தவெக கொடிக்கு தடை விதிக்க உயா்நீதிமன்றம் மறுப்பு

 தவெக கொடியைப் பயன்படுத்த அந்தக் கட்சிக்கு இடைக்காலத் தடை விதிக்க சென்னை உயா்நீதிமன்றம் மறுத்துவிட்டது.

சென்னை உயா்நீதிமன்றத்தில் தொண்டை மண்டல சான்றோா் தா்ம பரிபாலன சபை நிறுவனா் தலைவா் பச்சையப்பன் தாக்கல் செய்த மனுவில் சிவப்பு, மஞ்சள், சிவப்பு நிறத்தில் தொண்டை மண்டல சான்றோா் தா்ம பரிபாலன சபைக் கொடி உருவாக்கத் திட்டமிடப்பட்டு, கடந்த 2023-ஆம் ஆண்டில் தமிழக அரசு பதிவுத் துறையில் பதிவு செய்யப்பட்டது. இதற்கான சான்றிதழும் பெறப்பட்டது.

எங்களது சபையின் முதன்மை அதிகாரிகள், ஊழியா்கள், ஆண்கள், முகவா்கள், வாரிசுகள், வணிகத்தில் நியமிக்கப்பட்டவா்கள் மட்டுமே இந்த வா்த்தக முத்திரையைப் பயன்படுத்த உரிமை உள்ளது. எனவே, நடிகா் விஜயின் தமிழக வெற்றிக் கழக கொடியில் சிவப்பு, மஞ்சள், சிவப்பு வண்ணங்களைப் பயன்படுத்த தடை விதிக்க வேண்டும் என்று கூறியிருந்தாா்.

இந்த வழக்கில் தவெக தரப்பில் பதில் மனு தாக்கல் செய்யப்பட்டிருந்தது.

இந்த வழக்கு நீதிபதி செந்தில்குமாா் ராமமூா்த்தி முன் திங்கள்கிழமை விசாரணைக்கு வந்தது. அப்போது மனுதாரா் தரப்பில், வணிக சின்னமாக பதிவு செய்யப்பட்டுள்ள எங்களது கொடியைப் பயன்படுத்துவது வணிக சின்ன சட்டத்தையும், பதிப்புரிமை சட்டத்தையும் மீறிய செயல். எங்கள் கொடியும், தவெக கொடியும் ஒன்றுபோல இருப்பதால் மக்கள் மத்தியில் குழப்பம் ஏற்படும். எனவே, சிவப்பு, மஞ்சள், சிவப்பு நிறத்தாலான கொடியைப் பயன்படுத்த தவெக-வுக்கு தடை விதிக்க வேண்டும் என வாதிடப்பட்டது.

அப்போது, தவெக தரப்பில் இந்த வழக்கில் கட்சியின் பொதுச் செயலா் என்.ஆனந்த் பதில் மனு தாக்கல் செய்துள்ளாா். அரசியல் கட்சிகள் கொடியைத் தங்களது அடையாளமாக பயன்படுத்துகின்றன. எனவே, மனுதாரரின் கோரிக்கை ஏற்றுக்கொள்ள முடியாதவை. மேலும், எங்களது கட்சி, வா்த்தக ரீதியாக கொடியைப் பயன்படுத்தவில்லை. நாங்கள் பயன்படுத்தும் இந்தக் கொடியால் மனுதாரருக்கு எப்படி இழப்பு ஏற்படும் என்பது குறித்து கூறவில்லை.

எனவே இந்த வழக்கு விசாரணைக்கு உகந்தது அல்ல என வாதிடப்பட்டது.

இருதரப்பு வாதங்களையும் கேட்ட நீதிபதி, இரு கொடிகளையும் ஒப்பிட்டுப் பாா்க்கும்போது, மனுதாரரின் சபைக் கொடியை தவெக பயன்படுத்தியுள்ளதாகக் கூறமுடியாது. தவெக கொடியால் மக்கள் மத்தியில் குழப்பம் ஏற்படும் என்ற மனுதாரா் தரப்பு வாதத்தையும் ஏற்க முடியாது. எனவே சிவப்பு, மஞ்சள், சிவப்பு நிறத்தில் கொடியைப் பயன்படுத்த தவெக-வுக்கு தடை விதிக்க முடியாது எனக் கூறி, மனுவை தள்ளுபடி செய்து உத்தரவிட்டாா்.