ஆதவ் அா்ஜுனாவுக்கு எதிரான வழக்கு: காவல் துறைக்கு உயா்நீதிமன்றம் உத்தரவு
தவெக தோ்தல் பிரிவு பொதுச் செயலா் ஆதவ் அா்ஜுனா மீதான வழக்கில் நவ. 7-ஆம் தேதி வரை குற்றப்பத்திரிகை தாக்கல் செய்யக்கூடாது என காவல் துறைக்கு சென்னை உயா்நீதிமன்றம் உத்தரவிட்டது.
கரூரில் தவெக தலைவா் விஜய் பிரசாரத்தின்போது ஏற்பட்ட கூட்ட நெரிசலில் சிக்கி 41 உயிரிழந்தனா். இச்சம்பவம் குறித்து வழக்குப் பதிவு செய்த போலீஸாா், தவெக நிா்வாகிகளைக் கைது செய்தனா். இதனிடையே, தவெக தோ்தல் பிரிவு பொதுச் செயலா் ஆதவ் அா்ஜுனா தனது எக்ஸ் தளத்தில், அரசின் அடக்குமுறைக்கு எதிராக இலங்கை, நேபாளத்தில் நடந்ததுபோல தமிழகத்திலும் புரட்சி வெடிக்கும் என்று பதிவிட்டிருந்தாா்.
இதையடுத்து அவா் மீது பல்வேறு பிரிவுகளில் வழக்குப் பதிவு செய்யப்பட்டது.
இந்த வழக்கை ரத்து செய்யக் கோரி ஆதவ் அா்ஜுனா, சென்னை உயா்நீதிமன்றத்தில் மனு தாக்கல் செய்தாா். இந்த வழக்கு நீதிபதி ஏ.டி.ஜெகதீஷ் சந்திரா முன் புதன்கிழமை விசாரணைக்கு வந்தது.
மனுதாரா் தரப்பில் ஆஜரான மூத்த வழக்குரைஞா் அபிஷேக் மனு சிங்வி, மனுதாரா், கடந்த செப். 29-ஆம் தேதி இரவு 11.28 மணிக்கு இட்ட பதிவை இரவு 12.02 மணிக்கு நீக்கிவிட்டாா். சுமாா் 34 நிமிஷங்கள் இருந்த இப்பதிவை பொதுமக்கள் பலா் பாா்த்திருக்க வாய்ப்பில்லை. அந்தப் பதிவில் எந்த உள்நோக்கமும் இல்லை. குற்றச்சாட்டுக்கு முகாந்திரம் உள்ளதா என ஆரம்பகட்ட விசாரணைகூட நடத்தாமல் வழக்குப் பதிவு செய்துள்ளனா் என்று வாதிட்டாா்.
அப்போது, குறுக்கிட்ட நீதிபதி, சமூக வலைதளத்தில் முதலில் பதிவு செய்துவிட்டு பின்னா் மனுதாரா் அந்தப் பதிவை நீக்கியதை ஒப்புக்கொள்கிறீா்களா என்று கேள்வி எழுப்பினாா்.
அதற்கு, ஆம் என்று பதிலளித்த ஆதவ் அா்ஜுனா தரப்பு மூத்த வழக்குரைஞா், ஒருவேளை அந்தப் பதிவை நீக்கவில்லை என்றாலும் வழக்குப்பதிவு செய்ய முகாந்திரம் இல்லை. ஆதவ் அா்ஜுனா குற்றப்பின்னணி கொண்டவா் அல்ல. எதிா்க்கட்சி என்ற அடிப்படையில் சில கருத்துகளை அவா் பதிவிட்டுள்ளாா் என்று விளக்கம் அளித்தாா்.
காவல் துறை தரப்பில் ஆஜரான மூத்த வழக்குரைஞா் என்.ஆா்.
இளங்கோ, கரூரில் சம்பவத்துக்குப் பின், அந்தக் கட்சியின் முக்கியப் பொறுப்பில் உள்ள மனுதாரா் தப்பி ஓடிவிட்டாா். செப். 28-ஆம் தேதி எக்ஸ் தளத்தில் இப்படி ஒரு செய்தியைப் பதிவிட்டுள்ளாா். இது குறித்து வழக்குப் பதிந்து விசாரிக்க போலீஸாருக்கு அதிகாரம் உள்ளது. மனுதாரின் பதிவை ஒரு லட்சம் போ் வரை பாா்த்துள்ளனா். இது தொடா்பான வழக்கு விசாரணைக்கு ஆஜராக போலீஸாா் சம்மன் அனுப்பியும் மனுதாரா் விசாரணைக்கு ஆஜராகவில்லை என்று வாதிட்டாா்.
காவல் துறை தரப்பு வாதம் நிறைவடையாததால், விசாரணையை நவ. 7-ஆம் தேதிக்கு ஒத்திவைத்த நீதிபதி, அதுவரை மனுதாரா் மீதான வழக்கில் குற்றப்பத்திரிகை தாக்கல் செய்யக் கூடாது என்று உத்தரவிட்டாா்.