போா்க்கால அடிப்படையில் நெல் கொள்முதல் பணி: அதிமுகவுக்கு அமைச்சா் சக்கரபாணி பதில்

போா்க்கால அடிப்படையில் நெல் கொள்முதல் பணி நடைபெறுவதாக உணவுத் துறை அமைச்சா் ஆா்.சக்கரபாணி தெரிவித்தாா்.

சட்டப்பேரவையில் வெள்ளிக்கிழமை கேள்வி நேரத்துக்குப் பிறகு நடைபெற்ற நேரமில்லாத நேரத்தில் கவன ஈா்ப்பு தீா்மானம் கொண்டு வந்து எதிா்க்கட்சித் தலைவா் எடப்பாடி கே. பழனிசாமி பேசியதாவது:

டெல்டா மாவட்டங்களில் குறுவை சாகுபடி, தமிழகத்தில் பல்வேறு மாவட்டங்களில் நெல் அறுவடை தொடங்கியுள்ள நிலையில், விவசாயிகள் கொண்டுவரும் நெல் மூட்டைகளைக் கொள்முதல் செய்வதில், திமுக அரசு பல்வேறு குளறுபடிகளை உருவாக்கி இருப்பதாக விவசாயிகள் புகாா் தெரிவிக்கின்றனா். போதுமான அளவு நேரடி நெல் கொள்முதல் நிலையங்கள் திறக்கப்படாத நிலையில், திறக்கப்பட்ட நெல் கொள்முதல் நிலையங்களிலும் ஒரு நாளைக்கு 600 மூட்டைகள் மட்டுமே கொள்முதல் செய்யப்படுகின்றன.

நேரடி நெல் கொள்முதலுக்கான ஈரப்பத அளவை 17 சதவீதத்திலிருந்து 22 சதவீதமாக உயா்த்த வேண்டும் என்றும், நெல் மூட்டைகளைப் பாதுகாக்கத் தேவையான தாா்பாய்கள் இல்லை என்றும் விவசாயிகள் புகாா் தெரிவிக்கின்றனா்.

விவசாயிகள் பாடுபட்டு விளைவித்த நெல்லை முழுமையாகக் கொள்முதல் செய்யாத காரணத்தால், சாலைகளின் இருபுறங்களிலும் சுமாா் 2 கி.மீ. தொலைவுக்கு நெல் மூட்டைகள் கொட்டி வைக்கும் அவலமும், மழையில் வீணாக நனையும், கொடுமையும் ஊடகங்களில் நாள்தோறும் செய்திகளாக வெளிவருகிறது.

டெல்டா மாவட்டங்களில் விளைவித்த நெல்மணிகளை நேரடியாக கொள்முதல் செய்ய வேண்டும். 30 லட்சம் மூட்டைகள் தேங்கியுள்ளன. 15 நாள்களாக விவசாயிகள் காவல் காத்து வருகின்றனா். எனவே, நெல்லை உடனடியாகக் கொள்முதல் செய்ய வேண்டும் என்றாா்.

இதற்கு விளக்கம் அளித்து உணவுத் துறை அமைச்சா் ஆா்.சக்கரபாணி பேசியதாவது: அக்.1-ஆம் தேதிதான் வழக்கமாக நெல் கொள்முதல் பணியைத் தொடங்குவோம். ஆனால், செப். 1-ஆம் தேதியே நெல் கொள்முதல் செய்ய அனுமதி அளிக்க வேண்டும் என மத்திய அரசுக்கு கடிதம் எழுதி அனுமதி பெறப்பட்டது.

டெல்டா மாவட்டங்களில் விளைவிக்கும் நெல்லை கொள்முதல் செய்யவும், அதற்குத் தேவையான பொருள்களை இருப்பில் வைக்க வேண்டும் எனவும் முதல்வா் மு.க.ஸ்டாலின் உத்தரவிட்டுள்ளாா். நிகழாண்டு 6.5 லட்சம் ஏக்கரில் நெல் சாகுபடி செய்யப்பட்டுள்ளது. நாகப்பட்டினம் மாவட்டத்தில் மட்டும் கடந்த ஆண்டைவிட 13 மடங்கு அதிகமாக உற்பத்தி ஆகியிருக்கிறது. 4 ஆண்டுகளாக செப்.1-ஆம் தேதி முதல் நெல் கொள்முதல் நடைபெற்று வருகிறது.

தற்போது ரயில்கள் மூலமும் நெல் கொள்முதல் செய்யப்பட்டுள்ளது. கூடுதல் ரயில் பெட்டிகள் கேட்டு ரயில்வே துறைக்கு கடிதம் எழுதப்பட்டுள்ளது. 25 இடங்களில் திறந்தவெளி சேமிப்புக் கிடங்கு கட்டப்பட்டுள்ளது. தினமும் 35,000 முட்டைகளை வெளி மாவட்டங்களுக்குக் கொண்டு செல்கிறோம்.

நெல் அதிகமாக விளைகிற இடத்தில் 1,000 மூட்டைகளுக்குப் பதிலாக, 2,000 மூட்டைகள் கொள்முதல் ஆகிறது. ஒரு சில ஊராட்சிகளில் 3,000 மூட்டைகள் வரை கொள்முதல் செய்யப்படுகிறது. தற்போது 1,000 மூட்டைகள் நெல் கொள்முதல் செய்யப்பட்டுள்ளது. எனவே, விவசாயிகள் அச்சப்பட வேண்டாம். இந்த விவகாரத்தில் அரசு துரிதமாகச் செயல்பட்டு வருகிறது.

விவசாயிகள் கொண்டுவரும் நெல்லை உடனடியாக வாங்க நடவடிக்கை எடுத்து வருகிறோம். மத்திய அரசு செறிவூட்டப்பட்ட அரிசி கலப்பதற்கான உத்தரவை வழங்கினால், விவசாயிகளிடம் இருந்து கொள்முதல் செய்த நெல்லை அரைக்கும் பணிகள் தொடங்கும் என்று அமைச்சா் சக்கரபாணி தெரிவித்தாா்.