காட்சி : 1
நேரம் : அதிகாலை
இடம் : ஓசோன் படலம் / பாதுகாப்பு நிலைய வாசல்
பாத்திரங்கள் : ஓன், சோன், ரோமோன்.
(மூவரும் உள்ளே பார்க்கிறார்கள்.)
ஓன் : இப்போ என்ன பண்றது, போலாமா வேண்டாமா?
சோன் : இங்கயும் வந்து ஆரம்பிச்சுட்டியா? எப்பப் பாரு ஏதாவது கேள்வி கேட்டுக்கிட்டே இருக்கே.. நீ ஒரு கேள்விக்குறி .
ரோமோன் : இப்ப இது ரொம்ப முக்கியமா? அங்க போனா நிச்சயமா நம்மள போர்முனைக்கு அனுப்பிருவாங்க.
ஓன் : போர் முனைக்குப் போனா என்ன ஆகும்?
சோன் : ம்ஸ்ஸ்.. எடுத்த ஒடனே போர்முனைக்கு அனுப்ப மாட்டாங்க.. ஒருநாள் முழுக்க வகுப்பெடுப்பாங்க..
ரோமோன் : சரி.. எது எப்படி நடக்குமோ.. நம்ம கடமை எதிரியை எதிர்த்துச் சண்டை போடுறது.. வா, போய் என்னதான் நடக்கும்னு பார்க்கலாம்.
(மூவரும் உள்ளே நுழைகிறார்கள்)
காட்சி : 2
நேரம் : காலை
இடம் : ஓசோன் படலம் / பாதுகாப்பு நிலையம்
பாத்திரங்கள் : முதன்மை அதிகாரி, ஓன்,
சோன், ரோமோன்.
(முதன்மை அதிகாரி அறைக்குள் வருகிறார்)
முதன்மை அதிகாரி : போர்க்களத்தில் கால் வைக்க வந்திருக்கும் உங்களை நான் வரவேற்கிறேன்..
ஓன் : இதைத் தவிர எங்களுக்கு வேற என்ன வேலை இருக்கு, சார்?
சோன் : ஏய், கேள்விக்குறி, ரொம்பக் கேட்க ஆரம்பிச்சுடாத .. பயிற்சியே இல்லாம போருக்கு அனுப்பிடப் போறாங்க..
ரோமோன் : சார், இவனுங்க இப்படித்தான் நீங்க சொல்லுங்க..
முதன்மை அதிகாரி : உங்களுக்கான வேலை சூரியனிலிருந்து பூமிக்கு வரும் ஒளிக்கதிரில் இருக்கும் எதிரியை அழிப்பதுதான்..
ஓன் : அது எப்படி ?
முதன்மை அதிகாரி : சொல்றேன்.. கவனிங்க..
(மூவரும் நிமிர்ந்து உட்காருகிறார்கள்)
காட்சி : 3
நேரம் : காலை
இடம் : பாதுகாப்பு நிலையம் / பயிற்சி அறை
பாத்திரங்கள் : முதன்மை அதிகாரி, ஓன்,
சோன், ரோமோன்.
முதன்மை அதிகாரி : சூரியனிலிருந்து பூமிக்கு வரும் ஒளிக்கதிரில் "புறஊதா' னு ஒரு கதிர் இருக்கு..
புவிவாசிகளுக்கு அது கேடு விளைவிக்கும்..
ரோமோன் : தோல் வியாதி மாதிரினு என் ஃபிரெண்ட் ஒருத்தன் சொல்லுவான். முதன்மை அதிகாரி : ஆமாம்.. அதுவும் ஒன்னு.. அப்படிப்பட்ட புறஊதா கதிரை நாம் நேருக்கு நேர் மோதி அழிச்சு பூலோக மக்களைக் காப்பாத்தணும்..
ஓன் : நேருக்கு நேரா?
சோன் : அப்போ எங்களுக்கும் எதாவது ஆகும்ல..
முதன்மை அதிகாரி : ஆகும்தான்.. உங்களோட ஒரு தலை பிரிஞ்சுடும்.. யாரோட தலை அந்த மீதி ரெட்டைத் தலைகிட்ட போகுதோ, அவங்களோட தலை அதுகூட ஒட்டிக்கும்.. புரிஞ்சுதா?
சோன் : சுத்தம்!
