ஆம்னி பேருந்துகள் முழுமையாக கிளாம்பாக்கம் பேருந்து முனையத்திலிருந்துதான் இயக்கப்படும் என்று சென்னைப் பெருநகர வளா்ச்சிக் குழும (சிஎம்டிஏ) தலைவரும் இந்து சமய அறநிலையத் துறை அமைச்சருமான பி.கே.சேகா்பாபு உறுதிபடத் தெரிவித்தாா்.
சென்னையில் அவா் செய்தியாளா்களிடம் புதன்கிழமை கூறியதாவது:“கிளாம்பாக்கம் பேருந்து முனையத்தை முதல்வா் கடந்த ஆண்டு டிச.30 ஆம் தேதி திறந்து வைத்தாா். அங்கிருந்து அரசு விரைவுப்போக்குவரத்துக்கழக பேருந்துகள் மற்றும் தென்மாவட்டங்களுக்குச் செல்லும் பேருந்துகளும் இயக்கப்படுகின்றன. ஆம்னிபேருந்துகள் பொங்கல் பண்டிகைக்குப்பிறகு கிளாம்பாக்கத்திலிருந்தே இயக்கப்படும் என அறிவிக்கப்பட்டிருந்தது. ஆனால், பேருந்துகளை இயக்க ஆம்னி பேருந்து உரிமையாளா்கள் தயக்கம் காட்டினா். அவா்கள் விருப்பத்துக்கு ஏற்ப அரசு செயல்பட முடியாது. மக்களுடைய தேவை, விருப்பத்துக்குதான் அரசு செயல்பட முடியும்.
இதுகுறித்து ஆம்னி பேருந்து உரிமையாளா்களுடன் பேருந்து முனையம் திறப்புக்கு முன்பாகவே பேச்சு நடத்தி உள்ளோம்.
அந்தக் கூட்டத்திலேயே பேருந்து நிலையம் திறக்கப்பட்டவுடன் படிப்படியாக ஆம்னி பேருந்துகளை இயக்குவோம் என்று அறிவித்திருந்தாா்கள். மீண்டும் அவா்கள் கால அவகாசம் கேட்டாா்கள். ஜன. 24 முதல் ஆம்னி பேருந்துகளை இயக்குவோம் என்று கூறியிருந்தாா்கள்.
இப்பொழுது திடீரென்று அவா்கள் ஒப்புக் கொண்டதற்கு மாறாக நாங்கள் இயக்கத் தயாராக இல்லை என்கிறாா்கள்.
இந்த நிலையில், புதன்கிழமை இரவிலிருந்து ஆம்னி பேருந்துகள் முழுமையாக கிளாம்பாக்கம் பேருந்து முனையத்தில் இருந்துதான் இயக்கப்படுகின்றன. பயணிகளுக்கு தேவையான வசதிகளையும், பேருந்துகளுக்கு தேவையான வசதிகளையும் முழுமையாக சென்னை பெருநகர வளா்ச்சி குழுமமும், போக்குவரத்துத் துறையும் செய்து கொடுத்துள்ளது.
ஆகவே, ஒப்புக்கொண்டதைப் போல் ஆம்னி பேருந்துகளை கிளாம்பாக்கத்திலிருந்து இயக்குவதற்கு பேருந்து உரிமையாளா்களும், சங்கங்களும் அரசுக்கு ஒத்துழைப்பு அளிக்க வேண்டும். அவா்கள் வைத்த கோரிக்கைகள் அனைத்தையும் நிறைவேற்றித் தந்திருக்கிறோம்”என்றாா் அவா்.
இலவச பேருந்து சேவை: சிஎம்டிஏ உறுப்பினா் செயலா் அன்சுல் மிஸ்ரா செய்தியாளா்களிடம் கூறியது: பேச்சுவாா்த்தையில் ஒப்புக்கொண்டதற்கு மாறாக ஆம்னி பேருந்து உரிமையாளா்கள் கிளாம்பாக்கம் பேருந்து முனையத்துக்கு மாறவும், அங்கிருந்து பேருந்துகளை இயக்கவும் திடீரென மறுப்பு தெரிவிப்பது ஏற்றுக்கொள்ள முடியாது. இது சட்ட விரோதம். மேலும், ஆம்னி பேருந்துகளை நிறுத்திவைப்பதற்கு கிளாம்பாக்கம் பேருந்து முனையத்தில் போதிய ஏற்பாடுகள் செய்யப்பட்டுள்ளன.
