Enable Javscript for better performance
புளியங்காய்!- Dinamani

உடனுக்கு உடன் செய்திகள்

    புளியங்காய்!

    By DIN  |   Published On : 02nd March 2019 10:36 AM  |   Last Updated : 02nd March 2019 10:36 AM  |  அ+அ அ-  |  

    NADAKAM

    அரங்கம்
     காட்சி : 1,
     இடம் : வகுப்பறை, நேரம் : மாலை 3.55,
     மாந்தர் : கதிரேசன், தனபால், வைத்தியலிங்கம்
     
     (வைத்தியலிங்கம் பாடம் நடத்திக்கொண்டிருக்கிறார். தனபால் கைக்கடிகாரத்தைப் பார்க்கிறான். முன் இருக்கையில் அமர்ந்திருக்கும் கதிரேசனின் முதுகை ஸ்கேலால் தொடுகிறான். கதிரேசன் லேசாகத் தலையைத் திருப்புகிறான். )
     தனபால் : ( முணுமுணுப்பது போல்) புளியங்காய் அடிக்க போலாமா ? கொத்துக் கொத்தா இருக்கு.. காலையிலதான் பார்த்தேன் ..
     கதிரேசன் : (முணுமுணுப்பது போல்) இன்னிக்கா ? லேட் ஆயிடும் .. அம்மா திட்டுவாங்க ..
     தனபால் : ( முணுமுணுப்பது போல்) ம்ஸ்ஸ்ஸ்.. லேட் எல்லாம் ஆகாதுடா .. கரெக்ட் டைமுக்குப் போயிரலாம் .. நாலஞ்சு கொத்து போதும். உப்பு மிளகாய்த்தூள் பொடிகூட வெச்சிருக்கேன் ..
     (கதிரேசன் எச்சில் ஊறும் வாயைத் துடைத்துக்கொள்கிறான். )
     கதிரேசன் : ( முணுமுணுப்பது போல்) நாம ரெண்டு பேர் மட்டும்தான் போறோமா..?
     தனபால் : ( முணுமுணுப்பது போல்) ஆமா..
     (வைத்தியலிங்கம் தனபாலின் மீது சாக்பீûஸ வீசுகிறார். )
     வைத்தியலிங்கம்: ஏன்டா.. இன்னும் ரெண்டு நிமிஷத்துல பெல் அடிச்சிருவாங்க ....அதுக்குள்ள பேசியாகணுமா ?
     தனபால் : (எழுந்து நின்று) சந்தேகம் கேட்டேன் சார்...
     வைத்தியலிங்கம் : சந்தேகமா ? நீயா ? நம்பிட்டேன் ..
     (மாணவர்கள் சிரிக்கிறார்கள். தனபால் தலையைச் சொறிகிறான்.... மணி அடிக்கிறது. )
     
     காட்சி : 2,
     இடம் : பள்ளி வளாகம், நேரம் : மாலை 4.15,
     மாந்தர் : கதிரேசன், தனபால், சுகேஷ்.
     
     (தனபால் மிதிவண்டியை எடுக்க காத்திருக்கிறான். கதிரேசன் வருகிறான். )
     கதிரேசன் : இந்த சுகேஷோட பெரிய தலைவலிடா .. ஏன்தான் இப்படியெல்லாம் இருக்காங்களோ !
     தனபால் : என்னடா ஆச்சு?
     கதிரேசன்: வீட்டுக்கு வர கொஞ்சம் லேட்டாகும் அம்மாகிட்ட சொல்லிடுனா, நானும் கூட வர்றேங்கிறான்..
     தனபால் : அவன்கிட்ட எதுக்குடா இதைப் பத்தி சொன்னே ?
     கதிரேசன் : அவங்க இப்போ எங்க வீட்டுக்குப் பக்கத்துலதான் வாடகைக்கு வந்திருக்காங்க.. அதான் ..
     தனபால் : அதுக்குனு இப்படி உண்மையை சொல்லணுமா ?
     கதிரேசன்: என்னைப் பத்தி தெரியும்லடா.. எதுவாயிருந்தாலும் வீட்டுல மறைக்கமாட்டேன் ..
     தனபால் : ஓ.. இது வேறையா ! அவன கூட்டிட்டுப் போலான்டா, ஆனா அவன் மத்தவங்ககிட்ட சொல்லிட்டானா கூட்டம் கூடிரும்.. ஒரே நாள்ல மரத்தையே காலி பண்ணிருவாங்க...
     கதிரேசன்: இதோ வர்றான் பார்.. ஏதாவது சொல்லி சமாளி..
     (சுகேஷ் ஓடி வருகிறான். அவன் கையில் ஒரு டிஃபன் பாக்ஸ் இருக்கிறது. தனபால் அவனை வெறுப்புடன் பார்க்கிறான். )
     
     காட்சி : 3,
     இடம் : காடு, நேரம் : மாலை 4.45,
     மாந்தர் : கதிரேசன், தனபால், சுகேஷ்.
     
