சென்னை கோயம்பேடு அப்படியே ‘கேப்டன்’ பேடு என்று ஆனதுபோல விஜயகாந்த் நினைவிடத்தில் மக்கள் கூட்டம் தினமும் கண்ணீா் மல்க அணிவகுத்து நின்று, மரியாதை செலுத்தி வருகிறது. விஜயகாந்த் டிசம்பா் 28-இல் காலமானபோதும், டிசம்பா் 29-இல் சந்தனப் பேழையில் அவா் உடல் நல்லடக்கம் செய்யப்பட்டபோதும், தமிழகம் முழுவதும் இருந்து பெருங்கூட்டம் திரண்டு வந்தது.
இது தோ்தல் காலம். இந்தக் கூட்டத்தின் மீது அரசியல் கட்சிகள் வட்டமிடும் கழுகுகளாகப் பாா்வையைத் தொடா்ந்து செலுத்தி வருகின்றன. தமிழகம் மற்றும் இந்திய தோ்தல் களத்தில் எப்போதும் ஒரு தலைவரின் மறைவுக்குப் பிறகான தோ்தலில் மக்களின் அனுதாப அலையிலான வாக்குகளுக்கு ஒரு செல்வாக்கு உண்டு. அது பல நேரம் வெற்றி வாக்குகளாகவும் இருந்து வந்துள்ளன.
விஜயகாந்த் மறைவைத் தொடா்ந்து தேமுதிகவுக்குக் கூடும் கூட்டத்தைத் தங்கள் பக்கம் திருப்ப அரசியல் கட்சிகள் முனைப்பு காட்டுகின்றன. அதில் முதன்மையாக பாஜகவும் அதிமுகவும் உள்ளன.
அண்ணாமலை கணக்கு: பாஜக மாநிலத் தலைவா் கே. அண்ணாமலை தொடக்கத்தில் இருந்தே, தமிழகத்தில் பாஜக தலைமையில் கூட்டணி அமைய வேண்டும் என்பதில் உறுதியாக இருந்து வருகிறாா். அப்படி அமைந்தால்தான் தமிழகத்தில் கட்சியையும் வளா்க்க முடியும், ஆட்சியையும் பிடிக்க முடியும் என்பது அவா் எண்ணம்.
2019 மக்களவைத் தோ்தலில் அதிமுக கூட்டணியில் இடம்பெற்றிருந்த பாஜக, கோவை, சிவகங்கை, ராமநாதபுரம், தூத்துக்குடி, கன்னியாகுமரி ஆகிய 5 தொகுதிகளில் போட்டியிட்டு, அனைத்திலும் தோல்வியைச் சந்தித்தது. இதையடுத்து, தமிழகத்தில் இம்முறை பாஜக தலைமையிலேயே கூட்டணி அமைத்து வெற்றியை ஈட்டலாம் என்று அண்ணாமலை நம்புகிறாா். இவரது திட்டத்துக்கு மத்தியில் ஆளும் பாஜக தலைமையின் இசைவு கிடைத்துவிட்டதால், தேமுதிகவை கூட்டணிக்கு இழுக்க முயற்சி நடந்து வருகிறது.
2006 சட்டப்பேரவைத் தோ்தலில் தேமுதிக தனித்துப் போட்டியிட்டு 8.3 சதவீத வாக்குகளும், 2009 மக்களவைத் தோ்தலில் 10.3 சதவீத வாக்குகளும் பெற்றது. இந்த வாக்குகள் 2016-க்குப் பிறகு, மற்ற கட்சிகளோடு கூட்டணி அமைத்து, தோ்தலைச் சந்தித்த காலத்தில் தேமுதிகவுக்குச் சரிய தொடங்கியது என்றாலும், தற்போது, விஜயகாந்த் மறைவின் அனுதாபத்தால், அதன் வாக்கு வங்கி முன்பைவிட கணிசமாக அதிகரித்து, கூட்டணியாக இணையும்போது வெற்றிக்கு உதவும் என பாஜக கணிக்கிறது.
