தெரிந்த பெயர், தெரியாத விவரம்: வேலூர் கோட்டை

* வேலூர் கோட்டை  16-ஆம் நூற்றாண்டில் கட்டப்பட்டது  விஜய நகர பேரரசின் ஆட்சிக் காலத்தில்  ஆந்திர மாநிலத்தை சேர்ந்த திம்மிரெட்டி, பொம்மி ரெட்டி சகோதரர்களால் 136 ஏக்கர் பரப்பளவில்  இக்கோட்டை கட்டப்பட்டது.

* கருங்கல்லால் கட்டப்பட்ட அழகிய  கட்டுமானங்களுக்குப் பெயர் பெற்றது இதன் அழகிய மதில்கள். சுற்றியுள்ள  அகழியும் உறுதியான கல் கட்டமைப்புக்குப்  பெயர் பெற்றது.

* 191 அடி அகலமும் 29 அடி ஆழமும்கொண்ட  அகழியோடு கூடிய கோட்டையின் நுழைவு வாயில் கிழக்குப் பக்கம் உள்ளது. இதில் வெளி மதில்சுவர் உள் மதில்சுவர் என 2 சுற்றுச் சுவர்கள் அமைக்கப்பட்டுள்ளன.

* 17-ஆம் நூற்றாண்டின் இறுதியில் ஆற்காடு நவாப் கட்டுப்பாட்டில் இக்கோட்டை வந்தது. முகமதியர்களின் ஆட்சிக்குப்   பின்னர் இக்கோட்டை ஆங்கிலேயர்களின் கட்டுப்பாட்டில் வந்தது. 

* கோட்டையில் திப்புமஹால் ,ஹைதர் மஹால்,  பாஷா மஹால், பேகம் மஹால்,  கண்டி மஹால் என 5  சிறிய அரண்மனைகள் உள்ளன. 

* இக்கோட்டை நாயகர்களிடம் இருந்து பீஜப்பூர் சுல்தானுக்கும் பின்னர் மராட்டியருக்கும்  தொடர்ந்து நவாப்புகளுக்கும்,   இறுதியாக ஆங்கிலேயர்களுக்கும்  கைமாறியது.  திப்பு சுல்தான் குடும்பத்தினர் இக்கோட்டையில் சிறை வைக்கப்பட்டிருந்தனர். 

* இந்தியாவின் விடுதலைக்கு வித்திட்ட முதல்  சிப்பாய் புரட்சி 1806-இல் வேலூர் கோட்டையில்தான் நடைபெற்றது. 

* இலங்கையிலுள்ள கண்டியை ஆண்ட கடைசி தமிழ் மன்னர்  விக்கிரம ராஜசிங்கன் ஆங்கிலேயரால்  1815-இல் தோற்கடிக்கப்பட்டார். அப்போது அவரையும் அவரது குடும்பத்தாரையும் வேலூர்  கோட்டையில் சிறைவைத்தனர்.

* வேலூர்  புதிய பேருந்து நிலையம் அருகே முத்துமண்டபம் பகுதியில்  விக்கிரம ராஜ சிங்கனின் நினைவிடம் உள்ளது.

* வேலூர் கோட்டையில் உள்ள அருங்காட்சியகம் 1985-இல்  திறந்து வைக்கப்பட்டது. இதனுள்  தொல்லியல் கலைப்பொருட்கள், சிற்பங்கள், நாணயங்கள்,  கைவினைப் பொருட்கள்,  ஆயுதங்கள் முதலியவை உள்ளன. 

* இந்த கோட்டைக்குள் மத நல்லிணக்கத்துக்கு எடுத்துக்காட்டாக இந்து மதத்திற்குரிய ஜலகண்டேஸ்வரர் கோயில், கிறித்துவ தேவாலயம், முஸ்லிம்களின் வழிபாட்டுக்கு மசூதி ஆகியவை உள்ளன.   ஆங்கிலேயர்களின் ஆட்சியில் 1846-இல் கோட்டையில் கிறித்துவ தேவாலயம் கட்டப்பட்டது.

* கோட்டையில்  உள்ள ஜலகண்டேஸ்வரர் கோயிலில்   தெற்கு நோக்கி ஏழுநிலை கொண்ட ராஜகோபுரம் அமைந்துள்ளது. கோயிலின் வலது புறத்தில் குளமும், இடது புறத்தில்  மண்டபமும் உள்ளது. கோயிலில் உள்ள தூண்களில் கண்ணைக் கவரும் சிற்பங்கள் செதுக்கப்பட்டுள்ளன. 

* கோட்டையின் வெளிப்புறம்  கோட்டை மைதானம் உள்ளது  இதில்  பல அரசியல் கட்சி தலைவர்கள் கலந்து கொண்டு பேசியுள்ளனர்.  கோட்டையில் உள்ள பூங்காவில் நாள்தோறும் ஆயிரக்கணக்காண  மக்கள்  பொழுது போக்க  பயன் படுகிறது. 

* பழமை மாறாமல் உள்ள இக்கோட்டை சுற்றுலா பயணிகள்  ஏராளமானோர் பார்வையிட்டு செல்கின்றனர். வரவாற்று சிறப்பு மிக்க வேலூர் மாநகரின் பெருமைக்கு வேலூர் கோட்டையே சாட்சியாகும். 

* இக்கோட்டை தற்போது தொல்பொருள் ஆய்வுத்துறை கட்டுப்பாட்டில் உள்ளது. கோட்டையில் பல்வேறு அரசு அலுவலகங்கள் செயல்பட்டு வந்தன. தற்போது காவலர் பயிற்சி பள்ளி, அருங்காட்சியகம்  போன்றவைகள் செயல்பட்டு வருகின்றன. 
- ஜே.புகழேந்தி