     தனபால் : சுகேஷ்.. இந்த ஒத்தையடிப் பாதையில சைக்கிள் போவாது ....நீ இதைப் பார்த்துக்கிட்டு இங்கேயே நில்லு.. நாங்க சீக்கிரமா வந்திர்றோம்..
     சுகேஷ் : உள்ள ரூட் இருக்கு-ண்ணா .. சைக்கிள் போகும்..
     கதிரேசன் : (கோபமாக) சைக்கிள் பஞ்சர் ஆயிடுச்சுனா அவனும் நம்மள மாதிரி நடந்துதான் வரணும்.. நம்ம வீடாவது பக்கம்.. தனபால் வீடு?
     சுகேஷ் : ஓ.கே-ண்ணா.. ஓ.கே-ண்ணா.. வெயிட் பண்றேன்..
     
     (மிதிவண்டியை நிறுத்திவிட்டு இருவரும் ஒற்றையடிப் பாதையில் செல்கிறார்கள். சுகேஷ் நிற்கும் மிதிவண்டியின் மீது ஏறி அமர்கிறான். )
     
     காட்சி : 4,
     இடம் : காடு, நேரம் : மாலை 5.15,
     மாந்தர் : கதிரேசன், தனபால், சுகேஷ்.
     
     (தனபாலும் கதிரேசனும் புளியமரத்தின் வேர் மீது அமர்ந்திருக்கிறார்கள். அவர்கள் அருகே ஒரு துணிப்பை நிறைய புளியங்காய்கள் இருக்கின்றன. கதிரேசன் புளியங்காயை உப்புமிளகுத் தூளில் தொட்டு கடிக்கிறான். )
     கதிரேசன்: ஆஹா.. என்னதான் சாக்லெட், வேஃபர் பிஸ்கெட்டெல்லாம் சாப்பிட்டாலும் நம்ம ஊர் புளியங்காய்தான் பெஸ்ட்டா ..
     தனபால்: ( மென்றுகொண்டே) ம்ம்ம்... உண்மைதான்.. அதே சமயம் இந்த மரக்காயைப் பத்தி மத்தவங்களுக்கு தெரிஞ்சுதுனா..
     கதிரேசன் : ( இடைமறித்து) ஏன்டா அதையவே சொல்லிட்டிருக்கே ?
     தனபால் : சுகேஷை நீ கூட்டிட்டுவந்திருக்கக் கூடாது..
     கதிரேசன் : அடேயப்பா.. நான்தான் போய் அவனை வம்படியா இழுத்திட்டு வந்தேன்.... போடா டேய்..
     தனபால் : சரி அத விடு.. அவங்கிட்ட என்ன சொல்லணும்னு தெரிஞ்சிருச்சு.. நான் பாத்துக்கிறேன்..
     கதிரேசன்: ஏதோ சொல்லு.. மறக்காம இந்த துணிப்பையை உன் ஸ்கூல் பேக்குல வெச்சுக்கோ.. ரெண்டு நாளைக்கு ரெண்டு பேரும் சாப்பிடலாம்..
     (தனபால் புளியங்காய் நிறைந்த துணிப்பையை ஸ்கூல் பேக்கில் வைக்கிறான். )
     
     காட்சி : 5,
     இடம் : காடு, நேரம் : மாலை 5.25,
     மாந்தர் : கதிரேசன், தனபால், சுகேஷ்.
     
