பள்ளிக் கல்விக்கான நிதி நிறுத்திவைப்பு: நெருக்கடியை எதிா்கொள்வது குறித்து அமைச்சா் அன்பில் மகேஸ் ஆலோசனை

ஒருங்கிணைந்த பள்ளிக் கல்வித் திட்டத்தில் (சமக்ர சிக்ஷா அபியான் - எஸ்.எஸ்.ஏ.), தமிழக பள்ளிக் கல்விக்கு முதல் தவணையாக வழங்க வேண்டிய தொகையை மத்திய அரசு விடுவிக்காத நிலையில், அது தொடா்பாக ஏற்படும் நிதி நெருக்கடி பிரச்னைகளை எதிா்கொள்வது குறித்து பள்ளிக் கல்வித்துறை அமைச்சா் அன்பில் மகேஸ் பொய்யாமொழி அதிகாரிகளுடன் ஆலோசனை நடத்தியுள்ளாா்.

தமிழக பள்ளிக்கல்வித் துறையின் அலுவல் ஆய்வுக் கூட்டம் சென்னை தலைமைச் செயலகத்தில் புதன்கிழமை நடைபெற்றது. இதற்கு அமைச்சா் அன்பில் மகேஸ் பொய்யாமொழி தலைமை வகித்தாா். கூட்டத்தில் பள்ளிக்கல்வித் துறைச் செயலா் சோ.மதுமதி, ஒருங்கிணைந்த பள்ளிக்கல்வி மாநில திட்ட இயக்குநா் மா.ஆா்த்தி, தமிழ்நாடு பாடநூல் கழக மேலாண்மை இயக்குநா் சங்கா், பள்ளிக்கல்வித் துறை இயக்குநா் ச.கண்ணப்பன், தனியாா் பள்ளிகள் இயக்குநா் மு.பழனிசாமி உள்ளிட்ட அதிகாரிகள் கலந்து கொண்டனா்.

இந்த கூட்டம் சுமாா் 2 மணி நேரத்துக்கு மேலாக நடைபெற்றது.

இதில் பள்ளிக் கல்வித் துறையில் நிலுவையில் உள்ள துறை சாா்ந்த சட்டப்பேரவை அறிவிப்புகள், செயல்படுத்தப்பட வேண்டிய புதிய திட்டங்கள், மத்திய அரசிடம் இருந்து வர வேண்டிய நிதி உள்பட பல்வேறு விவகாரங்கள் தொடா்பாக விவாதிக்கப்பட்டது. குறிப்பாக, ஒருங்கிணைந்த பள்ளிக்கல்வித் திட்ட நிதியை மத்திய அரசு நிறுத்தி வைத்திருப்பது குறித்தும், அதுசாா்ந்து மேற்கொள்ள வேண்டிய அடுத்தகட்ட நடவடிக்கைகள் தொடா்பாகவும் ஆலோசனை மேற்கொள்ளப்பட்டது. அப்போது தற்போதைய நிதி நெருக்கடி பிரச்னைகளை எதிா்கொள்ள தேவையான பணிகளை முன்னெடுக்க வேண்டுமென அதிகாரிகளுக்கு அமைச்சா் அன்பில் மகேஸ் அறிவுறுத்தினாா்.

தலைமைச் செயலருடன் ஆலோசனை: இதற்கிடையே பள்ளிக்கல்வித் துறையின் ஆய்வுக் கூட்டத்துக்கு முன்பாக அமைச்சா் அன்பில் மகேஸ், தமிழக அரசின் தலைமைச் செயலா் நா.முருகானந்தத்தை புதன்கிழமை நேரில் சந்தித்தாா்.

அப்போது பிஎம் ஸ்ரீ பள்ளிகள் திட்டத்தில் இணைவது, மத்திய அரசுக்கு அழுத்தம் கொடுத்து ஒருங்கிணைந்த பள்ளிக்கல்வி திட்டத்துக்கான நிதியைப் பெறுவது உள்ளிட்ட விவகாரங்கள் குறித்து ஆலோசனை மேற்கொண்டதாக துறை அதிகாரிகள் தகவல் தெரிவித்தனா்.