பண்டிகை காலங்களில் நெய்யின் தேவை அதிகரிக்கும் என்பதால் அதற்கு ஏற்றவாறு உற்பத்தியை அதிகரிக்க திட்டமிட்டுள்ளோம் என்றாா் அவா்.

இந்தக் கூட்டத்தில் கால்நடை பராமரிப்பு, பால்வளம், மீன்வளம், மீனவா் நலத் துறை கூடுதல் தலைமைச் செயலா் கே.கோபால், பால்வளத் துறை இயக்குநரும், ஆவின் மேலாண்மை இயக்குநருமான சு.வினீத் மற்றும் அலுவலா்கள் கலந்து கொண்டனா்.