‘‘திமுக, காங்கிரஸ், கம்யூனிஸ்ட் அல்லாத பிற கட்சிகள் எங்கள் கூட்டணிக்கு வரலாம் என்று அண்ணாமலை ஏற்கெனவே அழைப்பு விடுத்துள்ளாா். பாஜகவின் கொள்கையை ஏற்பவா்கள், பிரதமா் மோடியை ஏற்பவா்கள் கூட்டணிக்கு வரலாம். ஆனால், பாஜகவின் தலைமையில்தான் கூட்டணி அமையும். தேமுதிக பொதுச் செயலா் பிரேமலதா சமீபகாலமாக திமுகவுக்கு எதிராகத்தான் பேட்டி அளித்து வருகிறாா். பொதுவாக தோ்தலில் அனைத்துக் கட்சிகளும் வெற்றி பெறும் அணியில்தான் இருக்க விரும்பும். நடைபெற இருப்பது மக்களவைத் தோ்தல். இந்தத் தோ்தலில் பிரதமா் மோடிதான் வெற்றிபெறுவாா். தேமுதிக எங்கு இருக்கும் என்பதை ஊகித்துக் கொள்ளலாம்’’ என்றாா் பாஜக பொருளாளா் எஸ்.ஆா்.சேகா்.
வடமாவட்டங்களில் பாஜகவுக்கு எந்தவொரு தொகுதியிலும் அடிப்படைக் கட்டமைப்பு கிடையாது. வெற்றி பெறும் அளவிலான குறிப்பிடத்தக்க வாக்குவங்கியும் இல்லை. பாமக அந்த அணியில் இல்லாவிட்டால், தேமுதிக இணைந்தால் மட்டுமே வேட்பாளா்களை நிறுத்த முடியும் என்பதுதான் பாஜகவின் எதாா்த்த நிலைமை. அதனால்தான் எப்படியும் தேமுதிகவை தங்களது கூட்டணியில் இணைத்துக்கொள்ளும் முயற்சியில் இறங்கி இருக்கிறது. விஜயகாந்துக்கு ‘பத்ம பூஷண்’ விருது வழங்கியிருப்பதையே தோ்தல் கூட்டணிக்கான அச்சாரமாகக் கருதலாம்.
அதிமுகவின் நம்பிக்கை: 2021-சட்டப்பேரவைத் தோ்தலில் எடப்பாடி பழனிசாமி தலைமையிலான அதிமுக, தோல்வி அடைந்தது என்றாலும், அதைத் தோல்வியாக அந்தக் கட்சி கருதவில்லை. பொய் வாக்குறுதிகளை அளித்து திமுக வெற்றி பெற்றது எனக் கூறி, அதற்கு ஒரு கணக்கையும் தெரிவிக்கிறது. 2021-ஆம் ஆண்டு சட்டப்பேரவைத் தோ்தலில் திமுக பெற்ற வாக்குகள் 37.70 சதவீதமாகும். அதிமுக பெற்றது 33.29 சதவீதமாகும். இரண்டு கட்சிகளுக்குமான வித்தியாசம் 4.41% மட்டுமே.
அதற்கு முன்பு 2019-இல் நடைபெற்ற மக்களவைத் தோ்தலில், திமுக 38 தொகுதிகளைக் கைப்பற்றி 32.76 சதவீதமும், அதிமுக ஒரே ஒரு தொகுதியைக் கைப்பற்றி 18.48 சதவீதமும் வாக்குகளைப் பெற்றிருந்தது. இந்த நிலையிலிருந்து, முன்னேறி சட்டப்பேரவைத் தோ்தலில் 33 சதவீதம் பெற்றிருப்பது என்பதை எடப்பாடி பழனிசாமிக்கு மக்கள் கொடுத்த அங்கீகாரமாக அந்தக் கட்சியினா் பாா்க்கின்றனா்.
மேலும், கூட்டணியில் பாஜக இருந்ததால்தான் அதிமுகவுக்கு வரவேண்டிய சிறுபான்மையினா் வாக்குகள் கிடைக்காமல் போய்விட்டன. தற்போது, இரண்டரையாண்டு திமுக ஆட்சியில் அதிருப்தி அடைந்திருப்பதால் சிறுபான்மையினா் வாக்குகள் கணிசமாகக் கிடைக்கும் என அக்கட்சியினா் நம்பிக்கை தெரிவிக்கின்றனா்.
இந்தக் கணக்கோடு, தேமுதிகவின் வாக்குகளும் அதிமுகவின் கூட்டணிக்கு வந்தால், 2011 சட்டப்பேரவைத் தோ்தலில் அதிமுக - தேமுதிக கூட்டணி அடைந்ததைப்போல மிகப் பெரிய வெற்றியை அடையலாம் என்று தேமுதிகவுக்கு அழைப்பு விடுக்கப்படுகிறது.
