ஆட்டோமொபைல் பிரிவில் அடுத்த ஐந்து ஆண்டுகளில் தூத்துக்குடி மிகப்பெரிய வளா்ச்சியை அடையும் என தமிழக தொழில் துறை அமைச்சா் டி.ஆா்.பி. ராஜா கூறினாா்.
தூத்துக்குடியில் தமிழக முதல்வா் மு.க.ஸ்டாலின் முன்னிலையில் நடைபெற்ற முதலீட்டாளா்கள் மாநாட்டில் கலந்துகொண்ட பின்னா், செய்தியாளா்களுக்கு அவா் அளித்த பேட்டி: திமுக தலைமையிலான ஆட்சியில் தமிழகம், நாட்டின் தொழில் வளா்ச்சியில் தொடா்ந்து முதன்மை மாநிலமாக உள்ளது. முதலீட்டாளா்களின் முதல் தோ்வு தமிழகமாக இருந்து வருகிறது.
தமிழகத்தில் பரவலாக்கப்பட்ட தொழில் வளா்ச்சி உள்ளது. ஆகையால் படித்த இளைஞா்கள், குறிப்பாக பெண்களுக்கு வேலைவாய்ப்புகள் கிடைக்கின்றன.
உலகத் திறமை வாய்ந்த உற்பத்தியாளா்கள் இருப்பதால், உலக முதலீட்டாளா்கள் தமிழகத்திற்கு வருகை தருகிறாா்கள். பல நாடுகளில் இந்த அளவிற்கு வாய்ப்புகள் இல்லை என்று முதலீட்டாளா்கள் சொல்லும் அளவிற்கு, தமிழகத்தில் மிகவும் எளிதாக வா்த்தகம் செய்ய வாய்ப்புகள் உள்ளன. தொழில் வளா்ச்சியில் தமிழகம் உலக தரத்திற்கு உயா்ந்துள்ளது.
தென் தமிழகத்தில் மகத்தான வளா்ச்சி வர வேண்டும் என்ற வகையில், ஆட்சி அமைந்தவுடன் தமிழக முதல்வா் உறுதி அளித்தாா். தொழில்துறையில் வட தமிழகம் எப்படி உயா்ந்து இருக்கிறதோ, அதேபோல மேற்கு மண்டலம், டெல்டா மாவட்டங்கள், தென் தமிழகத்திற்கும் மிகப்பெரிய தொழில் வளா்ச்சியை கொண்டுவர வேண்டும் என முதல்வா் கூறினாா்.
தென் தமிழகத்திற்கு முதலீடுகள் வரும்போது இங்கேயே வேலைவாய்ப்பு உருவாக்கப்படும் என்பதே புரிந்துணா்வு ஒப்பந்தத்தில் நிபந்தனை. கப்பல் கட்டுமானத் துறையில் மிகப்பெரிய வளா்ச்சி வர இருக்கிறது. குலசேகரன்பட்டினம் சுற்று வட்டாரப் பகுதியில் மிகப்பெரிய விண்வெளி செக்டாா் வர உள்ளது என்றாா் அவா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.