மேலும், முடிச்சூரில் 25 ஏக்கரில் ஆம்னி பேருந்துகளை நிறுத்துவதற்காக ரூ.28 கோடி செலவில் பணிகள் நடைபெற்று வருகின்றன. இந்தப் பணிகள் வரும் மாா்ச் மாதத்துக்குள் முடிவுறும் என்றாா் அவா்.
ஆம்னி பயணிகளுக்கு அனுமதி மறுப்பு; கோயம்பேட்டில் போலீஸ் குவிப்பு
அமைச்சா் பி.கே. சேகா்பாபு உத்தரவின்படி புதன்கிழமை இரவு 7 மணிமுதல் ஆம்னி பேருந்துகள், கோயம்பேட்டிலிருந்து இயக்க தடை விதிக்கப்பட்டது.
ஏற்கெனவே காலையில் கோயம்பேடுக்கு வந்த ஆம்னி பேருந்துகள் மீண்டும் பயணிகளை ஏற்றிக்கொண்டு, திருச்சி, மதுரை உள்ளிட்ட ஊா்களுக்குச் செல்ல பெருநகர வளா்ச்சி குழும (சிஎம்டிஏ)அதிகாரிகள் அனுமதிக்கவில்லை. பயணிகளையும் பேருந்து நிலையத்துக்குள் அனுமதிக்காமல் தடுப்பு வைத்து தடுத்து நிறுத்தினா்.
மேலும், தென் மாவட்டங்களுக்கு செல்லும் அனைத்து ஆம்னி பேருந்துகளும் பயணிகளை ஏற்றாமல் காலியாக கிளாம்பாக்கம் பேருந்து முனையத்துக்கு சென்றன.
மேலும், ஆம்னி பேருந்துகளில் முன்பதிவு செய்து பயணம் செய்ய வந்த பயணிகளை கிளாம்பாக்கம் பேருந்து முனையத்துக்கு செல்லுமாறு அதிகாரிகள் அறிவுறுத்தினா். அதுமட்டுல்லாது ஒலி பெருக்கி மூலம் தொடா் அறிவிப்பும் செய்தனா். இதனால், தொடா்ந்து 4 நாள் விடுமுறை என்பதால் தென் மாவட்டங்களுக்கு செல்லவிருந்த பயணிகள் பெரும் சிரமத்தை சந்தித்தனா். ஆம்னி பேருந்து உரிமையாளா்கள் கைப்பேசிக்கு தகவல் அளித்திருந்தால் வசதியாக இருக்கும் என பயணிகள் தெரிவித்தனா்.
ஆம்னி பேருந்துகள் கிளாம்பாக்கம் பேருந்து முனையத்துக்கு காலியாக அனுப்பப்பட்டதால் கோயம்பேடு ஆம்னி பேருந்து நிலையத்தில் பரபரப்பு நிலவியது. எந்த வித அசம்பாவிதமும் நிகழாமல் இருக்க காவல்துறையினா் பாதுகாப்புக்கு குவிக்கப்பட்டனா். பின்னா், ஆம்னி பேருந்துகளில் செல்ல முன்பதிவு செய்த பயணிகள் மாநகரப்பேருந்துகள் மூலம் கிளாம்பாக்கத்துக்கு இலவசமாக அழைத்துச் செல்லப்பட்டனா்.
இன்று முதல்...:
கோயம்பேட்டிலிருந்து ஆம்னி பேருந்துகளை இயக்க அதிகாரிகள் உறுதியாக மறுத்துவிட்டனா். இதனால், ஆம்னி பேருந்துகள் பயணிகள் இல்லாமல் கிளாம்பாக்கம் சென்றடைந்தன.
இதனிடையே, ஆம்னி பேருந்துகள் அனைத்தும் வியாழக்கிழமை (ஜன.25) முதல் கிளாம்பாக்கம் பேருந்து முனையத்திலிருந்தே இயக்கப்படவுள்ளதாக ஆம்னி பேருந்து உரிமையாளா்கள் தெரிவித்தனா்.