காதல் பாடல்களுக்குப் புதிய பரிமாணம் கொடுத்த 'கேகே'

காதல் பாடல்களுக்குப் புதிய பரிமாணம் கொடுத்தவர் பாடகர் கிருஷ்ணகுமார் குன்னத். "கேகே' என்று அழைக்கப்பட்ட இவர் தமிழில் குறைவாக (சுமார் 60 பாடல்கள்) பாடியதால் தமிழ் ஊடகங்களில் தனக்கான இடத்தைப் பிடிக்காதவர்.

இவர் மறைவுக்குப் பின்னர் தெரிவிக்கப்பட்ட அஞ்சலி மூலமாகத்தான் தமிழில் கேகே பாடியிருக்கும் ஹிட் பாடல்ககளின் பட்டியலை அறிய முடிகிறது.

திரைத் துறையில் அறிமுகம் ஆவதற்கு முன்பு கேகே சுமார் 3,500 விளம்பரப் பாடல்களை உருவாக்கிப் பாடியுள்ளார். பூர்விகம் கேரளம் என்றாலும் வளர்ந்தது தில்லியில்!

ஹிந்தியில் அதிகமாகப் பாடியிருக்கிறார். கேகேயை தமிழில் ஏ. ஆர். ரஹ்மான் "மின்சாரக் கனவு' படத்தில் பாட வைத்து அறிமுகம் செய்துவைத்தார். தமிழகத்தின் அனைத்து இசை அமைப்பாளர்கள் இசை அமைப்பில் கேகே பாடியிருக்கிறார். இளைய தலைமுறை தமிழ் நடிகர்களுக்கும் அவர்கள் குரலுக்கு ஏற்றபடி மாற்றி பாடியிருக்கிறார்.

காதல் பாடல்களை உருகி பாடிய இவர் குத்து பாடல்களிலும் திறமையை வெளிப்படுத்தினார். கேரளத்தவராக இருந்தாலும் மலையாளத்தில் ஒரே ஒரு பாடல் மட்டும்தான் பாடியிருக்கிறார்.

தனது பள்ளி வகுப்புத் தோழியான ஜோதி லட்சுமி கிருஷ்ணாவிடம் ஈர்ப்பு ஏற்பட்ட கேகே, வசீகரமாகப் பாடி கவர்ந்தார். திருமணமும் செய்து கொண்டார். மகன் நகுல் பாடகராகவும், மகள் தாமரை பியானோ இசைக் கலைஞியாகவும் உருவெடுத்துள்ளனர்.

கேகேக்கு புகை பிடித்தல், மது பழக்கமும் கிடையாது. தனது குழுவினர் "புகை பிடித்தால் கொஞ்ச நேரத்துக்கு எனது அருகில் வராதீர்கள்' என்று நிபந்தனை போட்டிருந்தார். அப்படியிருந்தவருக்கு இதயத்தில் அடைப்பு ஏற்பட்டிருப்பது குறித்து கவலைப்படாமல் இருந்ததுதான் ஆச்சரியம்.

நிகழ்ச்சியில் "எனக்கு ஒரேயடியாக வியர்க்கிறது' என்று கேகே சொன்னதும் நேரடியாக ஹோட்டலுக்குப் போகாமல், மருத்துவமனைக்குச் சென்றிருந்தால் ஒருவேளை உயிர் தப்பியிருக்கலாம்.

இந்த ஆண்டு மறைந்த இசைக் கலைஞர்களான லதா மங்கேஷ்கர், பப்பி லகரி, சித்து மூஸ் வாலா பட்டியலில் கேகே இடம் பிடிக்கவேண்டும் என்று விதிக்கப்பட்டதோ..?

"தி லெஜண்ட்' படத்தில் கேகே பாடியிருக்கும் "கொஞ்சி .... கொஞ்சி ' என்பதே கேகே பாடிய கடைசித் தமிழ் பாடல். மிகவும் பிரபலமாகிவிட்டது!