புகழ் பெற்ற ஈரானிய இயக்குநர் மஜித் மஜிதி இயக்கி 1997-ஆம் ஆண்டு வெளிவந்த படம்"சில்ரன் ஆஃப் ஹெவன்'. உலகெங்கிலும் உள்ள குழந்தைகளை இப்படம் வெகுவாக ஈர்த்தது. மேலும், பல உயரிய விருதுகளைக் குவித்துக் கவனம் ஈர்த்தது. இப்படத்தின் மறு உருவாக்கத்தின் உரிமையை இயக்குநர் சாமி வாங்கியுள்ளார்.
இது பற்றி அவர் பேசும் போது... "இதுவரை நான் இயக்கிய படங்கள் என்னுடைய அடையாளம் அல்ல. என்னை அடையாளப்படுத்தும் சினிமாவை இனிமேல் தான் இயக்கப் போகிறேன். ஒருமுறை என் அக்கா என் வீட்டிற்கு வந்தபோது "சில்ட்ரன் ஆஃப் ஹெவன்' படத்தைக் குழந்தைகளுக்குக் காண்பித்தேன். உலகில் உள்ள அனைத்து தரப்பு குழந்தைகளிடம் எப்படி கலந்துள்ளது என்பதைக் குழந்தைகளின் மூலம் அறிந்தேன். அப்போதே இதன் உரிமையைப் பெற்றேன்.
இப்படம் 80 -களில் நடக்கும் கதை என்பதால் அதன் அடிப்படை உணர்வுகளை சிதைக்காமல் கொடுக்க முடிவு செய்தேன். கொடைக்கானலில் உள்ள பூம்பாறை கிராமத்தை தேர்வு செய்தேன். அங்கே படப்பிடிப்பு முடிந்துள்ளது. படத்துக்கு "அக்கா குருவி' எனப் பெயரிடப்பட்டுள்ளது. இளையராஜா இசையமைக்கிறார். பட விழாவில் இயக்குநர் மஜித் பங்கேற்க உள்ளார்'' என்றார் சாமி.