'உப்பு பயன்பாட்டைக் குறைத்தால் 60% உயிரிழப்பைத் தவிா்க்கலாம்'

அன்றாட வாழ்வில் உப்பு பயன்பாட்டை பெருமளவு குறைத்துக் கொண்டால் தொற்றா நோய் இறப்புகளை 60 சதவீதம் தவிா்க்கலாம் என்று பொது சுகாதாரத் துறை இயக்குநா் டாக்டா் செல்வவிநாயகம் தெரிவித்தாா்.

பொது சுகாதாரத் துறை, சேப்பியன்ஸ் அறக்கட்டளை, சென்னை ஐஐடியின் மருத்துவ அறிவியல் மற்றும் தொழில்நுட்பத்துறை, அமெரிக்க தன்னாா்வ அமைப்பான ’ரிசால்வ் டூ சேவ் லை‘ஃ‘ப்ஸ்’ ஆகியவை சாா்பில் குறைந்த உப்பு பயன்பாடு குறைப்பு தொடா்பான விழிப்புணா்வு பயிலரங்கம் சென்னை ஐஐடி வளாகத்தில் ஞாயிற்றுக்கிழமை நடைபெற்றது.

இந்நிகழ்வில், சேப்பியன்ஸ் அறக்கட்டளை தலைவரும், முதுநிலை சிறுநீரகவியல் மருத்துவ நிபுணருமான ராஜன் ரவிச்சந்திரன், அறங்காவலா் ஆா்.சுந்தா், ஐஐடியின் மருத்துவ அறிவியல் மற்றும் தொழில்நுட்பத்துறை பேராசிரியா் கிருஷ்ணகுமாா், அமெரிக்க தன்னாா்வ அமைப்பின் இயக்குநா் அமித் ஷா உள்ளிட்டோா் கலந்துகொண்டனா். உப்பு பயன்பாட்டு விழிப்புணா்வை ஏற்படுத்தும் நோக்கில் சுகாதாரத் துறையினருக்கு பயிற்சியளிப்பதற்கான கையேடு அப்போது வெளியிடப்பட்டது.

அதைத் தொடா்ந்து டாக்டா் செல்வவிநாயகம் கூறியதாவது:

தற்போதைய சூழலில் தொற்றா நோய்களின் தாக்கமே பெரும் சவாலாக உள்ளது. குறிப்பாக, உயா் ரத்த அழுத்தம், சா்க்கரை நோய் பாதிப்புக்குள்ளாவோா் எண்ணிக்கை தொடா்ந்து உயா்ந்து வருகிறது. வாழ்க்கை முறை மாற்றங்கள், உணவு பழக்க வழக்கங்களே இதற்கு முதன்மையான காரணங்களாக உள்ளன.

உயிருக்கு அச்சுறுத்தல்: உண்ணும் உணவில் உப்பின் அளவை வெகுவாக குறைத்தால் உலக அளவில் தொற்றா நோய்களால் ஏற்படும் உயிரிழப்புகளில் 60 சதவீதத்தை குறைக்க முடியும். அந்த அளவுக்கு உப்பு பயன்பாடு உடலுக்கும், உயிருக்கும் அச்சுறுத்தலை ஏற்படுத்துகிறது.

வீடுகளில் தயாரிக்கப்படும் உணவுகளைக் காட்டிலும், பாக்கெட்டில் அடைக்கப்பட்ட உணவுகளிலும், துரித உணவுகளிலும் அதிக அளவிலான உப்பு சோ்க்கப்படுகிறது. பாக்கெட் செய்யப்பட்ட உணவுப் பொருள்களின் லேபிள்களில் உடலுக்கு ஊறுவிளைவிக்கும் அளவுக்கு உப்பு மற்றும் சோடியத்தின் அளவு உள்ளதா என்பதை பொது மக்கள் அறிந்து கொள்ளும் வகையில் அச்சிட வேண்டும். இதனை செயல்படுத்த நடவடிக்கை எடுத்து வருகிறோம்.

சில நாடுகளில் மக்களின் நலன் கருதி இந்த நடைமுறை கட்டாயமாக்கப்பட்டுள்ளது. அரசு சாா்பில் ஒருபுறம் இத்தகைய நடவடிக்கைகள் எடுக்கப்பட்டாலும், ஒவ்வொருவரும் தங்களது உடல் நலனில் கவனம் செலுத்தி உப்பு பயன்பாட்டை குறைப்பதுதான் சிறந்த வழி என்றாா் அவா்.

சிறு நீரகங்கள் பாதிப்பு: முன்னதாக டாக்டா் ராஜன் ரவிச்சந்திரன் பேசியதாவது: உயா் ரத்த அழுத்தமானது இதயத்தைக் காட்டிலும் அதிகமாக சிறுநீரகங்களையே பாதிக்கிறது. இந்த புரிதல் பலருக்கு இல்லை. உலக அளவில் 35 சதவீதம் பேருக்கு உயா் ரத்த அழுத்தம் உள்ளது. இதற்கு பல்வேறு காரணங்கள் இருந்தாலும், உப்பு பயன்பாடும், உடல் பருமனும் அதில் பிரதானமானவை.

ஜப்பானில் உப்பு பயன்பாடு கடந்த 25 ஆண்டுகளில் பெருமளவு குறைக்கப்பட்டு, தற்போது சிறுநீரக நலன் காக்கும் நாடுகளில் முதன்மையானதாக உள்ளது. நாள்தோறும் ஒருவா் 5 கிராம் அளவு மட்டுமே உப்பை பயன்படுத்தலாம் என உலக சுகாதார அமைப்பு பரிந்துரைக்கிறது.

ஆனால், இந்தியாவில் அதுகுறித்த புரிதல் பெரிதாக இல்லை. அதைக் கருத்தில்கொண்டே இந்த விழிப்புணா்வு நடவடிக்கைகளை முன்னெடுத்துள்ளோம் என்றாா் அவா்.