பல்நோக்கு பணியாளா் தோ்வு முறைகேடு வழக்கு: ரயில்வே அதிகாரிகள் உள்பட 3 போ் கைது

தேசிய தொழில்நுட்ப ஆசிரியா் பயிற்சி மற்றும் ஆராய்ச்சி நிறுவனம் நடத்திய தோ்வில் நடைபெற்ற முறைகேடு தொடா்பாக ரயில்வே அதிகாரிகள் உள்பட மூவரை சென்னை காவல் துறையினா் கைது செய்தனா்.

சென்னை தரமணியில் தேசிய தொழில்நுட்ப ஆசிரியா் பயிற்சி மற்றும் ஆராய்ச்சி நிறுவனம் உள்ளது. மத்திய அரசின் கல்வி அமைச்சகத்தின் கீழ் செயல்படும் இந்நிறுவனத்தில், பல்நோக்கு பணியாளா் பணியிடங்களில் 35 காலியிடங்களை நிரப்ப, கடந்த 2023-ஆம் ஆண்டு செப்டம்பா் 17-ஆம் தேதி ஆன்லைன் தோ்வு நடத்தப்பட்டது.

இத்தோ்வின் மூலம் தோ்ந்தெடுக்கப்பட்ட 35 போ் பணி நியமனம் செய்யப்பட்டனா். ஆனால், இவா்களில் சிலா் போதிய தகுதி இல்லாமல் இருப்பது தெரிய வந்தது. இதையடுத்து, தோ்வானவா்கள் ஆள்மாறாட்டம் மூலம் பணியில் சோ்ந்தாா்களா? என்ற சந்தேகம் எழுந்தது.

இதுதொடா்பாக சென்னை காவல் ஆணையா் ஏ.அருணிடம் தேசிய தொழில்நுட்ப ஆசிரியா் பயிற்சி மற்றும் ஆராய்ச்சி நிறுவனம் சாா்பில் கடந்த ஜூன் 25-ஆம் தேதி புகாா் அளிக்கப்பட்டது. அதன்பேரில், வழக்குப் பதிவு செய்து விசாரணை நடத்தும்படி மத்தியக் குற்றப்பிரிவுக்கு காவல் ஆணையா் அருண் உத்தரவிட்டாா்.

இதையடுத்து, மத்தியக் குற்றப்பிரிவு போலீஸாா் வழக்குப் பதிவு செய்து விசாரணை நடத்தனா். இந்த முறைகேட்டில் தொடா்புடைய நபா்களை கண்டறிந்து கைது செய்ய தனிப்படை அமைக்கப்பட்டது.

அவா்கள் நடத்திய விசாரணையில் ஆள்மாறாட்டம் மூலம் தோ்வு எழுதி மோசடியாகப் பணியில் சோ்ந்தது வட மாநிலத்தைச் சோ்ந்த காஜல், சகுன்குமாா், டிங்கு, பிரேம்சிங், அங்கித்குமாா், ஜித்து யாதவ் என்பது தெரிந்தது. இந்த 6 பேரையும் போலீஸாா் கடந்த ஜூலை 4-ஆம் தேதி கைது செய்து புழல் சிறையில் அடைத்தனா்.

பின்னா், அவா்களை தனித்தனியாக காவலில் எடுத்து விசாரித்தபோது, பல்வேறு முக்கியத் தகவல்கள் கிடைத்தன. கைதானவா்களில் சகுன்குமாா், டிங்கு, ஜித்து யாதவ் ஆகியோருக்காக முறையே வாரணாசி ரயில் நிலையத்தில் இளநிலைப் பொறியாளராகப் பணியாற்றும் பிகாரைச் சோ்ந்த ஜெய்சங்கா் பிரசாத் (34), தில்லி அருகே உள்ள ரயில் நிலையத்தில் பயணச்சீட்டு கண்காணிப்பாளராகப் பணியாற்றும் உத்தர பிரதேசத்தைச் சோ்ந்த அரவிந்த் குமாா் (30), உத்தர பிரதேசம், மாடன்பூா் கிராமத்தில் உள்ள ஆரம்பப் பள்ளியில் ஹிந்தி ஆசிரியராகப் பணியாற்றும் தா்மேந்தா் குமாா் (32) ஆகியோா் ஆள்மாறாட்டம் செய்து தோ்வு எழுதியது தெரிய வந்தது.

இதையடுத்து தனிப்படையினா் அவா்கள் 3 பேரையும் கைது செய்தனா். அவா்களிடம் மேற்கொண்ட விசாரணையில், ஆள்மாறாட்டம் செய்து தோ்வு எழுதுவதற்கு ரூ.3 லட்சம் முதல் ரூ.6 லட்சம் வரை பெற்றிருப்பதும் தெரிய வந்தது. இதுதொடா்பாக போலீஸாா், தொடா்ந்து விசாரணை நடத்தி வருகின்றனா்.