தமிழகத்தில் சனிக்கிழமை 11 இடங்களில் வெப்பநிலை 100 டிகிரி ஃபாரன்ஹீட்டை கடந்து பதிவானது. இதனிடையே, திங்கள், செவ்வாய்க்கிழமை (மே 5, 6) மாநிலத்தில் ஓரிரு இடங்களில் கனமழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.
இது குறித்து வானிலை மையம் சாா்பில் வெளியிடப்பட்ட செய்திக் குறிப்பு:
தென்னிந்திய கடலோரப் பகுதியின் வளிமண்டல கீழடுக்கில் நிலவும் காற்றுக் குவிதல் காரணமாகவும், வெப்ப நீராவி தமிழக நிலப்பரப்புக்குள் வருவதாலும் ஞாயிற்றுக்கிழமை (மே 4) முதல் மே 9 வரை தமிழகம், புதுச்சேரி மற்றும் காரைக்காலில் ஓரிரு இடங்களில் இடி, மின்னல் மற்றும் காற்றுடன் கூடிய மிதமான மழைக்கு வாய்ப்புள்ளது.
குறிப்பாக, கோவை மற்றும் திருநெல்வேலி மாவட்டங்களின் மலைப் பகுதிகளிலும், நீலகிரி, தேனி, தென்காசி, விருதுநகா், மதுரை, திண்டுக்கல், கரூா் மாவட்டங்களிலும் ஓரிரு இடங்களில் திங்கள்கிழமை (மே 5) கனமழைக்கு வாய்ப்புள்ளது. மே 6-இல் கோவை, நீலகிரி, ஈரோடு, தேனி, திண்டுக்கல், தென்காசி, மயிலாடுதுறை, நாகை, தஞ்சாவூா், திருவாரூா் மாவட்டங்களிலும், காரைக்காலிலும் கனமழை பெய்ய வாய்ப்புள்ளது.
சென்னை மற்றும் புகா் பகுதிகளில் ஞாயிற்றுக்கிழமை லேசான மழைக்கு வாய்ப்புள்ளது. எனினும் ஒருசில இடங்களில் அதிகபட்ச வெப்பநிலை 102 டிகிரி ஃபாரன்ஹீட்டையொட்டி இருக்கும்.
மழை அளவு: தமிழகத்தில் சனிக்கிழமை காலை வரை அதிகபட்சமாக கன்னியாகுமரி மாவட்டம் குழித்துறை, விருதுநகா் மாவட்டம் வெம்பக்கோட்டை மற்றும் நீலகிரி மாவட்டம் கோடநாட்டில் தலா 50 மி.மீ. மழை பதிவானது. கருப்பாநதி அணை பகுதி (தென்காசி), ஒசூா் (கிருஷ்ணகிரி), வால்பாறை (கோவை) தலா 40 மி.மீ. மழை பதிவானது.
11 இடங்களில் வெயில் சதம்: தமிழகத்தில் சனிக்கிழமை அதிகபட்சமாக வேலூரில் 105.8 டிகிரி ஃபாரன்ஹீட் வெப்பநிலை பதிவானது. திருத்தணி - 104, திருச்சி - 103.46, சென்னை மீனம்பாக்கம், மதுரை விமான நிலையம் - தலா 103.28, பரமத்தி வேலூா் - 103.1, ஈரோடு - 102.56, கடலூா் - 101.84, மதுரைநகரம், சேலம் - தலா 101.48, நாகை - 100.94 என மொத்தம் 11 இடங்களில் வெயில் சதமடித்துள்ளது.
மேலும், தமிழகத்தில் அடுத்த 4 நாள்களுக்கு அதிகபட்ச வெப்பநிலை இயல்பையொட்டியே இருக்கும் என வானிலை மையம் தெரிவித்துள்ளது.