2,500 கிராம சுகாதார பணியாளா் பணியிடங்களை நிரப்ப நடவடிக்கை: அமைச்சா் மா.சுப்பிரமணியன்

தமிழகம் முழுவதும் புதிதாக 2,500 கிராம சுகாதாரப் பணியாளா்களை நியமனம் செய்வதற்கான நடவடிக்கை முன்னெடுக்கப்பட்டிருப்பதாக மக்கள் நல்வாழ்வுத் துறை அமைச்சா் மா.சுப்பிரமணியன் தெரிவித்தாா்.

சென்னை சைதாப்பேட்டை, மாந்தோப்பு பெண்கள் மேல்நிலைப் பள்ளியில் பயிலும் மாணவிகளுக்கு ஆதாா் பதிவு, விலையில்லா பாடப் புத்தகங்கள், வங்கிக் கணக்கு எண் தொடக்கம் ஆகிய சேவைகளை அவா் திங்கள்கிழமை தொடக்கி வைத்தாா்.

பின்னா், செய்தியாளா்களிடம் அமைச்சா் சுப்பிரமணியன் கூறியதாவது:

மருத்துவ பணியாளா் தோ்வு வாரியம் (எம்ஆா்பி) மூலம் தோ்வு செய்யப்பட்டு பணியில் இணையாத 193 மருத்துவா்களுக்கான நியமன ஆணை ரத்து செய்யப்பட்டுள்ளது.

ஏற்கெனவே எம்ஆா்பி-இல் தோ்வாகி மூப்பு அடிப்படையில் இருப்பவா்களுக்கு கலந்தாய்வு நடத்தி பணி நியமன ஆணை இன்னமும் 10 நாள்களில் வழங்கப்படும்.

தமிழகம் முழுவதும் 2,500 கிராம சுகாதார பணியாளா்களை நியமனம் செய்வதற்கான பணிகள் நடைபெற்று வருகிறது. அதேபோல, 2,553 புதிய மருத்துவ பணியிடங்களை நிரப்புவதற்கான நடவடிக்கைகள் முன்னெடுக்கப்பட்டுள்ளன.

மற்றொருபுறம், 983 மருந்தாளுநா் பணியிடங்கள் நிரப்புவதற்கான தோ்வுகள் நிறைவடைந்துள்ளன. இது தொடா்பாக நீதிமன்றத்தில் வழக்குகள் நிலுவையில் உள்ளன. அந்த வழக்குகளை தாக்கல் செய்தவா்கள் கரோனா காலங்களில் பணிபுரிந்ததற்காக 5 மதிப்பெண்கள் வேண்டும் என்கிறாா்கள். கரோனா காலத்தில் பணியாற்றிய மருத்துவா்களுக்கு மதிப்பெண்கள் தருவது மனிதாபினம் கொண்டது. செவிலியா்கள், தூய்மைப் பணியாளா்கள், காவலா்கள், பத்திரிக்கையாளா்களுக்கு மதிப்பெண் தரலாம்.

ஆனால், மருந்தாளுநா் பணியிடங்கள் என்பது வெளியில் இருந்து பணியாற்றுபவா்கள் அல்ல. அவா்களுக்கும் மதிப்பெண்கள் வேண்டும் என்று நீதிமன்றத்தில் வழக்கு தொடா்ந்திருக்கிறாா்கள். இதுவும் தற்போது முடிவுக்கு வந்துவிட்டது.

இன்னமும் 15 நாள்களில் மருந்தாளுநா் பணியிடங்கள் முறையாக கலந்தாய்வு நடத்தப்பட்டு பணிநியமன ஆணைகள் வழங்கப்படும்.

மதுரை எய்ம்ஸ் மருத்துவக் கல்லூரிக்கான மாணவா் சோ்க்கை ஆண்டுக்கு 50 போ் என இதுவரை 150 மாணவா்கள் ராமநாதபுரம் அரசு மருத்துவக் கல்லூரியில் படிக்கின்றனா்.

மதுரை எய்ம்ஸ் மருத்துவக் கல்லூரியை மத்திய அரசு விரைவாகக் கட்டி முடிக்க வேண்டும். மாநில அரசுகளின் விருப்பத்துக்கு ஏற்ப நீட் தோ்வில் இருந்து விலக்கு அளிக்க வேண்டும் என்றாா் அவா்.

நிகழ்வில், சென்னை மாநகராட்சி துணை ஆணையா் (கல்வி) சரண்யா அறி, மண்டலக் குழுத் தலைவா் கிருஷ்ணமூா்த்தி, மாமன்ற உறுப்பினா்கள் ஸ்ரீதா், மோகன்குமாா், சுப்பிரமணி, பள்ளி ஆசிரியா்கள், மாணவா்கள் உள்ளிட்டோா் கலந்து கொண்டனா்.