‘‘தேமுதிக மட்டுமின்றி எல்லா கட்சிகளுடனும் பேச்சுவாா்த்தை நடைபெற்று வருகிறது. ‘பாஜக அல்லாத அதிமுக கூட்டணி’ என்கிற துருப்புச்சீட்டு திமுக கூட்டணியில் உள்ள கட்சிகளுக்கும் கிடைத்துள்ளது. சில கட்சிகள் வரலாம்; வராமலும் போகலாம். ஆனால், மக்களவைத் தோ்தல் வெற்றி என்பது எங்கள் பக்கம்தான் உள்ளது’ ’ என்றாா் அதிமுகவைச் சோ்ந்த முன்னாள் அமைச்சா் வைகைச்செல்வன்.
மெளனம் காக்கும் தேமுதிக: அதிமுக கொடுக்கும் துருப்புச்சீட்டையும், பாஜகவின் அழைப்பையும் தேமுதிக உன்னிப்பாகக் கவனித்தாலும், அது ஒரு கண்ணைத் திமுகவின் பக்கம் கூா்மையாகவே வைத்துள்ளது. திமுகவுக்கும் தேமுதிகவை உள்ளே இழுத்துக் கொள்ளும் எண்ணம் ஓரமாக இருந்தாலும், தற்போது உள்ள கூட்டணியில் எந்தவித சிக்கலும் ஏற்பட்டுவிடக்கூடாது என்பதில் கவனமாக இருக்கிறது.
திமுகவின் தனிக் கணக்கு: 2019 மக்களவைத் தோ்தலில் தமிழகத்தின் 39 தொகுதிகளில் திமுக 20 தொகுதிகளிலும், காங்கிரஸ் 9 தொகுதிகளிலும், மாா்க்சிஸ்ட், இந்திய கம்யூனிஸ்ட், விடுதலைச் சிறுத்தைகள் தலா 2 தொகுதிகளிலும், மதிமுக, கொமதேக, முஸ்லிம் லீக், ஐஜேகே தலா 1 தொகுதியிலும் போட்டியிட்டன.
இந்த ஒதுக்கீடே குறைவானது என கடந்த முறை கூட்டணிக் கட்சிகளிடம் அதிருப்தி நிலவியது. அதனால், தேமுதிகவை உள்ளே இழுக்கும்போது கூடுதல் சிக்கல் ஏற்படும் என திமுக கருதுகிறது. ஒருவேளை, தொகுதிப் பங்கீட்டில் அதிருப்தி ஏற்பட்டு, கூட்டணிக் கட்சிகள் வெளியேறினால் மட்டுமே கூட்டணியில் தேமுதிக இடம்பெற வாய்ப்பு என்கின்றனா் திமுகவினா். இதைப் புரிந்து, தேமுதிகவும் அதற்கேற்ப காய்களை நகா்த்த தயாராகி வருகிறது.
‘‘விஜயகாந்த் காலமான முப்பதாம் நாள் காரியம் ஜனவரி 26-இல் அனுசரிக்கப்பட்டது. இதைத் தொடா்ந்து, மக்களவைத் தோ்தல் குறித்த நடவடிக்கையில் தீவிரம் காட்டுவோம்’’ என்றாா் தேமுதிகவின் மூத்த நிா்வாகி ஒருவா்.
2016 தோ்தலில் தேமுதிகவுடன் கூட்டணி அமைக்க திமுக தலைவராக இருந்த கருணாநிதி முனைப்புக் காட்டினாா். பழம் நழுவி பாலில் விழப் போகிறது என்றும் கூறினாா். ஆனால், அந்தத் தோ்தலில் மக்கள் நலக் கூட்டணியில் முதல்வா் வேட்பாளராக விஜயகாந்த் ஆனாா். கூட்டணி விவகாரத்தில் இடது பக்கம் கையைக் காட்டிவிட்டு, வலது பக்கம் செல்வதில் தேமுதிக சமா்த்து. அதன் முன்னால் இப்போது பல பாதைகள் உள்ளன.
பாஜகவா, திமுகவா, அதிமுகவா அல்லது தனித்தா என்கிற நாற்சந்தியில் திசைகாட்டிகளை உற்று நோக்கியபடி நிற்கிறாா் தேமுதிக தலைவி பிரேமலதா!