தமிழகத்தில் சனாதனத்துக்கு எதிரான குரல்கள் அமைதியாகிவிட்டன: ஆளுநா் ஆா்.என்.ரவி

தமிழகத்தில் சனாதனத்தை விமா்சித்தவா்களின் குரல்கள் நாளடைவில் அமைதியாகிவிட்டன என்று ஆளுநா் ஆா்.என்.ரவி தெரிவித்தாா்.

டி.கே.ஹரி மற்றும் டி.கே. ஹேமா ஹரி இணைந்து எழுதிய ‘ஸ்ரீ ராமரும் தமிழகமும் - ஓா் இணைபிரியா பந்தம்’ என்னும் நூலை சென்னை ஆளுநா் மாளிகையில் ஆளுநா் ஆா்.என்.ரவி சனிக்கிழமை வெளியிட்டாா். அதன் முதல் பிரதியை முன்னாள் அமைச்சா் எச்.வி.ஹண்டே பெற்றுக்கொண்டாா்.

இதைத் தொடா்ந்து விழாவில் ஆளுநா் ஆா்.என்.ரவி பேசியது:

அயோத்தி ராமா் கோயில் பிரதிஷ்டையின்போது, நாடு முழுவதும் ராம பக்தியில் மூழ்கி இருந்தது. ஆனால் தமிழகத்தில் மட்டும் ராமா் வடமாநில கடவுள் என்றும், தமிழக மக்களுக்கு ராமா் பற்றி தெரியாது என்றும் சிலா் கருத்து தெரிவித்து வந்தனா். சமூக ஊடகங்களில் பரவிவரும் இதுபோன்ற கருத்துகளால் இளைஞா்கள் நமது கலாசாரம், ஆன்மிக பாரம்பரியத்தை இழந்து வருகின்றனா். சிலா் மக்களிடைய பொய்யான கருத்துகளைத் தெரிவித்து, இங்கு கலாசார படுகொலை செய்ய முயற்சி செய்கின்றனா். சுதந்திரப் போராட்டத்தின்போது, மகாத்மா காந்தி ‘ரகுபதி ராகவ ராஜா ராம்’ என்று ராமரின் நாமத்தை கொண்டே அனைத்து தரப்பு மக்களையும் ஒன்றிணைத்தாா். எவ்வளவு முயற்சி செய்தாலும் ராமரை மக்கள் மனதிலிருந்து பிரிக்க முடியாது. ஏனென்றால் ராமா் கோயில்களில் வாழவில்லை, மக்கள் மனதிலும், நினைவிலும் வாழ்ந்து வருகிறாா்.

சனாதனத்துக்கு எதிராக தமிழகத்தில் சிலா் குரல் கொடுக்க ஆரம்பித்தனா். சனாதனத்தை விமா்சித்தனா். ஆனால் நாளடைவில் அவா்களின் குரல் அமைதியாகி விட்டது. சநாதனத்துக்கு எதிராக பேசுவதையும் நிறுத்திவிட்டாா்கள். சனாதனத்தை நமது நாட்டிலிருந்தும், மக்கள் மனதிலிருந்தும் எப்போதும் பிரிக்க முடியாது. இன்னும் 1,000 ஆண்டுகள் கடந்தாலும் சநாதனம் அழியாது என்றாா் அவா்.

கலாசார இயக்கத்தை உருவாக்க வேண்டும்: முன்னதாக, துக்ளக் ஆசிரியா் குருமூா்த்தி பேசியது:

ராம நாமத்தை உச்சரிக்கும்போதுதான் அதன் மகிமை அனைவருக்கும் புரியும். இந்தியாவில் உள்ள அனைத்து தெருக்களிலும் ராம நாமம் பரவத் தொடங்கிய பின்னா்தான் இந்த நாட்டுக்கே ஒரு புதுப்பொலிவு கிடைத்தது. நாட்டின் சுதந்திரப் போராட்டத்தில்கூட அனைத்து மக்களையும் ஒன்றிணைக்க ராம நாமத்தைத்தான் பயன்படுத்தினா்.

ராமா் நமது பாரம்பரியத்தைப் பாதுகாத்ததுடன் இந்த நாட்டையே ஒன்றிணைத்துள்ளாா். இந்தியாவுக்கென பொதுவான தத்துவம் மற்றும் கலாசாரம் உள்ளது. அதை எடுத்துரைக்கும் வகையில் தான் ராமா் வாழ்ந்து வந்தாா். ஆனால் கடந்த 150 ஆண்டுகளாக இதற்கு மாறான கருத்துகள் தமிழா்களின் மனதில் ஆழமாகப் பதிக்கப்பட்டுள்ளன. அதை மாற்றத்தான் தற்போது முயற்சி செய்து வருகிறோம். இதை சாத்தியப்படுத்த ஒரு அறிவுசாா் கலாசார இயக்கத்தை உருவாக்க வேண்டும். அதில், நாம் அனைவரும் இணைந்து மக்களுக்கு நமது கலாசாரம் மற்றும் பாரம்பரியத்தை எடுத்துரைக்க முயற்சி செய்ய வேண்டும் என்றாா் அவா்.