சன் ஸ்டார் பிக்சர்ஸ் நிறுவனத்தின் தயாரிப்பில் உருவாகி வரும் படம் 'இதய கோயில்'. திவாகர், அனுகிருஷ்ணா, ஆர். வி. உதயகுமார், சுப்பிரமணிய சிவா, சர்மிளா உள்ளிட்ட பலர் நடிக்கின்றனர். கதை, திரைக்கதை, வசனம் எழுதி இப்படத்தை இயக்குகிறார் விஜய் ராஜேந்திரன். படம் குறித்து இயக்குநர் பேசும் போது... 'வரம்பு மீறிய காதல், காமம், பெற்றோர்களை ஏமாற்றுவது, பொய் சொல்லுவது.. இன்னும் இன்னப் பிற மீறல்களைத்தான் பல சினிமாக்கள் அர்த்தப்படுத்தி வந்திருக்கின்றன.
இது அது மாதிரி இல்லாமல், வேறொரு மீட்டொருவாக்கத்தில் கைக்கு வந்து சேர்ந்திருக்கிறது இந்தக் கதை. பெருநகர வாழ்க்கை, தேடல்கள் ஆனாலும், எப்போதைக்குமான மனசு அந்தப் பள்ளி, கல்லூரி என காதல் வாழ்க்கையிலேயே சிலாகிக்க விரும்புகிறது. சக தோழர்கள், ஆசிரியர்கள், அந்த மர நிழல், குளம், ஆறு என எதையும் மறக்க மறுக்கிறது மனசு.
ஆயிரங்களில் இருந்து லட்சங்களுக்கு மாறின வாழ்க்கை கிடைத்தாலும், இன்னொரு முறை அந்த வாழ்க்கையை வாழவே முடியாது. வெற்றிடத்தை காற்று நிரப்பும் என்பது மாதிரி, முகத்தால்... குரல்களால்... செயல்களால்... சாயல்களால்தான் நம் பிரிவுகளையும் பிரியங்களையும் நிரப்பிக் கொண்டே இருக்கிறோம். இது கிராமத்து வாழ்க்கையின் தரிசனம். இங்கே ஒரு அழகான காதல். சந்தர்ப்பமும் சூழலும் இவர்களை இடம் மாற்றி வைக்கிறது.
அதன் சுவாரஸ்யமும், பயங்கரமும்தான் கதை' என்றார்.