காட்சி : 4
நேரம் : முற்பகல்
இடம் : ஓசோன் படலம் / எல்லைப் பிரிவு
பாத்திரங்கள் : ஓன், சோன் .
(சூரியக்கதிர்கள் புறஊதாக் கதிர் கலந்து வருகின்றன)
ஓன் : ரெடியா இருக்கியா?
சோன் : அப்டினுதான் நினைக்கிறேன். நீயும் தயாரா இரு.. இன்னிக்கு இதுக்கு நாம யாருன்னு காட்றோம் !
ஒரு புறஊதாக் கதிர் ஓன் மீது படுகிறது. ஓனுடைய ஒரு தலை பிரிகிறது.
சோன் : கொஞ்சம் பொறு.. வர்றேன்..
(ஒரு புறஊதாக் கதிர் சோன் மீது படுகிறது.
சோனுடைய ஒரு தலை பிரிகிறது. )
சோன் : என்னோட ரெட்டை தலைக்கிட்ட வா..
(ஓனுடைய பிரிந்த தலை சோனுடைய ரெட்டைத் தலையிடம் வருகிறது.)
ஓன் : ஒட்டிக்கவா?
(ஓனுடைய பிரிந்த தலை சோனுடைய ரெட்டைத் தலையுடன் இணைகிறது.)
சோன் : யெஸ் ! மறுபடியும் மூனு தலை ஆயிடுச்சு.
ஓன் : அவ்ளோதானா?
சோன் : அவ்ளோதான்!
காட்சி : 5
நேரம் : வெவ்வேறு பொழுதுகள்
இடம் : ஓசோன் படலம் / எல்லைப் பிரிவு
பாத்திரங்கள் : ஓன், சோன், ரோமோன்.
முற்பகல் : ஓனுடைய பிரிந்த தலை ரோமோனுடைய ரெட்டைத் தலையுடன் இணைகிறது.
பகல் : சோனுடைய பிரிந்த தலை ஓனுடைய ரெட்டைத் தலையுடன் இணைகிறது.
பிற்பகல் : ரோமோனுடைய பிரிந்த தலை ஓனுடைய ரெட்டைத் தலையுடன் இணைகிறது.
காட்சி : 6
நேரம் : பிற்பகல்
இடம் : ஓசோன் படலம் / எல்லைப் பிரிவு
பாத்திரங்கள் : ஓன், சோன், ரோமோன்,பச்சை மிருகம்.
ஓன் : நாம ஓசோன் மூலக்கூறா இருக்கிறது ஒரு வரம், இல்லையா?
சோன் : சரியா சொன்ன, கேள்விக்குறி.. கொஞ்சம் கஷ்டமா இருந்தாலும் இத்தனை கோடி பேரைக் காப்பாத்தறோம்னு நெனெச்சா பெருமையாத்தான் இருக்கு..
ரோமோன் : ஏய்.. அங்க பாரு என்னமோ ஒன்னு வருது..
(நான்கு தலைகளையுடைய ஒரு உருவம் வருகிறது.)
ஓன் : நான் கிட்ட போய்ப் பார்க்கட்டுமா?
சோன் : ம்ஸ்ஸ்ஸ்.. சும்மா இரு.. அது என்னனே தெரியலை..
ரோமோன் : நம்மகிட்டதான் வருது..
(அந்த உருவம் ஓனிடம் வருகிறது. )
ஓன் : என்னை இது விட்டுடுமா?
சட்டென்று ஓனுடைய ஒரு தலை பிரிகிறது.
ஓன் : ஏய்.. ஏய்.. சோன், என்னைக் காப்பாத்திருவியா ?
(அந்த உருவத்தின் ஒரு தலை பிரிந்து ஓனுடைய தலையுடன் ஒட்டி எங்கோ சென்று மறைகிறது. )
சோன் : ஐயோ! ஓன்ன்ன்ன்ன்ன்ன்!
ஓனுடைய ரெட்டைத் தலை புதிய உருவத்தைத் துரத்திச்செல்கிறது.
காட்சி : 7
நேரம் : இரவு
இடம் : ஓசோன் படலம் / பாதுகாப்பு நிலையம்
பாத்திரங்கள் : சோன், ரோமோன்,முதன்மை அதிகாரி.
முதன்மை அதிகாரி : என்ன நடந்துச்சு ?
