மீண்டும் இணையும்...

கரோனா கால கட்டத்துக்குப் பின் தமிழ் ரசிகர்கள் மத்தியில் இணையத் தொடர்கள் பெரும் வரவேற்பைப் பெற்று வருகின்றன. இந்த வருட தொடக்கத்தில் வெளியான "அயலி' இணையத் தொடர் பலரது பாராட்டையும்,  மாபெரும் வெற்றியையும் பெற்றது. 

இந்தத் தொடரில் முக்கிய கதாபாத்திரங்களாக நடித்த "அருவி' மதன் கதையின் நாயகனாக நடிக்க, அபி நட்சத்திரா, காயத்ரி, செல்லா ஆகியோர் மீண்டும் ஒரு புதிய படத்துக்காக இணையவுள்ளனர். 

"குக் வித் கோமாளி' புகழ் சிறப்பு தோற்றத்தில் நடிக்கிறார். மேலும் இந்த புதிய படத்துக்காக சமீபத்தில் வரலாற்று கதாபாத்திரங்களை முன்னிறுத்தி புகைப்படம் எடுக்கப்பட்டது. அவையாவும் இணையத்தில் வைரல் ஆனது குறிப்பிடத்தக்கது.  

சாய் ரோஹிணி, தர்ஷன் பாஸ்கர், உதய்ராஜ், ஸ்ரீ பிரியா, கனிஷ், பேபி ஷிவானி, மாஸ்டர் ராஜூ மகாலிங்கம் ஆகியோர் முக்கிய கதாபாத்திரங்களில் நடிக்கின்றனர். நடிகர் சூரியின் அடுத்த படத்திற்கு கதை, திரைக்கதை எழுதியுள்ள வெற்றிவீரன் மகாலிங்கம் இந்த படத்தை மகாலிங்கம் புரொடக்ஷன்ஸ் சார்பாக எழுதி, இயக்கி, தயாரிக்கிறார். 

கடந்த தமிழ்ப்புத்தாண்டு அன்று பட பூஜையுடன் படப்பிடிப்பு தொடங்கியது.

சஞ்சய் லோகநாத் ஒளிப்பதிவு செய்ய, வத்ஷன் இசையமைக்க, வடிவேல்-விமல்ராஜ் படத்தொகுப்பை மேற்கொள்கின்றனர். நிர்வாக தயாரிப்பு - ராபின் செல்வா. காஸ்டியூம் - ரெங்கசாமி உள்ளிட்ட தொழில்நுட்பக் கலைஞர்களுடன் படப்பிடிப்பு  பணிகள் விறுவிறுப்பாக நடைபெற்று வருகின்றன.