என்எல்சி-க்கு எதிராக ஊழல், விதிமீறல் புகாா்கள்: விசாரணைக்கு உத்தரவிட பிரதமரிடம் வலியுறுத்தல்!

நமது சிறப்பு நிருபா்

நெய்வேலி நிலக்கரி நிறுவனம் ஒடிசா மாநிலத்தில் செயல்படுத்தி வரும் வீட்டு வசதி கட்டுமானம் மற்றும் காா்ப்பரேட் சமூக பொறுப்புணா்வு (சிஎஸ்ஆா்) ஒதுக்கீட்டில் விதிகளை மீறி செயல்படுத்துவதாக எழும் புகாா்கள் குறித்து விசாரிக்க பிரதமா் நரேந்திர மோடி உத்தரவிட வேண்டும் என்று கடலூா் மக்களவைத் தொகுதி காங்கிரஸ் உறுப்பினா் டாக்டா் விஷ்ணு பிரசாத் வலியுறுத்தியுள்ளாா்.

இது தொடா்பாக மக்களவையில் கடந்த வியாழக்கிழமை (டிசம்பா் 11) தான் எழுப்பிய விஷயம் தொடா்பாக தில்லியில் அவா் செய்தியாளா்களிடம் சனிக்கிழமை கூறியதாவது:

நெய்வேலி நிலக்கிரி நிறுவனம், அதன் புனரமைப்பு மற்றும் மறுவாழ்வு திட்டத்தின் கீழ் ஒடிசாவில் வீடுகளைக் கட்ட ஒரு தனியாா் ஒப்பந்தக்காரருக்கு பணி ஆணையை வழங்கியது. ஒரு குறிப்பிட்ட விலையில் பணி ஆணை வழங்கப்பட்ட பிறகு, பொது நிதி விதிகளுக்கு (ஜிஎஃப்ஆா்) முரணாக, மீண்டும் அந்த விலையில் திருத்தம் செய்யப்பட்டு, செயல்பாட்டுக்கான கால அவகாசமும் நீட்டிக்கப்பட்டது.

இத்துடன் நிலக்கரி சாம்பல் விற்பனைக்கு இரண்டு முறை கால நீட்டிப்பு வழங்கப்பட்டதால், பெரும் இழப்பு ஏற்பட்டது. மேலும், காா்ப்பரேட் சமூக பொறுப்புணா்வு (சிஎஸ்ஆா்) நிதிகளைக் கையாள்வதிலும் பெரும் முறைகேடுகள் நடந்ததாக தொடா்ச்சியாக ஊடகங்களில் செய்திகள் வெளிவருகின்றன. இந்த விவகாரம் தொடா்பாக மத்திய புலனாய்வுத் துறை (சிபிஐ) விசாரணைக்கும் கோரப்பட்டுள்ளது.

இந்த விஷயத்தில் பிரதமா் நரேந்திர மோடி உடனடியாகத் தலையிட்டு, விரிவான விசாரணைக்கு உத்தரவிட வேண்டும். தவறு செய்த அதிகாரிகள் மீது நடவடிக்கை எடுக்க வேண்டும். இந்த விஷயத்தை மக்களவையில் எழுப்பினேன். பிரதமரை சந்திக்கவும் நேரம் கேட்டு காத்திருக்கிறேன் என்றாா்.

முழு பின்னணி: ஒடிசாவில் உள்ள ’தலபிரா’ என்பது நிலக்கரி சுரங்கங்கள் மற்றும் அனல் மின் நிலையங்கள் அமைந்துள்ள ஒரு பகுதியாகும். இதில் என்எல்சி மற்றும் பெரும் தொழில் நிறுவனமான அதானி குழுமம் போன்றவை நிலக்கரி திட்டங்களைச் செயல்படுத்தி வருகின்றன.

இதில் என்எல்சி 3,200 மெகாவாட் திறன் கொண்ட ஒரு பெரிய நிலக்கரி சுரங்கத்துடன் இணைந்த அனல் மின் நிலையத்தை உருவாக்கி வருகிறது. இதில் 800 மெகாவாட் திறன் கொண்ட பல அலகுகள் அடங்கும்.

இந்த தலபிரா அனல்மின் திட்ட குடியிருப்புப் பகுதி கட்டுமானப் பணிக்கு அதிக விலையில் ஒப்பந்தம் வழங்கியது, மலேசியா மற்றும் சிங்கப்பூரில் ஒரு கூட்டு முயற்சிக்கு எக்ஸிம் வங்கியிடம் போலி ஆவணங்களைச் சமா்ப்பித்தது, சாம்பல் குவிக்கப்பட்ட குளத்தை ஒப்பந்தமின்றி மிகக்குறைந்த விலைக்கு விற்றது, மத்திய தொழிலக பாதுகாப்புப் படைக்கு வீட்டுவசதி கட்டுமானத்தை திட்டத்தில் இடம்பெறாமல் தவிா்த்தது, மருத்துவமனை, விளையாட்டரங்கத்தின் பரப்பளவை உரிய ஒப்புதலின்றி குறைத்தது, பெருநிறுவன சமூகப் பொறுப்புத் திட்டங்களின் கீழ் நிதி வழங்குவதில் கையூட்டுப் பெற்ாக குற்றஞ்சாட்டி என்எல்சிக்கு எதிராக சென்னை உயா்நீதிமன்றத்தில் மணிகண்டன் என்பவா் சாா்பில் வழக்கு தொடரப்பட்டுள்ளது. இதன் தீா்ப்பு தேதி குறிப்பிடாமல் பல மாதங்களுக்கு முன்பு ஒத்திவைக்கப்பட்டது.