மண்ணுக் குள்ளே மண்புழுவே
என்ன செய்கிறாய்? - நான்
மண்ணைக் கிளறி மரம் வளர
உதவி செய்கிறேன்!
ஏரி மீனைப் பிடிக்க அப்பா
இப்போ செல்கிறார்! - தூண்டில்
மீனுக் குன்னை இரையாகப்
போடப் போகிறார்!
கோழிக் குஞ்சு உன்னைக் கொத்தக்
காத்து இருக்குது! - அட
ஆபத்துன்னைத் தேடி நேரம்
பார்த்து இருக்குது!
சும்மா சும்மா நீயும் இப்போ
வெளியில் வராதே! - என்
அம்மா, அப்பா கண்ணில் பட்டு
அவதிப் படாதே!