சோன் : (தேம்பி அழுதவாறு) அந்த .. அந்த மிருகம்.. ஓனோட ஒரு தலையைப் பிச்சு எடுத்துட்டுப் போயிடுச்சு..
முதன்மை அதிகாரி : அந்த மிருகம் பார்க்க எப்படி இருந்துச்சு..?
ரோமோன் : மூனு பச்சைத் தலை. ஒரு சின்ன நீலத் தலை..
சோன் : (அழுதபடி) அது என்ன? ஓன் எங்க? கிடைச்சுருவானா?
(முதன்மை அதிகாரி அமைதியாக இருக்கிறார்)
காட்சி : 8
நேரம் : நள்ளிரவு
இடம் : பாதுகாப்பு நிலையம்/ கண்காணிப்பாளர் அறை.
பாத்திரங்கள் : சோன், ரோமோன், முதன்மை அதிகாரி, கண்காணிப்பாளர்.
கண்காணிப்பாளர் : இது ஓசோன் படலத்தோட பல இடங்கள்ல நடக்குற பிரச்சனை.. இதை நாம் எதுவும் பண்ண முடியாது..
முதன்மை அதிகாரி : வந்த மிருகத்தோட பேர் என்ன? அது நம்மள என்ன பண்ணுது?
கண்காணிப்பாளர் : நாமதான் ஓசோன் மூலக்கூறுகள். நம்மகிட்ட இருக்கிற மூனு தலைகள் மூனு ஆக்ஸிஜன் அணுக்களால் ஆனது. சூரியனோட புற ஊதாக் கதிரை அழிக்க நம்மாலதான் முடியும்..
(அனைவரும் கவனிக்கிறார்கள். )
கண்காணிப்பாளர் : நேத்து நீங்க பார்த்த மிருகத்தோட பேர் இஊஇ. பூமியிலிருந்து வந்தது..
ரோமோன் : (அதிர்ந்து) பூமியிலிருந்தா?
கண்காணிப்பாளர் : ஆமா.. அவங்க பயன்படுத்தும் குளிர்சாதனங்கள், எரிபொருள் போன்றதிலிருந்து வருது..
சோன் : அது நம்மள என்ன பண்ணுது?
கண்காணிப்பாளர் : புற ஊதா கதிரால் தாக்கப்படும்
இஊஇயிலிருந்து க்ளோரின் அணு பிரியுது.. அப்படிப் பிரிஞ்ச அணுதான் ஓனோட ஒரு ஆக்ஸிஜன் அணுவை இழுத்துச் சேர்த்துக்கிட்டு அவனை அழிச்சிடுச்சு..
(அனைவரும் அதிர்ச்சியடைகிறார்கள். )
காட்சி : 9
நேரம் : காலை
இடம் : ஓசோன் படலம் / எல்லைப் பிரிவு
பாத்திரங்கள் : சோன், ரோமோன்.
சோன் : நாம ஏன் இஊஇகளை முதல்ல அழிச்சுடக்கூடாது?
ரோமோன் : அவர் சொன்னார்ல.. நம்மால புறஊதா கதிர்களைத்தான் அழிக்கமுடியும்.. இஊஇயை இல்ல..
சோன் : இது என்ன நியாயம்? நாம பூமி மக்களைக் காப்பாத்தப் போராடிக்கிட்டு இருக்கறப்போ அவங்க ஏன் நம்மளை அழிக்கனும்னு நினைக்கிறாங்க?
ரோமோன் : நீ இப்போ ஓன் மாதிரி கேள்வி கேட்டுக்கிட்டேயிருக்கே.
(சோன் அமைதியாக இருக்கிறான்)
ரோமோன் : எது எப்படினாலும் நாம பூமியைப் பாதுகாக்கப் போராடுவோம்.
சோன் : ஆமா.. ஓனும் இதைத்தான் சொல்லியிருப்பான், இல்லியா?
(இருவரும் சோகமாகச் சிரிக்கிறார்கள்)
காட்சி : 10
நேரம் : பகல்
இடம் : பூமி / வெவ்வேறு இடங்கள்
பாத்திரங்கள் : CFC
(CFC-கள் கூட்டம் கூட்டமாக ஓசோன் படலத்தை நோக்கி வருகின்றன)
(திரை)