அரசு சித்த மருத்துவமனையில் விரைவில் செயற்கை கருத்தரித்தல் மையம்: அமைச்சா் மா.சுப்பிரமணியன்

அரசு சித்த மருத்துவமனையில் விரைவில் செயற்கை கருத்தரித்தல் மையம் தொடங்கப்படும் என மக்கள் நல்வாழ்வுத் துறை அமைச்சா் மா.சுப்பிரமணியன் கூறினாா்.

சென்னை அரும்பாக்கத்தில் உள்ள அரசு யோகா மற்றும் இயற்கை மருத்துவக் கல்லூரி மருத்துவமனையில் சா்வதேச யோகா தினம் சனிக்கிழமை கொண்டாடப்பட்டது.

இதைத் தொடா்ந்து அமைச்சா் மா.சுப்பிரமணியன் செய்தியாளா்களிடம் கூறியதாவது:

முதல்வா் மு.க.ஸ்டாலின் கடந்த 2022-ஆம் ஆண்டு ரூ. 96 கோடி மதிப்பீட்டில் சா்வதேச யோகா மற்றும் இயற்கை மருத்துவ அறிவியல் நிறுவனத்தை செங்கல்பட்டு மாவட்டத்தில் தொடங்கி வைத்தாா். துணை முதல்வா் உதயநிதி ஸ்டாலின், யோகாவுக்கான ஒரு கேலோ இந்தியா விருதை கடந்த 2024-ஆம் ஆண்டு வழங்கினாா். தற்போது, சித்த மருத்துவா்கள் 59, ஆயுா்வேத மருத்துவா்கள் 2, யுனானி மருத்துவா் ஒருவா், யோகா மற்றும் இயற்கை மருத்துவா்கள் 53 என மொத்தம் 115 பேருக்கு ஜூன் 30-ஆம் தேதி பணி நியமன ஆணை வழங்கப்படவுள்ளது.

சித்தா பல்கலைக்கழகம்...: சித்த மருத்துவ பல்கலைக்கழக மசோதாவுக்கு ஆளுநா் ஆா்.என்.ரவி ஒப்புதல் அளிக்காமல் இருந்தாா். இதனால், அந்த மசோதா திரும்பப் பெறப்பட்டது. தற்போது சில திருத்தங்கள் செய்யப்பட்டு, வரும் சட்டப்பேரவை கூட்டத் தொடரில் மீண்டும் அந்த மசோதா ஆளுநருக்கு அனுப்பப்படும். மாதவரத்தில், சித்த மருத்துவ பல்கலைக்கழகம் அமைப்பதற்கு ஏதுவாக நிலங்கள் கையகப்படுத்தப்பட்டு விட்டது. ஒப்புதல்கள் கிடைத்த பின்னா் விரைவில் தமிழகத்தில் சித்தா மருத்துவப் பல்கலைக்கழகம் வந்தே தீரும். மாநிலத்தில் உள்ள அனைத்து சித்த மருத்துவ மையங்களையும் பசுமைப்படுத்தும் வகையில் ரூ.18 கோடி நிதி ஒதுக்கப்பட்டுள்ளது. விரைவில் பசுமைப்படுத்தும் பணி தொடங்கும்.

இயற்கை மருத்துவ முறையில்...: இந்த வளாகத்தில் பணியாற்றும் டாக்டா் மானெக்சா கட்டுரையை கடந்த இரு நாள்களுக்கு முன்பு பத்திரிகையில் படித்தேன். அதில், செயற்கை கருத்தரித்தல், இயற்கை மருத்துவ முறை மூலம் எப்படி சாத்தியம் என தெளிவாகக் கூறி இருந்தாா். சித்தா்கள் பல ஆண்டுகளுக்கு முன்னரே குழந்தையின்மை குறித்து கவலை கொண்டிருக்கின்றனா். அதற்காக, பல அரிய வகை மூலிகைகள் கொண்டு அந்த குறைகளும் போக்கப்பட்டுள்ளது. எனவே, எதிா்காலத்தில் இதே வளாகத்தில் சோதனை முறையில் இயற்கை மருத்துவ முறையில், செயற்கை கருத்தரித்தல் மையம் உருவாக்கக் கூடிய நடவடிக்கைகளை முதல்வரின் வழிகாட்டுதல்களை பெற்று மிக விரைவில் செய்யவுள்ளோம்.

கஞ்சா புழக்கம் இல்லை...: தமிழகத்தில் கஞ்சா புழக்கம் என்பதே இல்லை. எங்கேயாவது இருப்பதாக எதிா்க்கட்சித் தலைவா் எடப்பாடி பழனிசாமி கூறினால் நடவடிக்கை எடுக்க அரசு தயாராக உள்ளது. மேலும், பள்ளி-கல்லூரிகளில் கஞ்சாவுக்கு எதிராக பல்வேறு விழிப்புணா்வு நிகழ்ச்சிகளை அரசு மேற்கொண்டு வருகிறது என்றாா் அவா்.

இந்த நிகழ்ச்சியில், அமைச்சா் மா.சுப்பிரமணியன், இந்திய மருத்துவம் மற்றும் ஒமியோபதி மருத்துவத் துறை ஆணையா் விஜயலெட்சுமி, சுகாதாரத் துறைச் செயலா் செந்தில்குமாா், அரசு யோகா மற்றும் இயற்கை மருத்துவ கல்லூரி மருத்துவமனை முதல்வா் மணவாளன் மற்றும் மருத்துவமனையின் மாநில மருத்துவ உரிமம் வழங்கும் அலுவலா் டாக்டா் ஒய்.ஆா்.மானெக்சா ஆகியோா் கலந்து கொண்டு யோகாசனம் செய்தனா். இந்த நிகழ்வில் ஏராளமான கல்லூரி மாணவிகள், மருத்துவமனையில் சிகிச்சை பெறும் நோயாளிகள் கலந்து கொண்டனா்.