     (சுகேஷ் ஐந்து புளியங்காய்களை டிஃபன் பாக்ஸில் வைத்து மூடுகிறான். )
     சுகேஷ் : அண்ணா.. அவ்ளோதான் இருந்துச்சா ?
     தனபால் : ஆமாடா.. ஏற்கெனவே மரத்துல ஏறி நிறைய பேர் பறிச்சிட்டாங்க போல..
     (கதிரேசன் ரகசியமாகச் சிரிக்கிறான். தனபால் மிதிவண்டியைத் தள்ளுகிறான். முன் சக்கரம் ஒரு முள்ளின் மேல் ஏறுகிறது. காற்றுப் போகும் சத்தம் கேட்கிறது. )
     கதிரேசன்: டேய்.. எங்கயோ பாம்பு சத்தம் போடுது..
     தனபால் : ம்ஸ்ஸ்ஸ்.. அங்க பாருடா.. பஞ்சர்.. எல்லாம் நேரம் !
     கதிரேசன் : இப்போ என்ன பண்றது?
     தனபால் : நட்ராஜா சர்வீஸ்தான்..வீட்டுக்குப் போனா என்ன சொல்லுவாங்களோ !
     சுகேஷ் : தன்ஸ் அண்ணா.. கொஞ்ச நேரம் இங்கேயே வெயிட் பண்றீங்களா நான் வந்துர்றேன்..
     கதிரேசன் : டேய்.. இது என்ன எடம்.. இருட்டு வேறே..எங்க போறேங்கிற?
     சுகேஷ் : இருங்க வந்துர்றேன்..
     (சுகேஷ் ஓடுகிறான். தனபாலும் கதிரேசனும் அவனைப் பார்க்கிறார்கள். )
     
     காட்சி : 6,
     இடம் : சாலை ஓரம். நேரம் : மாலை 5. 45,
     மாந்தர் : கதிரேசன், தனபால், சுகேஷ், நல்லசிவம்.
     
     நல்லசிவம் : அவ்ளோதான்.. மாட்டியாச்சு.. தம்பி, அந்த பிரேக்கைக் கொஞ்சம் புடிச்சுப் பாரு..
     (தனபால் பிரேக்கை அழுத்துகிறான். )
     நல்லசிவம் : ஓ.கே. டைட்டாத்தான் இருக்கு..
     தனபால் : தேங்க்ஸ்-ண்ணா.. எவ்ளோ ரூபா? காசு நாளைக்கு தரட்டுமா?
     நல்லசிவம் : இதுல என்னப்பா. . இதுக்குப் போய் காசெல்லாம்.. நான் என்ன பஞ்சர் தொழிலா பண்றேன் ?
     கதிரேசன் : அப்போ நீங்க பஞ்சர் ஒட்டுறவர் இல்லியா..... இவ்ளோ டூல்ஸ் வெச்சிருக்கீங்க?
     நல்லசிவம் : நான் டீக்கடை வெச்சிருக்கேன் தம்பி.. சைக்கிள்லதான் போய் வரவேண்டியிருக்கும்.. கரடு முரடான ஏரியாவுல இப்பிடினு அழுத்துனாலே பஞ்சராயிடுது.....அதான் எல்லாம் நானே வாங்கிட்டேன் ..
     தனபால் : சுகேஷ்.. உனக்கெப்புடி இவர்கிட்ட இதெல்லாம் இருக்குனு தெரியும் ?
     சுகேஷ் : முன்னாடி இந்த ஏரியாவுலதான் குடியிருந்தோம்.. தெரிஞ்சவர்தான் ண்ணா..
     நல்லசிவம் : டிப்போக்குப் புறப்பட்டுடேன்..... சுகுதான் அண்ணண் வண்டி பஞ்சர்னு சொல்லி புடிச்சு இழுத்துட்டு வந்துட்டான்..
     (சுகேஷ் சிரிக்கிறான். தனபால் அவனைப் பார்க்கிறான்.)
     நல்லசிவம் : (சுகேஷிடம்) இந்நேரத்துல வீட்டுக்குப் போகாம இங்க எங்கடா சுத்திட்டிருக்கே ?
     சுகேஷ் : புளியங்காய் அடிக்க வந்தோம் ண்ணா. .
     நல்லசிவம் : அப்டியா, எத்தனை கிடைச்சது ?
     சுகேஷ் : கொஞ்சம்தான் ண்ணா..
     தனபால் : (இடைமறித்து) நிறையா இருக்கு சுகேஷ்.. இந்தா இது உனக்குத்தான்..
     (தனபால் துணிப்பை நிறைய புளியங்காயை நீட்டுகிறான். சுகேஷ் மகிழ்ச்சியுடன் வாங்குகிறான். கதிரேசன் தனபாலை வியப்பாகப் பார்க்கிறான். )
     (திரை)
     க. சங்கர்
     
     
     
     


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    • அதிகம்
      படிக்கப்பட்டவை
    • அதிகம் பகிரப்பட்டவை
    kattana sevai
    flipboard facebook twitter whatsapp