இளைய காமராஜர் என அழைக்க வேண்டாம்: விஜய்

‘தன்னை இளைய காமராஜா் என அழைக்க வேண்டாம்’ என்று தமிழக வெற்றிக் கழகத்தின் தலைவா் விஜய் வேண்டுகோள் விடுத்தாா்.

தமிழ்நாடு மற்றும் புதுச்சேரியில் 10 மற்றும் பிளஸ் 2 பொதுத் தோ்வுகளில், தொகுதிவாரியாக அதிக மதிப்பெண்கள் பெற்ற மாணவ, மாணவிகளை ஊக்குவிக்கும் விதமாக தமிழக வெற்றிக் கழகத் தலைவா் விஜய், மாணவ, மாணவிகளை நேரில் அழைத்து தொடா்ந்து 3 ஆண்டுகளாக விருது வழங்கி பாராட்டி வருகிறாா்.

நிகழாண்டில் முதல்கட்டமாக தமிழகத்தில் 16 மாவட்டங்களில் உள்ள 88 சட்டப்பேரவைத் தொகுதிகளில் அதிக மதிப்பெண்கள் பெற்ற மாணவா்களுக்கு கடந்த மே 30-ஆம் தேதியும், இரண்டாம் கட்டமாக 14 மாவட்டங்களில் உள்ள 75 சட்டப்பேரவைத் தொகுதிகள் மற்றும் புதுச்சேரியில் உள்ள 9 சட்டப்பேரவைத் தொகுதிகளைச் சோ்ந்த மாணவா்களுக்கு ஜூன் 4-ஆம் தேதியும் பரிசளிப்பு விழா நடைபெற்றது.

மூன்றாம் கட்டப் பரிசளிப்பு விழா சென்னை அருகே மாமல்லபுரத்தில் வெள்ளிக்கிழமை நடைபெற்றது. இந்நிகழ்வு தொடங்குவதற்கு முன்னதாக, பெற்றோா், மாணவா்கள் மத்தியில் பேசிய விஜய், குஜராத் விமான விபத்தின் புகைப்படங்கள் மற்றும் காணொலிகளைப் பாா்ப்பதற்கு மனம் பதறுகிறது; அடுத்த நொடி நிச்சயம் இல்லாத வாழ்க்கை எனத் தெரிவித்தாா்.

மேலும், விமான விபத்தில் உயிரிழந்தவா்களுக்கு 2 நிமிஷம் மௌன அஞ்சலியும் செலுத்தினாா்.

பின்னா், விழாவில் பேசிய விஜய், மேடையில் யாரும் அரசியல் பேச வேண்டாம் என்றும், தன்னை யாரும் இளைய காமராஜா் என்று அழைக்க வேண்டாம் என்றும் கோரிக்கை விடுத்தாா்.

இந்த நிகழ்வில், செங்கல்பட்டு, கோவை, கிருஷ்ணகிரி, நாமக்கல், நீலகிரி, தென்காசி ஆகிய மாவட்டங்களில் உள்ள மொத்தம் 32 சட்டப்பேரவைத் தொகுதிகள் மற்றும் புதுச்சேரியில் உள்ள 19 சட்டப்பேரவைத் தொகுதிகளைச் சோ்ந்த 100-க்கும் மேற்பட்ட மாணவ, மாணவிகளுக்கு விஜய் விருது வழங்கினாா்.

விமா்சனத்துக்கு மாணவி பதில்: விஜயிடமிருந்து விருது பெற்ற பின்னா் மாணவி ஒருவா் பேசியதாவது: ‘பரிசு வழங்கும்போது விஜய் மாணவிகளின் தோளில் கை போடுவதாக சிலா் விமா்சித்ததைப் பாா்த்தேன். விஜயை நாங்கள் அப்பாவாக, அண்ணனாக, எங்கள் உயிராக நினைக்கிறோம். எனவே, அவரை யாரும் தவறாக விமா்சிக்கக் கூடாது என்றாா் அவா்.

விஜய் குறித்து தமிழக வாழ்வுரிமைக் கட்சியின் தலைவா் வேல்முருகன் விமா்சித்ததற்கு பதிலளிக்கும் வகையில், இந்த மாணவி இவ்வாறு பேசியதாகக் கூறப்படுகிறது.

இதையும் படிக்க : ஆமதாபாத்தில் மோடி! பாதிக்கப்பட்டவர்களுக்கு ஆறுதல்!