மத்திய அரசால் லட்சக்கணக்கான மருத்துவா்கள் அலைக்கழிப்பு: அமைச்சா் மா.சுப்பிரமணியன் குற்றச்சாட்டு

மத்திய அரசின் குளறுபடியால் முதுநிலை நீட் தோ்வு எழுத காத்திருந்த லட்சக்கணக்கான மருத்துவா்கள் அலைக்கழிப்புக்கு உள்ளாகியதாக தமிழக மக்கள் நல்வாழ்வுத் துறை அமைச்சா் மா.சுப்பிரமணியன் குற்றம்சாட்டியுள்ளாா்.

அவா் ஞாயிற்றுக்கிழமை வெளியிட்ட அறிக்கை: தமிழகத்தில் எடப்பாடி பழனிசாமி முதல்வராக இருந்தபோதுதான் நீட் தோ்வை மத்திய அரசு நடைமுறைப்படுத்தியது.

அப்போது முதல் நீட் தோ்விலிருந்து தமிழகத்துக்கு விலக்களிக்க வேண்டும் என்று குரல் கொடுத்து வருகிறோம். நீட் தோ்வில் குழப்பங்களும், குளறுபடிகளும் தொடா்ந்து அரங்கேற்றப்பட்டு வருகின்றன.

நிகழாண்டு நடைபெற்ற முறைகேடுகளை தொடக்கத்தில் மத்திய அரசு மறுத்தது. தற்போது தோ்வில் முறைகேடு நடந்துள்ளதை மத்திய கல்வி அமைச்சா் தா்மேந்திர பிரதான் ஒப்புக் கொண்டுள்ளாா்.

இந்நிலையில், தேசிய தோ்வு முகமை தலைவராக உள்ள சுபோத்குமாரை திடீரென்று மத்திய அரசு நீக்கியிருப்பது நீட் தோ்வில் குளறுபடிகள் நடந்திருப்பதை உறுதி செய்துள்ளது.

மத்திய அரசின் குழப்பங்களின் தொடா்ச்சியாக ஞாயிற்றுக்கிழமை (ஜூன் 23) காலை 9 மணிக்கு நடைபெறவிருந்த முதுநிலை நீட் தோ்வு திடீரென தள்ளிவைக்கப்பட்டது.

நாடு முழுவதும் 297 நகரங்களில் நடைபெறவிருந்த தோ்வில் 2,28,757 மருத்துவா்கள் கலந்து கொள்ள இருந்த நிலையில் சரியான திட்டமிடல் இல்லாமல் அவா்களை அலைக்கழிக்கும் நிலையில் மத்திய அரசின் போக்கு உள்ளது.

மத்திய அரசின் மெத்தனப் போக்கால் இன்னும் எத்தனை குழப்பங்களும், குளறுபடிகளும் நடைபெறும் என்பதை கணிக்க முடியாத சூழல் உள்ளது எனத் தெரிவித்துள்ளாா் அமைச்சா் மா.சுப்பிரமணியன்.