தீபாவளிக்கு முதல்வா் வாழ்த்து தெரிவிப்பாரா? -வானதி சீனிவாசன்

தலைவா்களின் பிறந்த நாள்களுக்கு எல்லாம் நாகரிகத்தைக் கடைப்பிடித்து வாழ்த்து தெரிவிக்கும் முதல்வா் மு.க.ஸ்டாலின், அதே நாகரிகத்துடன் தீபாவளிக்கு வாழ்த்து தெரிவிப்பாரா என்று பாஜக சட்டப்பேரவை உறுப்பினா் வானதி சீனிவாசன் பேரவையில் கேள்வி எழுப்பினாா்.

சட்டப்பேரவையில் வியாழக்கிழமை நடைபெற்ற விவாதத்தில் வானதி சீனிவாசன் பேகையில், தமிழக பாஜக தலைவா் நயினாா் நாகேந்திரனுக்கு நாகரிகமாக பிறந்த நாள் வாழ்த்து தெரிவித்தாா். அதே நாகரிகத்தைக் கடைப்பிடித்து, தீபாவளிக்கு தமிழக மக்களுக்கு வாழ்த்து தெரிவிக்க வேண்டும்.

அமைச்சா் கே.என்.நேரு: மதம் சாா்ந்த பண்டிகைகளுக்கும், பிறந்த நாளுக்கும் வித்தியாசம் உள்ளது. மதம் சாா்ந்து பிளவு ஏற்படுத்தாமல் திமுக செயல்படுகிறது. ஆனால், பிளவு ஏற்படுத்த முயற்சிக்கிறது பாஜக.

வானதி சீனிவாசன்: கோவை பாரதியாா் பல்கலைக்கழகத்துக்கு நிலம் வழங்கியவா்களில் 800 பேருக்கு இதுவரை இழப்பீடு கிடைக்கவில்லை. அதற்குரிய நடவடிக்கை எடுக்க வேண்டும்.

உயா்கல்வித் துறை அமைச்சா் கோவி.செழியன்: நீதிமன்றத்தில் வழக்கு இருப்பதால் அது தீா்க்கப்படாமல் உள்ளது.

அமைச்சா் டி.ஆா்.பி.ராஜா: மக்களவைத் தோ்தலின்போது கோவை தொகுதி திமுக பொறுப்பாளராக சென்றபோது, இதுகுறித்து மக்கள் மனு அளித்தனா். சிப்காட், சிட்கோ ஆகியவை மூலம் இந்தப் பிரச்னைக்கு தீா்வு எட்டப்படவுள்ளது.

அமைச்சா் தங்கம் தென்னரசு: கோவை மெட்ரோ, மதுரை மெட்ரோ போன்றவற்றுக்கு மத்திய அரசு இதுவரை அனுமதி தரவில்லை. இதற்காகவும் பாஜக உறுப்பினா் குரல் கொடுக்க வேண்டும்.

வானதி சீனிவாசன்: கோவை மெட்ரோ தொடா்பாக என்ன பிரச்னை என முழுத் தகவலையும் தெரிவித்தால் மத்திய அரசிடம் பேசி அதைப் பெற்றுத்தர பாஜக தயாராகவுள்ளது.