அப்பா - மகள் கதை!

க்ரித்விக் சினி புரொடக்ஷன்ஸ் நிறுவனத்தின்  அனுமந்தங்குடி பி.முருகேசன் தயாரித்து வரும் படம் "ராஜாமகள்'.  "ஆடுகளம்' முருகதாஸ்,  வெலினா, பக்ஸ்,   ஈஸ்வர்,  மாஸ்டர் ஜோஸ்வா, பெராரே உள்ளிட்டோர் நடிக்கின்றனர். கதை, திரைக்கதை, வசனம் எழுதி இப்படத்தை இயக்குகிறார் ஹென்றி. 
 படம் குறித்து இயக்குநர் பேசும் போது... ""மிக எளிமையாக, சந்தோஷமாக  இந்த வாழ்க்கையை அணுகும் மன பக்குவம் கொண்டவர்கள், எத்தனை மகத்தானவர்கள். வெள்ளந்தியான, சந்தோஷமான மன அமைப்பு கொண்டவர்களை பார்க்கும் போது, அவர்களைப் போல் நம்மாலும் வாழ முடியாதா என்று தோன்றும். 
எல்லாமும் இயந்திரமாகிவிட்ட போதிலும், அன்புக்கான தருணங்கள் இன்னும் உயிர்ப்போடுதான் இருக்கின்றன. செல்பேசி, இணையம் என வந்து விட்ட போதிலும், சொல்லப்படாத சொற்கள் ஏராளமாக இருந்துக் கொண்டேதான் இருக்கின்றன. ஆனால் அன்பு மட்டுமே பிரதானமாக இருந்த காலங்கள் எங்கே... அப்படி ஒரு நினைப்பை உள்ளுக்குள் கொண்டு வந்து பார்க்கிற படம். தந்தைக்கும் மகளுக்குமான உறவு என்பது கதை நகருவதற்கான ஒரு வழிதான்''  என்றார் இயக்குநர்.